ក្រុងម្រ៉ាឌីដ: កីឡាករ Marco Asensio ធ្វើបានហ៊ែតទ្រីក (ស៊ុត ៣ គ្រាប់) ជាលើកដំបូងឱ្យក្រុមអធិរាជស Real Madrid អំឡុងការប្រកួត កាលពីថ្ងៃពុធ ទល់នឹងក្រុម Mallorca ជាក្លិប ដែលគេធ្លាប់លេងជាមួយ កាលពីកុមារភាព ខណៈដែលជ័យជម្នះ ៦-១ បានជួយរុញក្រុមយក្សក្រុងម្រ៉ាឌីដមួយនេះ ឡើងទៅឈរទី១ ក្នុងតារាងពិន្ទុនៃក្របខ័ណ្ឌ La Liga។
ខ្សែប្រយុទ្ធ Karim Benzema ស៊ុតគ្រាប់បាល់បើកឆាកឱ្យក្រុមម្ចាស់ផ្ទះយ៉ាងលឿន សម្រាប់ការប្រកួតនៅកីឡដ្ឋាន Santiago Bernabeu នេះ មុនពេលមានគ្រាប់បាល់៣គ្រាប់កើតឡើងបន្តបន្ទាប់គ្នា ក្នុងរយៈពេលប្រមាណជា ៥ នាទី ជួយឱ្យក្រុម Real នាំមុខ ៣-១ នៅវគ្គទី១ ដោយ ២ គ្រាប់ជាការស៊ុតរបស់ Asensio រីឯ ១ គ្រាប់ទៀត ជាការធ្វើបានសម្រេចពី Lee Kang-in របស់ក្រុម Mallorca។
ចូលដល់វគ្គទី២ នៅនាទីទី៥៥ ខ្សែបម្រើសញ្ជាតិរបស់អេស្ប៉ាញ Asensio ធ្វើបានសម្រេចគ្រាប់ទី៣ ជាមួយការសាកស៊ុតពីក្រៅតំបន់គ្រោះថ្នាក់ ហើយកីឡាករ Benzema មានឱកាសស៊ុតគ្រាប់ទី២ នៅនាទីទី៧៨ ដែលជាគ្រាប់ទី២០០ នៅ La Liga របស់កីឡាករអន្តរជាតិបារាំង មុនពេល Isco ទម្លុះសំណាញ់ទីឱ្យក្រុម Real ឈ្នះផ្លូវការ ៦-១។
ក្រោយការប្រកួតចប់ គ្រូបង្វឹករបស់ក្រុម Real លោក Carlo Ancelotti បានពោលសរសើរកីឡាករ Benzema ថា៖«ច្បាស់ណាស់ Benzema កំពុងលេងបានល្អណាស់។ មិនត្រឹមតែសម្រាប់គេខ្លួនឯងប៉ុណ្ណោះទេ តែថែមទាំងសម្រាប់ក្រុមដែរ។ គេគឺជាខ្សែប្រយុទ្ធម្នាក់គ្រប់លក្ខណៈយ៉ាងពិតប្រាកដមែន»។
ជ័យជម្នះក្នុងហ្គេមទី៦ នេះ បានធ្វើឱ្យក្រុម Real មាន ២ ពិន្ទុ នាំមុខដាច់លើក្រុមការពារជើងឯក Atletico Madrid ដែលមាន ១៤ ពិន្ទុ ក្នុងតារាងពិន្ទុ La Liga ខណៈដែលក្រុម Sevilla ឡើងទៅលេខ ៣ ក្រោយឈ្នះក្រុម Valencia ៣-១។
សម្រាប់ Asensio ដែលកើតនៅក្រុងប៉ាល់ម៉ា ចាប់ផ្ដើមចូលលេងឱ្យក្រុម Mallorca ក្នុងវ័យ ១០ ឆ្នាំ ស្រាប់តែចាកចេញទៅចូលរួម ជាមួយក្រុមបច្ចុប្បន្នរបស់ខ្លួន ក្នុងឆ្នាំ ២០១៦។ រូបគេមិនធ្វើការអបអរអ្វីឡើយសម្រាប់ការ-ទម្លុះសំណាញ់ទី៣ គ្រាប់នេះ។
«Asensio ធ្វើបានល្អណាស់។ វាជាការពិត ដែលថា ការលេងរបស់គេក្នុងតំណែងនោះ អាចធ្វើឱ្យកីឡាកររបស់ក្រុមគូប្រជែងឈឺចាប់បានគ្រប់ពេល»។ នេះជាការលើកឡើងរបស់លោក Ancelotti ដែលទើបដាក់ឱ្យកីឡាករវ័យ ២៥ ឆ្នាំ Asensio ចូលលេងជម្រើសដំបូង លើកទី១ រដូវកាលនេះ៕ AFP/VN