.jpg)
លោក ឆយ យ៉ុងសុក សញ្ជាតិកូរ៉េខាងត្បូង ដែលបានមកធ្វើគ្រូបង្វឹកជម្រើសជាតិតេក្វាន់ដូកម្ពុជាជិត ២០ ឆ្នាំ។
ភ្នំពេញៈ សហព័ន្ធបណ្ឌិតសភាតេក្វាន់ដូកម្ពុជា បានសហការជាមួយខេមរសហព័ន្ធ តេក្វាន់ដូ (WT) ដើម្បីរៀបចំបានវគ្គបណ្តុះបណ្តាលគ្រូបង្វឹកតាមអនឡាញឆ្នាំ ២០២១ ដែលមានឈ្មោះ «Online Instructor Program 2021» ហើយវគ្គបណ្តុះបណ្តាល ដែលបានចាប់ផ្ដើមតាំងពីថ្ងៃទី ១៧ ខែកញ្ញា និងគ្រោងបញ្ចប់ នៅថ្ងៃទី ២៤ ខែតុលា មួយនេះ មានសិក្ខាកាមជាគ្រូបង្វឹកចំនួន ១៨ នាក់ មកពីខេត្ត-រាជធានីភ្នំពេញ សរុបចំនួន ៦ ដែលតំណាងទូទាំងប្រទេសកម្ពុជា បានចូលរួម។
លោក ឆយ យ៉ុងសុក សញ្ជាតិកូរ៉េខាងត្បូង ដែលបានមកធ្វើគ្រូបង្វឹកជម្រើសជាតិតេក្វាន់ដូកម្ពុជាជិត ២០ ឆ្នាំ និងជាគ្រូឧទ្ទេសក្នុងវគ្គនេះ បានប្រាប់ថា៖ «តាមពិតវគ្គនេះ បានចាប់ផ្តើមតាំងខែមិថុនា នឹងគ្រោងធ្វើរហូតដល់ថ្ងៃទី ២៤ ខែតុលា ដែលមានរយៈពេល ១៩ សប្តាហ៍ ប៉ុន្តែយើងសិក្សាតែរាល់ថ្ងៃសៅរ៍ទេ ហើយវាជាផ្នែកមួយ ដើម្បីអភិឌ្ឍ និងជំរុញសកម្មភាពកីឡាតេក្វាន់ដូ នៅតាមបណ្តាខេត្ត និងក្លិបមួយចំនួន ឱ្យមានសកម្មភាពរស់រវើកបន្ត គឺយ៉ាងហោចណាស់ក៏យើងរក្សាបាននូវកម្រិតបច្ចេកទេស កម្លាំងកាយ និងកម្លាំងបច្ចេកទេស មិនឱ្យធ្លាក់ចុះដែរ ទោះបីស្ថិតនៅក្រោមការវាយលុកមេរោគកូវីដ ១៩»។
គ្រូជំនាញជនជាតិកូរ៉េខាងត្បូងរូបនេះ បានឱ្យដឹងទៀតថា វគ្គបណ្តុះបណ្តាលនេះ មានការជួយគាំទ្រភាគីកូរ៉េ ដើម្បីអភិវឌ្ឍកីឡាតេក្វាន់ដូ WT ដែលជាប្រភេទកីឡាអូឡាំពិកមួយដ៏ល្បីល្បាញ មកពីប្រទេសកូរ៉េខាងត្បូង ហើយបានធ្វើឱ្យកម្ពុជា ដណ្តើមបានភាពជោគជ័យ ក្នុងទ្វីបអាស៊ី និងលើពិភពលោកដែរ។
លោក យ៉ុងសុក បានប្រាប់បន្ថែមថា៖ «ទោះបីបច្ចុប្បន្ន យើងទាំងអស់គ្នា ជាពិសេសសកម្មភាពកីឡាស្ថិត ក្រោមស្ថានភាពលំបាក ក្នុងវិបត្តិនៃជំងឺកូវីដ ១៩ ក៏ដោយ ក៏យើងត្រូវតែជំរុញឱ្យមានសកម្មភាព នៅតាមរាជធានី-ខេត្ត ដែលមានក្លិបកីឡាតេក្វាន់ដូ និងផ្តល់ចំណេះដឹងបច្ចេកទេសកីឡានេះ ជូនគ្រូបង្វឹកតាមរយៈការសិក្សា តាមអនឡាញនេះដែរ ដើម្បីឱ្យបានផុលផុស គឺនេះជាមធ្យោបាយល្អមួយ ដែលជួយឱ្យយើងទទួលបានផលល្អផងដែរ»។
លោក ជាតិ ខេមរា អគ្គហេរញ្ញឹក ខេមរសហព័ន្ធតេក្វាន់ដូ បានប្រាប់ដែរថា លោកគ្រូ ឆយ យ៉ុងសុក បានបង្ហាញសកម្មភាពបង្វឹក ក៏ដូចជាទ្រឹស្តីពីវិទ្យាស្ថានកីឡា តាមរយៈប្រព័ន្ធអនឡាញ (Zoom) ដើម្បីពង្រឹងសមត្ថភាពដល់សិក្ខាកាម ហើយនេះជាគំនិតឆ្នៃប្រឌិតថ្មី ក្នុងអំឡុងពេលជំងឺកូវីដ ១៩ វាយលុក៕
