ភ្នំពេញៈ អតីតគ្រូបង្វឹកក្រុមវិសាខា លោក ហុក សុជីវ័ន បានសរសើរ ទៅដល់ក្រុមបឹងកេត ដែលអាចកែប្រែទម្រង់លេងដ៏អាក្រក់ក្នុងពេល ១ សប្តាហ៍ ដើម្បីអាចយកឈ្នះក្រុមវិសាខា វិញ ដ៏គួរឱ្យភ្ញាក់ផ្អើលបំផុត ចំណែក ភ្នំពេញក្រោន ក៏ជួបការបរាជ័យជាលើកដំបូង ក្នុងថ្ងៃជាមួយគ្នានេះដូចគ្នា ប៉ុន្តែក្រុមណាហ្គាវើលដ៍ បានបន្តឈ្នះ៣ពិន្ទុ ដើម្បីធ្វើឱ្យក្រុមកំពូលតារាងទាំង ៤ នៅពេលនេះ មាន ២៨ ពិន្ទុស្មើគ្នា។
តាមរយៈការធ្វើដំណើរទៅជួបក្រុមម្ចាស់ផ្ទះវិសាខា កាលពីថ្ងៃសៅរ៍ កន្លងមកនេះ មានអ្នកទស្សនាមិនច្រើនទេ ដែលគិតថា បឹងកេត អាចយកឈ្នះលើក្រុមម្ចាស់ផ្ទះ ខណៈពួកគេ ទើបបានចាញ់ វិសាខា ៥-១ កាលពីជើងទី១ ស្របពេលកីឡាករសំខាន់ៗមួយចំនួន មានរបួស មិនអាចលេងបាន ចំពេល កីឡាករចំណូលថ្មីរបស់ វិសាខា គឺខ្សែប្រយុទ្ធប្រេស៊ីល Cristian Alex និងកីឡាករកូរ៉េខាងត្បូង Lee Jae Gun ត្រូវបង្ហាញខ្លួនទៀតនោះ។
ប៉ុន្តែតាមរយៈការប្រកួតជាក់ស្តែង ខ្សែប្រយុទ្ធដ៏ឆ្នើម ចាន់ វឌ្ឍនាកា បានស៊ុត ២ គ្រាប់ជាប់ៗគ្នា នៅនាទីទី២៥ និងទី៣០ ដើម្បីជួយឱ្យ បឹងកេត នាំមុខក្រុមម្ចាស់ផ្ទះ វិសាខា ២-០ នៅមុនពេលខ្សែប្រយុទ្ធចំណូលថ្មី Cristian Alex រកបាន ១ គ្រាប់វិញឱ្យ វិសាខា នៅនាទីទី៥៨។ ការយកឈ្នះ ២-១ របស់ បឹងកេត លើកនេះ ពិតជាធ្វើឱ្យគ្រប់គ្នា មានការភ្ញាក់ផ្អើលខ្លាំង គឺសូម្បីតែអតីតគ្រូបង្វឹកក្រុមវិសាខា លោក ហុក សុជីវ័ន ក៏បានសរសើរដល់ក្រុមបឹងកេត ផងដែរ។
លោក ហុក សុជីវ័ន បានសរសេរបង្ហោះ នៅលើហ្វេសប៊ុករបស់ខ្លួន បន្ទាប់ពី បឹងកេត បានយកឈ្នះក្រុម វិសាខា ២-១ ថា៖ «(ខ្ញុំ) សុំសរសើរ រយៈពេល១ឣាទិត្យ គាត់ឣាចកែប្រែទម្រង់ដ៏ឣាក្រក់មួយ ឱ្យប្រែក្លាយជាល្អ វិញបាន ដោយយល់ច្បាស់ពីគូប្រកួត បូករួមឆន្ទៈដ៏ខ្លាំងក្លាចង់ឈ្នះរបស់ក្រុមកីឡាករទាំងឣស់។ ឣរគុណដល់បងស្រី ពុធ ធីតា (ប្រធានក្លិបបឹងកេត) ដែលតែងតែជឿជាក់ និងផ្តល់ទំនុកចិត្តដល់គ្រូខ្មែរ! សុំសរសើរ និងចូលរួមឣបឣរ បង គីម ភក្តី (គ្រូបង្គោល) គូនេះ ពិតជាជក់ចិត្តខ្លាំង»។
