ភ្នំពេញៈ លោក ស៊ន អេលីត អ្នកគ្រប់គ្រងក្លិបប្រដាល់នាយកដ្ឋានអង្គរក្ស បានផ្តួចផ្តើមគំនិតបង្កើតព្រឹត្តិការណ៍ប្រកួតប្រដាល់ពន្លកគុនខ្មែរ សម្រាប់កីឡាករទម្ងន់ស្រាលវ័យក្មេង ទម្ងន់ ៤៥ គីឡូក្រាម និងបានចាប់ផ្តើមបរិច្ចាគដំបូង នូវថវិកាគាំទ្រចំនួនជាង ៣ ០០០ ដុល្លារ ដើម្បីយកទៅរៀបចំខ្សែក្រវាត់ឱ្យក្មេងៗប្រកួត ដែលចាប់ផ្ដើមវគ្គជម្រុះ តាំងពីថ្ងៃទី ២០ ខែ កញ្ញា ឆ្នាំ ២០២១ មកម្ល៉េះ។
កម្មវិធីប្រកួតនេះ គ្រោងនឹងប្រកួត៣លើក ឬ ៣ សប្តាហ៍ ដែលនឹងបញ្ចប់នៅថ្ងៃទី ២៧ តុលា ឆ្នាំ ២០២១ ជាមួយកម្មវិធីប្រដាល់គុនខ្មែរអលស្តារ តែម្តង។ លោក ស៊ន អេលីត ដែលជាអ្នកផ្តើមគំនិត បានប្រាប់ថា៖ «កម្មវិធីនេះ យើងរៀបចំឡើងដើម្បីគាំទ្រប្រដាល់ពន្លកគុនខ្មែរ ដោយមានការប្រកួតជម្រុះទាំង ២ ពូល (A និង B) ដោយក្នុង ១ ពូល មានកីឡាករ ៤ នាក់ ហើយជម្រុះយកអ្នកឈ្នះ ២ នាក់ ក្នុងពូលនីមួយៗ ទៅជម្រុះបន្ត និងយកតែ ២ នាក់ទេ ទៅវគ្គផ្តាច់ព្រ័ត្រ ជាមួយកម្មវិធីប្រដាល់ធំ គុនខ្មែរអលស្តារតែម្តង»។
លោកបន្តថា តាមកម្មវិធីប្រកួតប្រដាល់ពន្លកគុនខ្មែរនេះ បានរៀបចំកាលពីថ្ងៃទី ២០ ខែកញ្ញា ម្តងរួចហើយ ដែលជាការប្រកួតពូល A ហើយលើកនេះ បន្តរៀបចំការប្រកួតពូល B នៅថ្ងៃទី ២៧ ខែកញ្ញា រួចបន្តទៅវគ្គពាក់កណ្តាលផ្តាច់ព្រ័ត្រនៅថ្ងៃទី ១១ ខែតុលា នឹងឈានទៅវគ្គផ្តាច់ព្រ័ត្រ ជាមួយកម្មវិធីគុនខ្មែរអលស្តារ នៅថ្ងៃទី ២៧ ខែ តុលា ឆ្នាំ ២០២១។
យ៉ាងណាក៏ដោយ ពាក់ព័ន្ធ នឹងការចំណាយ លោក ស៊ន អេលីត បញ្ជាក់ថា៖ «ថវិកាដែលទទួលបាននៅពេលនេះ គឺរៀបចំមិនគ្រប់គ្រាន់នោះទេ ប៉ុន្តែខ្ញុំ និងក្រុមការងារ បានព្យាយាមរកក្រុមហ៊ុនឧបត្ថម្ភបន្ថែមទៀត ក្នុងការប្រកួតជម្រុះនេះទម្រាំដល់ថ្ងៃប្រកួតផ្ដាច់ព្រ័ត្រ។ តាមគម្រោង យើង ៤ លានរៀល ដល់អ្នកទទួលបានខ្សែក្រវាត់ ចំណែកអ្នកលេខ ២ នឹងទទួលបាន ១ លានរៀល តែពេលនេះកំពុងស្វែងរកបន្ថែមនៅឡើយ អ៊ីចឹងបើមានការឧបត្ថម្ភ គឺជួយតាមនឹងទៀត»។
តាមកម្មវិធីប្រកួតពន្លកគុនខ្មែរ នៅសប្តាហ៍នេះមានការប្រកួតសរុបចំនួន ៦ គូ ដែលក្នុងនោះ មានគូជម្រុះខ្សែក្រវាត់ចំនួន ២ គូ រវាងកីឡាករ វី គឹមរៀង មកពីក្លិបរស្មីភូមិគាបខេត្តបន្ទាយមានជ័យ ជាមួយនឹងកីឡាករ ឆូយ សុថាត់ មកពីក្លិបសៅយ៉ាន់នាគាខេត្តបន្ទាយមានជ័យ រួមទាំងកីឡាករ ណាង សុវណ្ណ របស់ក្លិបកងចក្ររាជសីហ៍ ដែលត្រូវប្រកួតជាមួយកីឡាករ វង្ស ឆៃវ៉ាន់ មកពីខេត្តសៀមរាប៕