.jpg)
អ្នកគាំទ្ររបស់ក្រុម Lens សម្រុកចូលទីលាន អំឡុងការប្រកួត នៅ Ligue 1 ទល់នឹងក្រុម Lille កាលពីថ្ងៃសៅរ៍។ AFP
ក្រុងប៉ារីស៖ ក្រុម Lens បានយកឈ្នះក្រុមជើងឯកចាស់ Lille ១-០ ពីការប្រកួត ក្នុងក្របខ័ណ្ឌ Ligue 1 កាលពីថ្ងៃសៅរ៍ ខណៈដែលជំនួប រវាងក្រុម នៅភាគខាងជើងប្រទេសបារាំងទាំង ២ នេះ ត្រូវបានបិទបាំង ដោយការរត់ចូលទីលានរបស់អ្នកគាំទ្រ រហូតមានការផ្អាកដល់ទៅ ៣០ នាទី មុនចាប់ផ្ដើមវគ្គទី ២។
អ្នកគាំទ្ររាប់សិបនាក់របស់ក្រុមម្ចាស់ផ្ទះ Lens បាននាំគ្នាសម្រុកចូលទីលាននៃកីឡដ្ឋាន Bollaert-Delelis នៅវគ្គទី ១ ដើម្បីប្រឈមមុខគ្នា ជាមួយនឹងអ្នកគាំទ្រក្រុមភ្ញៀវ Lille ដែលនៅជ្រុងម្ខាងទៀត នៃទីលាន បន្ទាប់ពីភាពតានតឹង ចាប់ផ្ដើមឆេះឡើង ជាមួយនឹងអ្នកទស្សនាផ្សេងទៀត។
ក្រុមប៉ូលិសបង្ក្រាបកុបកម្ម បានចូលមកអន្តរាគមន៍ ដើម្បីបំបែកក្រុមអ្នកគាំទ្រ ដែលមានជម្លោះគ្នា ខណៈដែលអ្នកគាំទ្រទាំងសងខាង បានចោលកៅអី ដាក់គ្នាទៅវិញទៅមក ឆ្លងតាមជញ្ជាំងខណ្ឌផ្ដាច់កន្លែងអង្គុយរបស់កីឡដ្ឋាន។
នាយកគ្រប់គ្រងក្លិប Lens លោក Arnaud Pouille បានឱ្យដឹងថា៖ «យើងកំពុងស្ថិតក្នុងដំណើរការ ក្នុងការរកឱ្យឃើញរូបភាពច្បាស់លាស់។ វាបានធ្វើឱ្យមានការស្មុគស្មាញខ្លះៗប្រាកដឡើង។ ពិតមែនហើយ សកម្មភាពនៃអំពើហិង្សាណាមួយ ត្រូវបានថ្កោលទោសដោយក្រុម Lens។ ជារឿងគួរឱ្យសោកស្ដាយ ដែលមុខមាត់របស់តំបន់ ត្រូវបានប៉ះពាល់ដោយអ្វី ដែលបានកើតឡើង»។
បើយោងតាមអាជ្ញាធរ នៅក្រុងឡង់ស៍ បានឱ្យដឹងថា ក្នុងហេតុការណ៍នេះ មនុស្ស ៦ នាក់ បានរងរបួសស្រាល ហើយប៉ូលិស បានឃាត់ខ្លួនមនុស្ស ២ នាក់។
យ៉ាងណាក្ដី ជាមួយនឹងគ្រាប់បាល់របស់ខ្សែបម្រើអន្តរជាតិប៉ូឡូញ Przemyslaw Frankowski នៅនាទីទី ៧៤ បានជួយឱ្យក្រុម Lens បញ្ចប់ការមិនឈ្នះសោះចំនួន ១២ ហ្គេម ក្នុងការប៉ះគ្នាជាមួយក្រុម Lille ដែលរដូវកាលមុន យកឈ្នះពួកគេទាំងក្នុង និងក្រៅទឹកដី ជាមួយនឹងលទ្ធផល ៤-០ និង ៣-០។
លើសពីនេះទៀត ជ័យជម្នះនេះ នាំឱ្យក្រុម Lens ឡើងទៅឈរនៅលំដាប់ទី ២ ក្នុងតារាងពិន្ទុ នៃក្របខ័ណ្ឌ Ligue 1 ដោយ ៦ ហ្គេមកន្លងទៅ ឈ្នះ ៣ និងស្មើ ៣ ខណៈដែលក្រុមការពារជើងឯក Lille ស្ថិតនៅលំដាប់ទី ៣ ដោយឈ្នះតែម្ដងប៉ុណ្ណោះ ពីការប្រកួត ៦លើក ក្នុងនោះចាញ់ដល់ទៅ ៣លើក៕ AFP/VN
