ភ្នំពេញៈ កីឡាករជើងខ្លាំង ឃីម បូរ៉ា ដែលរកដៃគូប្រកួតលែងចង់បាន នៅក្នុងប្រភេទទម្ងន់ ៦០ គីឡូក្រាមនោះ បានសម្រេចដំឡើងទម្ងន់មក ៦៣,៥ គ.ក្រ ដើម្បីចូលរួមការប្រកួតដណ្តើមប្រាក់លាន នៅលើសង្វៀនថោន នាថ្ងៃអាទិត្យ ខាងមុខនេះ ជាមួយអ្នកប្រដាល់ឆ្នើម ៣ នាក់ទៀត មាន វេង សុភ័ក្រ, តាញ់ មករា និង អេលីត សម្ភស្ស។
អ្នកប្រដាល់ទាំង ៤ រូបនេះ ត្រូវគេមើលឃើញថា ជាជម្រើសខ្លាំងលំដាប់ជួរមុខ ដែលលំបាកសន្និដ្ឋានថា កីឡាកររូបណាមានប្រៀបជាងណាស់ ប៉ុន្តែតាមរយៈប្រវត្តិជួបគ្នានៅក្នុងប្រភេទទម្ងន់ ៦០ គីឡួក្រាម ទាំង វេង សុភ័ក្រ និង តាញ់ មករា សុទ្ធតែធ្លាប់ចាញ់ ឃីម បូរ៉ា តែ អេលីត សម្ភស្ស មិនធ្លាប់ជួបជាមួយ បូរ៉ា កន្លងមកនោះទេ ព្រោះ សម្ភស្ស ជាអ្នកប្រដាល់សកល តែដោយសារវិបត្តិគ្មានទីផ្សារប្រកួត ទើបសុំគេ មកប្រកួតគុនខ្មែរ ម្តងម្កាល យកប្រាក់ទៅផ្គត់ផ្គង់គ្រួសារ។
តែទោះបីជាយ៉ាងណា ភាគី ឃីម បូរ៉ា ដែលជាគ្រូបង្វឹក និងជាឪពុកបង្កើតរបស់ ឃីម បូរ៉ា បានបង្ហាញការបារម្ភថា៖ «ការប្រកួតលើកនេះ បូរ៉ា ពិតជាលំបាកទប់ទល់ណាស់ ព្រោះដំឡើងទម្ងន់មកវ៉ៃ ៦៣,៥ គីឡូក្រាមនេះ គឺជួបបញ្ហាច្រើនផ្នែកកម្លាំងនេះតែម្តង ខណៈកាលពីប្រកួតក្នុងទម្ងន់ ៦០ គីឡូក្រាម បូរ៉ា ធ្លាប់បានផ្តួល តាញ់ មករា ឱ្យសន្លប់ និងធ្លាប់ឈ្នះពិន្ទុ វេង សុភ័ក្រ តែមិនធ្លាប់ប៉ះជម្រើសជាតិប្រដាល់សកល អេលីត សម្ភស្ស នោះឡើយ»។
គ្រូបង្វឹកជម្រើសជាតិប្រដាល់គុនខ្មែរ លោក ហេង ប៊ុនឃីម បានបញ្ជាក់ថា៖ «បូរ៉ា បានហ្វឹកហាត់គ្រប់គ្រាន់ បំប៉នបច្ចេកទេសបន្ថែមបានល្អ ប៉ុន្តែបញ្ហាកម្លាំង ពិតជាលំបាកទប់ទល់ជាមួយកីឡាករ៣នាក់នេះណាស់ ព្រោះគេនៅក្មេងកម្លាំងល្អជាង ហេតុនេះយើងសង្ឃឹមឈ្នះត្រឹមតែ ៥០ ភាគរយប៉ុណ្ណោះ»។
ចំណែក អេលីត សម្ភស្ស បានប្រាប់ថា៖ «នៅតាមបណ្តាញហ្វេសប៊ុក គេមើលរំលងខ្ញុំ ដោយភាគច្រើនគេ សម្លឹងឃើញ ឃីម បូរ៉ា, តាញ់ មករា និង វេង សុភ័ក្រ ប៉ុន្តែខ្ញុំគិតថា គាត់មិនទាន់ដឹងពីការហាត់ និងបច្ចេកទេសរបស់ខ្ញុំ ឡើងដល់កម្រិតណាទេ។ ខ្ញុំធ្លាប់ចាញ់ពិន្ទុ សូត្រ ប៊ុនធី សម្រាប់ការចូលរួមប្រកួត ក្នុងកម្មវិធីនេះ កន្លងមក ចំណែកបេក្ខភាព៣នាក់លើកនេះ អ្នកដែលលំបាកប្រកួតបំផុតគឺ តាញ់ មករា ប៉ុន្តែខ្ញុំចង់ប៉ះគាត់មុនគេ»។
ចំណែកលោក ធន់ សុភា គ្រូបង្វឹក តាញ់ មករា និងលោក ឡៅ ស៊ីណាត គ្រូបង្វឹករបស់ វេង សុភ័ក្រ សុទ្ធតែមានជំនឿរៀងៗខ្លួនថា កូនសិស្សរបស់លោក នឹងឈ្នះក្នុងទំនុកចិត្ត ៧០ ភាគរយដូចគ្នា។ ចំណែកប្រវត្តិប្រកួតរបស់អ្នកប្រដាល់ទាំង ៤ នេះ វេង សុភ័ក្រ ប្រកួតបាន ៧៩ ដងឈ្នះ ៦៤ ចាញ់ ១៣ និងស្មើ ២ ដង រីឯ បូរ៉ា ប្រកួតបាន ១២៩ ដង ឈ្នះ ៩១ ចាញ់ ៣៦ និងស្មើ ២ ដង ហើយ អេលីត សម្ភស្ស ប្រកួតបាន ៣៦ ដង ឈ្នះ ២៥ ចាញ់ ៩ ស្មើ ២ ដង ខណៈ តាញ់ មករា ប្រកួតបាន ៦៨ ឈ្នះ ៥៤ ចាញ់ ១២ និងស្មើ ២ ដង។
ដោយឡែក សម្រាប់គូម៉ាសហ្វៃ ចំនួន ៩ នាទី រវាងកីឡាករ ភួន ឡាំងកូស៊ីន និងជើងថ្មីល្បីល្បាញ ពេជ្រ សម្បត្តិ វិញ បានបោះសម្តីឌឺដងដាក់គ្នាល្បីពេញហ្វេសប៊ុក។ ពេជ្រ សម្បត្តិ ដែលមានប្រវត្តិក្មេងខ្ចីនិយាយថា ចង់ផ្តួល ឡាំងកូស៊ីន ឱ្យសន្លប់ ប៉ុន្តែ ឡាំងកូស៊ីន តបវិញថា មិនអាចទៅរួចទេ! អាចឈ្នះចាញ់ដោយសន្លប់ ប៉ុន្តែមិនទាន់ប្រាកដថា នរណានៅឡើយ៕