តាមរយៈការសងសឹក វិសាខា បានសម្រេច ដើម្បីទទួលបាន ៣ ពិន្ទុនេះ វាបានបន្ថែមនូវឱកាសមួយ សម្រាប់បឹងកេត ក្នុងការឈានទៅរកការការពារតំណែងជើងឯករបស់ពួកគេ បើទោះបីជាពេលនេះ ពួកគេបន្តឈរនៅលេខ ៥ មាន ២៧ ពិន្ទុ ក៏ដោយ ព្រោះជ័យជម្នះរបស់ក្រុមម្ចាស់ផ្ទះ ព្រះខ័នរាជស្វាយរៀង ១-០ លើក្រុមភ្នំពេញក្រោន ដែលរកបាន ១ គ្រាប់ របស់ខ្សែប្រយុទ្ធចំណូលថ្មី Emmanuel នៅនាទីទី៨៥ កាលពីថ្ងៃសៅរ៍នោះដែរ រួមទាំងជ័យជម្នះរបស់ក្រុមណាហ្គាវើលដ៍ ៤-២ លើក្រុមអង្គរថាយហ្គឺរ វាកំពុងធ្វើឱ្យ ក្រុមវិសាខា ភ្នំពេញក្រោន ស្វាយរៀង និងណាហ្គាវើលដ៏ មាន ២៨ ពិន្ទុស្មើគ្នា គឺលើស បឹងកេត ត្រឹម ១ ពិន្ទុទេ។
ជុំវិញការចាញ់ជាលើកដំបូងនេះ លោក Oleg គ្រូបង្វឹកក្រុមភ្នំពេញក្រោន បាននិយាយថា៖ «យើងមិនរៀបចំ ដើម្បីចាញ់នោះទេ! ក្នុងនាមជាក្លិប និងជាក្រុមទាំងមូល យើងធ្វើអ្វីគ្រប់យ៉ាង គឺដើម្បីជ័យជម្នះ។ យើងចាញ់ការប្រកួតនេះដោយសារតែលទ្ធផល ប៉ុន្តែការលេង គឺមិនចាញ់នោះទេ យើងមានឱកាសជាច្រើនក្នុងការប្រកួតនីមួយៗ។
អ្វីដែលត្រូវការបន្តទៀតនោះ គឺយើងត្រូវតែធ្វើការឱ្យមានគុណភាព គ្រប់សកម្មភាពរបស់យើងទាំងអស់ មិនថា ទាំងការគ្រប់គ្រងបាល់ និងការការពារ។ យើងត្រូវតែក្រោកឈរឡើងបន្ទាប់ពីការចាញ់នេះ ហើយបន្តប្រយុទ្ធទៀត ដើម្បីពានរង្វាន់ យើងទទួលយកនៅសម្ពាធ ហើយយកវាមកធ្វើជាកម្លាំងចិត្ត ដើម្បីការឈ្នះនៅពេលអនាគត»។
ចំណែកលោកឧកញ៉ា ឬទ្ធី សំណាង ជាប្រធានក្លិប បានផ្ញើសារលើកទឹកចិត្ត ដល់ក្រុមភ្នំពេញក្រោន របស់លោកបែបនេះថា៖ «ប្រសិនបើអ្នកព្យាយាមហើយនៅតែបរាជ័យ សូមអបអរសាទរ ដោយសារតែមនុស្សភាគច្រើន សូម្បីតែសាកល្បង ក៏មិនបានសាកល្បងផង»៕