ភ្នំពេញៈ កីឡាករជើងខ្លាំង បឺត សង្ឃឹម របស់ក្លិបប៉ែនកាក់គុនខ្មែរ មានការជឿជាក់ថា រូបគេនឹងអាចបន្តយកឈ្នះលើគូសត្រូវចាស់ សេក គឹមសាន នៅក្នុងការប្រកួតជម្រុះ ៨ នាក់ចុងក្រោយ នៅលើសង្វៀន PNN នាថ្ងៃអាទិត្យនេះ ដើម្បីឡើងទៅកាន់ការប្រកួតវគ្គពាក់កណ្តាលផ្តាច់ព្រ័ត្រដណ្តើមខ្សែក្រវាត់ ដែលមានប្រាក់រង្វាន់លេខ ១ ចំនួន ១ ម៉ឺនដុល្លារ។
បើទោះបីជា បឺត សង្ឃឹម មិនហ៊ានមើលរំលងពីការខិតខំប្រឹងប្រែងរបស់ សេក គឹមសាន ដែលបានឡើងមកដល់វគ្គ ៨ នាក់ចុងក្រោយនេះ ប៉ុន្តែរូបគេបានអះអាងថា គេបានដឹងចំណុចខ្សោយដៃគូម្នាក់នេះទៅហើយ ព្រោះនៅមុនការជួបគ្នា ក្នុងការប្រកួតខ្សែក្រវាត់នេះ បឺត សង្ឃឹម ធ្លាប់បានឈ្នះ សេក គឹមសាន ទាំង ៣ លើក ដោយឈ្នះពិន្ទុ ២ លើក និងវ៉ៃឱ្យសន្លប់ ១ លើក។
បឺត សង្ឃឹម បាននិយាយថា៖ «ខ្ញុំមិនអាចមើលស្រាលដៃគូបានទេ ព្រោះវគ្គនេះសុទ្ធតែសំខាន់ដូចគ្នា ដោយសារអ្នកចាញ់ នឹងអស់ឱកាស ហើយគេក៏ហាត់ យើងក៏ហាត់ អ៊ីចឹងខ្ញុំសង្ឃឹមត្រឹម ៦០ភាគរយប៉ុណ្ណោះ ប៉ុន្តែខ្ញុំធានាថា វាយអស់ពីសមត្ថភាព និងប្រយ័ត្នប្រយែងបំផុត។ បន្ថែមលើនេះ ខ្ញុំក៏ដឹងពីចំណុចខ្សោយរបស់គេដែរ តែសុំមិននិយាយ គឺបើមានឱកាស ខ្ញុំនឹងផ្តួលឱ្យសន្លប់តែម្តង ដោយគ្មានបន្ធូរដៃឱ្យទេ»។
ចំណែក លោក សេក គឹមស៊ន គ្រូបង្វឹក សេក គឹមសាន បានប្រាប់ថា៖ «ខាងខ្ញុំមានសង្ឃឹមឈ្នះ ៥០ ភាគរយដែរ ព្រោះ គឹមសាន្ត ហាត់បានពេញល្អណាស់ កម្លាំងក៏ល្អ។ យើងចាញ់ប្រៀបផ្នែកក្បាច់ជង្គង់របស់ បឺត សង្ឃឹម ប៉ុន្តែ សេក គឹមសាន អាចមានប្រៀបផ្នែកកណ្តាប់ដៃ និងកម្លាំងល្អជាង អ៊ីចឹងបើសិនមានឱកាសវាយកណ្តាប់ដៃ គឺសង្ឃឹមឈ្នះខ្ពស់តែម្តង។ ទោះយ៉ាងណា វានៅលើការប្រកួតជាក់ស្តែងទេថា តើមានឱកាសចេញស្នៀតអ្វី?»។
គ្រូបង្វឹករូបនេះបានបន្ថែមថា៖ «ខ្ញុំមិនហ៊ានអួតទេ ព្រោះយើងធ្លាប់ចាញ់គេ ចំនួន៣លើកគឺពិតជាយ៉ាប់ឈ្នះមែន។ គឹមសាន មានចំណុចខ្សោយ ត្រង់ថា វាយគេចូលគោលដៅល្អ មានប្រៀបហើយ តែវាល្ងង់ មិនចេះស្ទុះទៅតាមបន្ថែមសោះ ហើយចំណុចនេះហើយ ដែលខ្ញុំគិតថាលំបាក ព្រោះបើវ៉ៃចូលកណ្តាប់ដៃហើយ រួចចូលបន្ថែម គឺមានផ្លូវឈ្នះតែម្តង»។
ក្រៅពីការប្រកួតគូដណ្តើមខ្សែក្រវាត់នេះ ក៏មានការប្រកួតគូដ៏ចាប់អារម្មណ៍មួយទៀតផងដែរ គឺការប៉ះគ្នារវាងអ្នកលេងកណ្តាប់ដៃ ថៃ រិទ្ធី និង ឈឿង ល្វៃ ក្នុងទម្ងន់ ៧២ គីឡូក្រាម ហើយតាមលោក ធន់ សុភា ជាគ្រូបង្វឹក បានឱ្យដឹងថា ២ នាក់នេះ ធ្លាប់ជួបគ្នា ៤ លើកមកហើយ ក្នុងនោះ ថៃ រិទ្ធី ឈ្នះ ៣ លើក ចំណែក ឈឿង ល្វៃ ឈ្នះ ១ លើក ខណៈការប្រកួតចុងក្រោយថ្មីៗនេះ ឈឿង ល្វៃ ត្រូវបាន ព្រំ សំណាង វ៉ៃឱ្យសន្លប់ត្រឹមទឹកទី២ ចំណែក ថៃ រិទ្ធី បានចាញ់ពិន្ទុ ឡៅ ចន្ទ្រា៕