ក្រុងម៉ាឌ្រីដ: កីឡាករ Luis Suarez ស៊ុតបញ្ចូលទី ២ គ្រាប់ ក្នុងនោះរួមទាំងគ្រាប់ជ័យជម្នះ នៅក្នុងម៉ោងបន្ថែមបង្គ្រប់ផងដែរ ខណៈដែលក្រុម Atletico Madrid បានវាយបកយកឈ្នះក្រុម Getafe ដែលសល់គ្នា ១០ នាក់ ២-១ ហើយឡើងទៅឈរ នៅលើកំពូលតារាងពិន្ទុនៃក្របខ័ណ្ឌ La Liga កាលពីថ្ងៃអង្គារ។
ក្រុមម្ចាស់ផ្ទះ Getafe មានគ្រាប់បាល់នាំមុខ តាមរយៈការតែតរបស់ខ្សែការពារ Stefan Mitrovic នៅនាទីចុងក្រោយនៃវគ្គទី១ តែហ្គេមចាប់ផ្ដើមប្រែប្រួល នៅពេលដែលខ្សែបម្រើ Carles Alena ត្រូវបានបណ្ដេញចេញនៅនាទីទី៧៤។
ក្រុមការពារជើងឯកលីគកំពូលអេស្ប៉ាញ Atletico ឥឡូវនេះ នាំមុខ ១ ពិន្ទុបណ្ដោះអាសន្នលើ ក្រុម Real Madrid ដែលត្រូវបើកទ្វារផ្ទះស្វាគមន៍ក្រុម Real Mallorca ក្នុងប្រកួតបន្ទាប់។
គ្រូបង្វឹករបស់ក្រុម Atletico លោក Diego Simeone បានប្រាប់ឱ្យដឹងថា៖ «នៅវគ្គទី១ យើងខ្វះការធ្វើចលនារុលទៅមុខ និងភាពស្វាហាប់ ហើយការប្រកួត គ្មានជីវិតជីវា៉ទាល់តែសោះ រហូតដល់កើតមានគ្រាប់បាល់របស់ក្រុមគូបដិបក្ខ។ នៅវគ្គទី២ ការប្រកួត មានចង្វាក់ល្អជាងមុន មានថាមពលជាងមុន ហើយយើងមានភាពអំណោយផលនៅតំបន់ប្រយុទ្ធជាងមុន»។
កីឡាករ Suarez ស៊ុតបញ្ចូលទីឱ្យក្រុម Atletico តាមស្មើនៅនាទីទី៧៨ មុននឹងតែតគ្រាប់ជ័យជម្នះនៅនាទីទី៩០+១ ហើយក៏ជាការធ្វើបានសម្រេចគ្រាប់ទី៣ នៅរដូវកាលនេះរបស់ខ្សែប្រយុទ្ធអន្តរជាតិអ៊ុយរូហ្គាយវ័យ ៣៤ ឆ្នាំ ដែលនេះជាការបង្ហាញខ្លួនលើកទី៣ ក្នុងចំណោម ៦ ហ្គេមដំបូង។
ចំណែកខ្សែប្រយុទ្ធ Antoine Griezmann នៅតែរកមិនទាន់ឃើញគ្រាប់បាល់ដំបូងនៅឡើយទេ បន្ទាប់ពីបានចូលលេង ៤ លើក គិតចាប់តាំងពីវិលមកចូលរួម ជាមួយក្លិប Atletico ជាថ្មីម្ដងទៀត ដោយការចាកចេញពីក្លិបរួមលីគ Barcelona។
«រូបគេកំពុងស្ថិត នៅក្នុងដំណាក់កាលសម្របខ្លួនជាមួយក្លិប Atletico ថ្មី ដែលលែងជាក្លិប Atletico ដែលគេធ្លាប់ស្គាល់ពីមុន។ ខ្ញុំមានជំនឿថា រូបគេនឹងរះឡើងវិញម្ដងទៀត ដូចពីមុន។ ខ្ញុំគ្មានអ្វីត្រូវសង្ស័យឡើយ»។ នេះជាការលើកឡើងរបស់លោក Simeone ដែលយោងដល់កីឡាករអន្តរជាតិបារាំង Griezmann។
ការប្រកួតនៅក្នុងថ្ងៃជាមួយគ្នានេះ ក្រុម Athletic Bilbao ចាញ់ក្រុម Rayo Vallecano ២-១ នៅទឹកដីខ្លួន ខណៈក្រុមភ្ញៀវ មានគ្រាប់បាល់ជ័យជម្នះ ដោយសារគ្រាប់បាល់ដំបូងរបស់ខ្សែប្រយុទ្ធចាស់វស្សាសញ្ជាតិកូឡុំប៊ី Radamel Falcao នៅនាទីទី៩០+៦៕ AFP/VN