.jpg)
សកម្មភាពប្រជុំតាមអនឡាញ Zoom របស់ CAMSOC ពីថ្ងៃអង្គារ។ សហការី
ភ្នំពេញៈ គណៈកម្មការអចិន្រៃ្តយ៍ CAMSOC ក្រោមអធិបតីភាពលោកឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ទៀវ បាញ់ បានបើកកិច្ចប្រជុំកាលពីថ្ងៃអង្គារ ជាមួយគណៈកម្មការជំនាញមួយចំនួន ក្នុងនោះមានខាងក្រសួងវប្បធម៌ និងវិចិត្រសិល្បៈ និងអាជ្ញាធរខេត្ត ដែលពាក់ព័ន្ធ ដើម្បីឆ្លងគម្រោងធំៗ ចំនួន ៣ គឺទី១ ពិធីបើក-បិទស៊ីហ្គេមលើកទី៣២ នៅកម្ពុជា ទី២ ពិធីរត់ភ្លើងគប់ និងទី៣ កម្ពុជាត្រៀមខ្លួនទទួលធ្វើព្រឹត្តិការណ៍ស៊ីហ្គេម ជំនួសវៀតណាម ក្នុងករណីប្រទេសនេះ មិនបានឆ្លើយតបកម្មវិធីស៊ីហ្គេមខ្លួន តាមការកំណត់របស់ក្រុមប្រឹក្សាកីឡាអាស៊ីអាគ្នេយ៍។
លោក វ៉ាត់ ចំរើន អគ្គលេខាធិការ CAMSOC បានប្រាប់លម្អិតពីព័ត៌មាន ក្រោយកិច្ចប្រជុំថា៖ «សម្រាប់ខ្លឹមសារនៃកិច្ចប្រជុំ CAMSOC ថ្ងៃនេះ បានពិនិត្យទៅលើគម្រោងចំនួន ៣ គឺទី១ ការរត់ភ្លើងគប់ ជាលក្ខណៈគ្រោងឆ្អឹង ដែលត្រូវបានអនុម័តថ្ងៃនេះហើយ គឺពិធីរត់ភ្លើងគប់ ត្រូវបានធ្វើពិធីច្រើនដូចជាសុំភ្លើងពីអាទិទេព ដែលធ្វើឡើងនៅអង្គរ ខេត្តសៀមរាប ក្រោមអធិបតីភាពដ៏ខ្ពង់ខ្ពស់ពីព្រះមហាក្សត្រ ហើយក៏មានដង្ហែភ្លើងគប់ ទៅកាន់ប្រទេសក្នុងអាស៊ីអាគ្នេយ៍ បន្ទាប់មកយើងក៏រត់ភ្លើងគប់នៅតាមតំបន់ទន្លេសាប និងខេត្តផ្សេងទៀត ដោយចាប់ពីខែមីនា ដល់ខែឧសភា ឆ្នាំ ២០២៣»។
លោកបានបន្តថា៖ «កម្មវិធីនេះ នឹងត្រូវសហការគ្នាជាមួយអាជ្ញាធរខេត្ត ព្រមទាំងស្ថានទូតនៃប្រទេសក្នុងអាស៊ាន ដែលភ្លើងគប់ឆ្លងកាត់។ យើងរៀបចំកម្មវិធីនេះ ជាកូនសៀវភៅតម្រង់ទិសមួយ នឹងបែងចែកឱ្យបានទូលំទូលាយ គឺមើលទៅដឹងពីកម្មវិធីទាំងអស់គ្នា ចំណែកទី២ គឺពិធីបើក-បិទ យើងរៀបចំជានីតិវិធី ជាលក្ខណៈបច្ចេកទេស តើត្រូវមានធនធានមនុស្សប៉ុន្មាននាក់? អ្នកជំនាញប៉ុន្មាននាក់? និងមានសម្ភារអ្វីខ្លះ ដើម្បីលើកគម្រោងចំណាយឱ្យបានច្បាស់លាស់ ព្រោះពិធីបើក-បិទ ត្រូវបង្ហាញពីវប្បធម៌ និងសក្តានុពលច្រើនយ៉ាងនៃកម្ពុជាជាម្ចាស់ផ្ទះ»។
ចំពោះចំណុចទី៣ លោក វ៉ាត់ ចំរើន និយាយថា ជាសេចក្តីរាយការណ៍របស់លោកផ្ទាល់តាមកិច្ចប្រជុំ កាលពីថ្ងៃ ១៧ ខែ កញ្ញា ឆ្នាំ ២០២១ ដោយក្រុមប្រឹក្សាអាស៊ីអាគ្នេយ៍បានសម្រេចឱ្យប្រទេសវៀតណាម កំណត់ពេលវេលាឱ្យបានច្បាស់លាស់ ដោយក្នុងនោះ ក្រុមប្រឹក្សាទុកពេលឱ្យប្រទេសវៀតណាម ត្រឹមខែតុលា។
អ្នកជំនាញកីឡារូបនេះ បានបញ្ជាក់ថា៖ «ក្នុងករណីវៀតណាម មិនអាចធ្វើពិធីស៊ីហ្គេមលើក៣១ បាន គឺកម្ពុជាត្រូវបន្តវេនជាប្រធាន ហើយតាមការប្រជុំជាមួយក្រុមប្រឹក្សាកីឡាអាស៊ីអាគ្នេយ៍ សមាជិកមិនរង់ចាំវៀតណាម ឱ្យហួសខែតុលា ឆ្នាំ ២០២១ នោះឡើយ ហេតុនេះបើម្ចាស់ផ្ទះវៀតណាមមិនធ្វើស៊ីហ្គេម គេសម្រេចផ្ទេរសិទ្ធិឱ្យកម្ពុជា ធ្វើជាម្ចាស់ផ្ទះតែម្តង ដោយមិនអាចរង់ចាំវៀតណាមនោះឡើយ»។
ចំណែកលោក ថោង ខុន ប្រធាន NOCC និងជាអនុប្រធានអចិន្រៃ្តយ៍ CAMSOC បានថ្លែងថា៖ «CAMSOC បន្តសកម្មភាពប្រជុំបច្ចេកទេសរៀងរាល់ថ្ងៃចន្ទ និងប្រជុំឆ្លងការអនុម័តជាមួយប្រធាន CAMSOC សម្តេចពិជ័យសេនា ទៀ បាញ់ នៅរៀងរាល់ថ្ងៃអង្គារ ជាមួយគណៈកម្មការជំនាញដើម្បីជំរុញការងាររៀបចំព្រឹត្តិកាណ៍ស៊ីហ្គេម ឆ្នាំ ២០២៣ ឱ្យបានរលូន តាមកម្មវិធីកំណត់ ទោះបីកូវីដ ១៩ នៅមិនទាន់ថមថយក៏ដោយ»៕
