ភ្នំពេញៈ គណៈកម្មាធិការអូឡាំពិកអន្តរជាតិ (IOC) ដែលជាស្ថាប័នកីឡា មានសមាជិកចំនួន ១០៥ ប្រទេសនោះ បានទទួលស្គាល់កីឡាករអត្តពលិកកម្ពុជា ប៉ែន សុគង់ ជាកីឡាករអូឡាំពិកជាផ្លូវការ បើទោះបីជា សុគង់ ធ្វើមិនបានល្អលើការប្រកួតរត់ល្បឿន ១០០ ម៉ែត្រ ក្នុងព្រឹត្តិការណ៍ប្រកួតកីឡាអូឡាំពិកទីក្រុងតូក្យូ ឆ្នាំ ២០២០ នៅប្រទេសជប៉ុន កាលពីពេលថ្មីៗនេះក៏ដោយ។
ជាមួយគ្នានេះ មន្ត្រីបច្ចេកទេសនៃសហព័ន្ធខ្មែរកីឡាអត្តពលកម្ម បានសម្តែងភាពរំភើបសប្បាយរីករាយ និងលើកទឹកចិត្តចំពោះអត្តពលិកកម្ពុជា ប៉ែន សុគង់ ដែលទទួលបានលិខិតពីព្រឹត្តិការណ៍អន្តរជាតិ ៤ ឆ្នាំមានម្តងនេះ។ ចំណែកកីឡាករ ប៉ែន សុគង់ បានបង្ហាញការត្រេកអរ និងប្តេជ្ញាចិត្តខ្ពស់ថា នឹងបន្តការប្រឹងប្រែង ដើម្បីខ្លួនឯង និងប្រទេសជាតិ។
កញ្ញា កែវ មនោរម្យ ជាអគ្គលេខាធិការថ្មី របស់សហព័ន្ធខ្មែរកីឡាអត្តពលកម្មស្ម័គ្រចិត្តបាននិយាយថា៖ «បើនិយាយពីការប្រកួតកីឡាអូឡាំពិកអន្តរជាតិនេះ ជាព្រឹត្តិការណ៍ពិភពលោកមានលក្ខណៈធំ និងមានលក្ខខណ្ឌតឹងតែងច្បាស់លាស់ណាស់ ពោលគឺមិនអាចមានអត្តពលិកណាបានចូលងាយៗនោះទេ គឺជាការសម្រិតសម្រាំងខ្ពស់បំផុត មានតាំងពីថ្នាក់ជម្រើសរបស់សហព័ន្ធជាតិ ជម្រើសសហព័ន្ធទ្វីប និងពិភពលោក ដោយមានប្រវត្តិឆ្លងកាត់ការចូលរួមប្រកួតច្រើនព្រឹត្តិការណ៍ ដែលកំណត់ត្រាកម្រិតបច្ចេកទេសរបស់សហព័ន្ធអត្តពលកម្មអន្តរជាតិច្បាស់លាស់»។
មនោរម្យ បានបន្ថែមថា៖ «ទោះបីលទ្ធផលប្រកួត នៅកម្រិតអូឡាំពិក ប៉ែន សុគង់ បានលទ្ធផលមិនទាន់ល្អ ប៉ុន្តែកម្រិតឆ្លងកាត់ និងបទពិសោធរបស់គាត់ បានធ្វើឱ្យគណៈកម្មការរៀបចំ ទទួលស្គាល់ ដែលនេះ ជាមោទនភាពមួយធំធេងណាស់ទៅហើយ»។
ចំណែកកីឡាករ ប៉ែន សុគង់ ដែលកំពុងបន្តការហ្វឹកហាត់ នៅជប៉ុននោះ បានប្រាប់តាមអនឡាញថា៖ «ក្រោយពេលទទួលបានវិញ្ញាបនបត្រ ពីគណៈកម្មាធិការអូឡាំពិកអន្តរជាតិ ខ្ញុំបាទមានអារម្មណ៍ត្រេកអររំភើបរីករាយយ៉ាងខ្លាំង។ ខ្ញុំមិននឹកស្មានដល់ថា ខ្លួនខ្ញុំផ្ទាល់អាចមានថ្ងៃនេះទេ គឺសប្បាយចិត្តណាស់ ព្រោះខ្ញុំចូលរួមព្រឹត្តិការណ៍ការប្រកួតកីឡាអូឡាំពិកទីក្រុងតូក្យូនេះ ទើបតែជាលើកទី១ និងសង្ឃឹមថា អាចនឹងបានចូលរួមអូឡាំពិកអន្តរជាតិ ឆ្នាំ ២០២៤ នៅប្រទេសបារាំងទៀតមិនខាន»។
«ខ្ញុំ សូមគោរពថ្លែងអំណរគុណលោកគ្រូបង្វឹក មិត្តរួមក្រុម និងលោក អ៊ុក សិទ្ធិជាតិ អតីតប្រធានសហព័ន្ធ លោក សំហេង បុរស បច្ចុប្បន្នជាប្រធានសហព័ន្ធខ្មែរកីឡាអត្តពលកម្មស្ម័គ្រចិត្ត ព្រមទាំងគណៈកម្មការជាតិអូឡាំពិកកម្ពុជា ជាពិសេសក្រសួងអប់រំ យុវជន និងកីឡា និងមជ្ឈមណ្ឌល កីឡាកងយោធពលខេមរភូមិន្ទ ដែលបានជ្រើសរើស ហើយផ្ដល់នូវឱកាសមួយនេះសម្រាប់ខ្ញុំ»។
គួរបញ្ជាក់ថា ប៉ែន សុគង់ ធ្វើមិនបានល្អនោះទេ នៅក្នុងការប្រកួតកីឡាអូឡាំពិក ទីក្រុងតូក្យូ កាលពីពេលថ្មីៗនេះ ដោយរូបគេធ្វើក្នុងថិរវេលា ១១.០២ វិនាទី ក្នុងការរត់ចម្ងាយ ១០០ ម៉ែត្រ គឺមានការធ្លាក់ចុះ ជាង ឯកទគ្គកម្មចាស់របស់ខ្លួន ដែលធ្លាប់ធ្វើបានត្រឹម ១០.៨៧ វិនាទី។ ទោះយ៉ាងណា សុគង់ បានបន្តការហ្វឹកហាត់នៅប្រទេសជប៉ុន ចំនួន ៨ ខែ ដើម្បីពង្រឹងបន្ថែមនូវកម្លាំង និងបច្ចេកទេស ដើម្បីត្រៀមចូលរួមប្រកួតស៊ីហ្គេម លើកទី៣១ នៅវៀតណាម ដែលបានលើកទៅធ្វើនៅឆ្នាំ ២០២២ និងស៊ីហ្គេម លើកទី៣២ ឆ្នាំ ២០២៣ នៅកម្ពុជា។
ប៉ែន សុគង់ បានបញ្ជាក់ថា៖ «ខ្ញុំទើបតែធ្វើការហ្វឹកហាត់បានរយៈពេលជិត ៥០ ថ្ងៃតែប៉ុណ្ណោះ ហើយយើងកំពុងស្ថិតនៅដំណាក់កាលដំបូង ដែលត្រូវបន្សាំខ្លួន ជាមួយការហ្វឹកហាត់ អាកាសធាតុ និងម្ហូបអាហារស្រុកគេ ប៉ុន្តែខំប្រឹង ដើម្បីខ្លួនឯង និងប្រទេសជាតិយើង សម្រាប់ការប្រកួតអន្តរជាតិនានា នៅលើកក្រោយៗទៀត»៕