.jpg)
លោក Manny Pacquiao ដែលនឹងឈរឈ្មោះប្រជែងតំណែងប្រធានាធិបតី។ រូបថត Twitter
ក្រុងម៉ានីល: អ្នកប្រដាល់ជានិមិត្តរូបរបស់ហ្វីលីពីន លោក Manny Pacquiao បានប្រកាសថា លោកនឹងឈរឈ្មោះប្រជែងតំណែងប្រធានាធិបតី ក្នុងឆ្នាំ ២០២២ ដោយធ្វើការប្ដេជ្ញាថា នឹងដោះស្រាយបញ្ហាភាពក្រីក្រ និងអំពើពុករលួយឱ្យបាន ខណៈរូបលោកស្វះស្វែង ដើម្បីឈ្នះចិត្តអ្នកបោះឆ្នោតជាមួយនឹងប្រវត្តិពីជនក្រីក្រ រហូតក្លាយជាអ្នកមានទ្រព្យសម្បត្តិរបស់លោក។
«ឥឡូវនេះ ដល់ពេលហើយ! យើងត្រៀមខ្លួនរួចជាស្រេច ក្នុងការប្រជែងតំណែងដឹកនាំ»។ លោក Pacquiao ដែលបច្ចុប្បន្ន ជាសមាជិកព្រឹទ្ធសភាបាននិយាយ កាលពីថ្ងៃអាទិត្យ ខណៈដែលរូបលោកទទួលយកការស្នើរបស់ក្រុមផ្ដាច់ខ្លួន ពីគណបក្សកាន់អំណាចរបស់លោកប្រធានាធិបតី Rodrigo Duterte។
ម្ចាស់ខ្សែក្រវាត់ពិភពលោក ៨ ប្រភេទទម្ងន់ខុសគ្នា និងវីរបុរសសំណព្វចិត្តរបស់ជាតិរូបនេះបានធ្វើការប្រកាស ប៉ុន្មានសប្ដាហ៍ ក្រោយបរាជ័យ ដោយសារគូប្រកួតសញ្ជាតិគុយបា Yordenis Ugas នៅឡាសវេហ្គេស ពីការប្រកួត ដែលអាចជាការឡើងសង្វៀនអាជីពលើកចុងក្រោយរបស់គាត់។
លោក Pacquiao ដែលចូលប្រឡូកនយោបាយ ក្នុងឆ្នាំ ២០១០ ក្នុងនាមជាសមាជិកសភា មុនពេលជាប់ឆ្នោតជាសមាជិកព្រឹទ្ធសភា ត្រូវបានរំពឹងជាយូរមកហើយ ក្នុងការមានទំនោរទៅរក ការដណ្ដើមតំណែងដ៏ខ្ពស់បំផុតនេះ។
អតីតអត្តពលិកវ័យ ៤២ ឆ្នាំ រូបនេះ ទទួលបានការសរសើរយ៉ាងខ្លាំង ពីមនុស្សជាច្រើនក្នុងប្រទេសកោះមួយនេះ ចំពោះភាពតស៊ូរបស់គាត់ និងការទាញខ្លួនឯងឱ្យរួចផុតពីភាពក្រីក្រ រហូតបានក្លាយជាមនុស្សម្នាក់ ក្នុងចំណោមអ្នកប្រដាល់ដ៏អស្ចារ្យ និងមានទ្រព្យសម្បត្តិបំផុតរបស់ពិភពលោក។
តែយ៉ាងណា Pacquiao ធ្លាប់ផ្ដល់ការគាំទ្រ ចំពោះសង្គ្រាមប្រឆាំងគ្រឿងញៀន ដែលធ្វើឱ្យមានការបាត់បង់ជីវិត និងការបញ្ចេញមតិយោបល់ដែលលើកឡើងថា គូអ្នកស្រឡាញ់ភេទដូចគ្នា អាក្រក់ជាងសត្វទៅទៀត។
«សម្រាប់អ្នកដែលកំពុងសួរថា អ្វី ដែលជាគុណភាពរបស់ខ្ញុំ? តើអ្នកធ្លាប់ឆ្លងកាត់ភាពអត់ឃ្លាន ឬអត់?»។ លោក Pacquiao សួរទៅសមាជជាតិ ដែលត្រូវបានរៀបចំឡើង ដោយក្រុមប្រឆាំងនឹងលោក Duterte របស់គណបក្ស PDP-Laban។ «តើអ្នកធ្លាប់់ឆ្លងកាត់ការអត់មានអ្វីបរិភោគ ធ្លាប់ខ្ចីលុយពីញាតិជិតខាង ឬធ្លាប់រង់ចាំម្ហូបអាហារ ដែលនៅសល់ទេ? Pacquiao ដែលនៅចំពោះមុខអ្នកទាំងអស់គ្នានេះ ត្រូវរុំព័ទ្ធទៅដោយភាពក្រីក្រ»។ Pacquiao បានបន្ថែម៕ AFP/VN
