ក្រុងប៊ឺមិងហេម៖ ក្រុម Aston Villa (Villa) បានបញ្ចប់ការចាប់ផ្ដើមរបស់ក្រុម Everton ដែលមិនចាញ់សោះ ៤លើកដំបូង នៅក្របខ័ណ្ឌ Premier League រដូវកាលថ្មី ជាមួយនឹងគ្រាប់បាល់ ៣គ្រាប់ផ្ទួនៗ រយៈពេលប្រមាណជា ៩នាទី ក្នុងវគ្គទី ២ នៃការប្រកួត នៅឯកីឡដ្ឋាន Villa Park កាលពីថ្ងៃសៅរ៍។
ហ្គេមសប្ដាហ៍ទី ៥ រវាងក្រុមទាំង ២ នេះ បន្តគ្មានគ្រាប់បាល់រហូតដល់នាទីទី៦៦ ទើបខ្សែបម្រើស្លាប Matty Cash មានឱកាសស៊ុតឱ្យក្រុមម្ចាស់ផ្ទះ Villa នាំមុខ មុននឹងមានការធ្វើឱ្យបាល់ចូលទីខ្លួនឯងរបស់ខ្សែការពារ Lucas Digne នៅ ៣នាទីបន្ទាប់ ដែលនាំឱ្យក្រុមភ្ញៀវ Everton តាមពីក្រោយ ២-០។
ខណៈពេលដែលក្រុម Everton បានធ្វើការវាយសម្រុក ដើម្បីរកគ្រាប់បាល់វិញ ហើយភ្លាត់ នោះ កីឡាករបម្រុង Leon Bailey ពេលទទួលបាល់បានពី Danny Ings ក៏បណ្ដើរជាមួយនឹងល្បឿនយ៉ាងពេញកម្លាំង រហូតចូលដល់ប្រអប់គ្រោះថ្នាក់ រួចស៊ុតបន្ថែមការនាំមុខ ៣-០ នៅនាទីទី៧៥។
ក្រុម Everton មាន ១០ ពិន្ទុ ពីការប្រកួត ៥ដងរបស់ខ្លួន នៅលេខ ៥ ក្នុងតារាងពិន្ទុ ហើយក្រុម Villa ឡើងទៅទៅឈរពាក់កណ្ដាលតារាង ដោយមាន ៧ ពិន្ទុ ក្រោយមានជ័យជម្នះនេះ។
ក្រុមភ្ញៀវ Everton ត្រូវធ្វើការប្រកួតដោយអវត្តមានកីឡាករឆ្នើមៗប៉ុន្មានរូប ដូចជាខ្សែប្រយុទ្ធទាំង ២ Dominic Calvert-Lewin និង Richarlison និងអ្នកចាំទី Jordan Pickford ព្រមទាំងខ្សែការពារស្លាបស្ដាំ Seamus Coleman។
គ្រូបង្វឹករបស់ក្រុម Villa លោក Dean Smith បានថ្លែងថា៖ «ខ្ញុំគិតថា យើងជាក្រុមលេងបានល្អជាង នៅវគ្គទី ១ តែយើងមិនអាចបង្កើតឱកាសឱ្យបានច្បាស់លាស់ តាមដែលយើងចង់។ ខ្ញុំគិតថា ៥នាទី នៅមុនការមានគ្រាប់បាល់ ពួកគេឡើងដល់កម្រិតកំពូល»។
ជាមួយគ្នានេះ លោក Smith ក៏បានពោលសរសើរចំពោះកីឡាករ Bailey ជាពិសេសផងដែរ ដោយលោក បានប្រាប់ថា៖ «Bailey ទាត់បាល់ជ្រុង នាំឱ្យមានគ្រាប់បាល់ទី ២ ហើយស៊ុតបញ្ចូលទីគ្រាប់បាល់ទី ៣។ គ្រាប់បាល់ដំបូង គឺជាការលេងពីក្រោមឡើងទៅលើ យ៉ាងអស្ចារ្យ ហើយ Cash ស៊ុតចូលជ្រុង ៩០ដឺក្រេល្អណាស់»។
«តែខ្ញុំយល់ថា Bailey នឹងជួយធ្វើឱ្យពួកយើង ប្រសើរឡើងបន្តិច។ គេពិតជាពិសេសណាស់។ គេពិតជាកីឡាករល្អ។ នោះហើយជាមូលហេតុ ដែលយើងនាំគេ មករួមក្រុម»។ នេះជាការបន្ថែមរបស់លោក Smith៕ AFP/VN