.jpg)
កាន់ ម៉េងហុង ពេលឈ្នះប្រាក់លាន នៅសង្វៀន CNC។ រូប សហការី
ភ្នំពេញៈ កីឡាករវ័យក្មេង កាន់ ម៉េងហុង របស់ក្លិបនាគរាជចតុមុខ បាននិងកំពុងធ្វើឱ្យកេរ្តិ៍ឈ្មោះរបស់ខ្លួនឯង កាន់តែមានភាពលេចធ្លោខ្លាំងឡើង បន្ទាប់ពីល្បីឈ្មោះជាលើកដំបូង ក្រោយឈ្នះមេដាយមាស លើការប្រកួតជម្រើសជើងឯកថ្នាក់ជាតិ ឆ្នាំ ២០២០ ក្នុងប្រភេទទម្ងន់ ៥១ គីឡូក្រាម ដោយធ្វើឱ្យកីឡាករឆ្នើម ខេម ចាន់ មកពីក្លិបបញ្ជាការដ្ឋានទ័ពពិសេស ដែលជាជើងខ្លាំង ចាញ់នៅវគ្គផ្តាច់ព្រ័ត្រ។
កីឡាករប្រដាល់គុនខ្មែរ កាន់ ម៉េងហុង ជាកូនកសិករមានជីវភាពក្រីក្រមួយ ស្ថិតនៅភូមិប៉ារ៉ុង ឃុំប៉ារ៉ុង ស្រុកល្វាឯម ខេត្តកណ្តាល។ ប៉ុន្តែចូលប្រឡូកក្នុងវិស័យប្រដាល់ ក្នុងរយៈពេលខ្លី ម៉េងហុង បានប្រែខ្លួនលឿនបំផុត ដោយឈ្នះការប្រកួតជម្រើសជើងឯកថ្នាក់ជាតិ ឆ្នាំ ២០២០ និងដណ្តើមបានឱកាសជាកីឡាករជម្រើសជាតិប្រដាល់គុនខ្មែរក្នុងឆ្នាំ ២០២១ នេះ។
តាមស្ថិតិផ្លូវការ កីឡាករកើតនៅថ្ងៃ ១២ ខែ មិថុនា ឆ្នាំ ២០០២ កាន់ ម៉េងហុង មានកម្ពស់ ១,៦៥ ម៉ែត្រ ធ្លាប់ប្រកួតបាន ៦៧ លើក ឈ្នះ ៤៥ ចាញ់ ១២ និងស្មើ ១០ ដង ក្នុងនោះផ្តួលដៃគូឱ្យសន្លប់បានចំនួន ១៥លើក។
លោក ហួរ ប៉េងលាភ អ្នកមើលការខុសត្រូវក្នុងក្លិបនាគរាជចតុមុខបាននិយាយថា៖ «សិស្សឆ្នើមវ័យក្មេងបំផុត មាន ២ រូប ដែលសុទ្ធតែបានជាប់ជាកីឡាករជម្រើសជាតិ គឺកីឡាករ រិន ដាវីត ក្នុងទម្ងន់ ៥៤ គីឡូក្រាម ជាសិស្សច្បង និង កាន់ ម៉េងហុង នេះ តាមពីក្រោយ ដោយជាប់ជម្រើសជាតិ ក្នុងប្រភេទទម្ងន់ ៥១ គីឡូក្រាម ប៉ុន្តែបើនិយាយពីបច្ចេកទេសបច្ចុប្បន្ននេះ កាន់ ម៉េងហុង ដើរជិតទាន់សិស្សច្បង រិន ដាវីត ហើយ»។
សម្រាប់ការប្រកួត៣លើកចុងក្រោយ កន្លងមកនេះ កាន់ ម៉េងហុង ធ្វើបានល្អបំផុត ដោយឈ្នះទាំងអស់ និងរកប្រាក់បានទាំងកម្មវិធីដណ្ដើមប្រាក់លាន សរុប ១ ២៥០ ដុល្លារ សម្រាប់ជួយគ្រួសារ។ ចំពោះការប្រកួត៣លើកចុងក្រោយនេះ ម៉េងហុង បានឈ្នះកីឡាករ យ៉ន ពិសី មកពីក្លិបសាលវ័ន្តកីឡា រួចបន្តឈ្នះ ពេជ្រ ប៊ុនសិដ្ឋ មកពីក្លិបចលនាយុវជន ១៥៧ និង លើកទី៣ ឈ្នះ ធន់ ស៊ីហុង មកពីសមាគមប្រដាល់កងយោធពលខេមរភូមិន្ទ។
លោក ហួរ ប៉េងលាភ បានបញ្ជាក់ថា៖ «បើសរុបទាំងតម្លៃខ្លួន និងប្រាក់លាន ដែល កាន់ ម៉េងហុង ទទួលបានពេល-ប្រកួត នៅសង្វៀន CNC សរុបទៅ ១ ២៥០ ដុល្លារ ចំណែកការរស់នៅ ហូបចុក និងការហ្វឹកហាត់ កីឡាករ ម៉េងហុង មានចរិត និងសីលធម៌រស់នៅល្អណាស់»។
បើរំឭកពីប្រវត្តិប្រកួតកន្លងមក កាន់ ម៉េងហុង ជាកីឡាករចំណូលថ្មី និងកំពុងសាងកេរ្តិ៍ឈ្មោះល្បីលើវិស័យប្រដាល់គុនខ្មែរ រូបគេមានប្រវត្តិឈ្នះ ហ៊ឹម សេរី ធ្លាប់ស្មើជាមួយកីឡាករសែន រ៉ាដេត នៅ Mas Fight និងឈ្នះ យ៉ន ពិសី ឈ្នះ ពេជ្រ ប៊ុនសិដ្ឋ និងឈ្នះ ធន់ ស៊ីហុង ថ្មីៗនេះ នៅសង្វៀន CNC។ សម្រាប់អនាគត កាន់ ម៉េងហុង បានបញ្ជាក់តាមរយៈគ្រូបង្វឹកថា រូបគេចង់ចូលរួមប្រកួតអន្តរជាតិ និងចង់ជាប់ជាមន្ត្រីប៉ូលិសដូចបងៗជំនាន់មុនផងដែរ៕
