ភ្នំពេញៈ កីឡាករជាយុវជនវ័យក្មេងអាយុ ២១ ឆ្នាំ យ៉ាតពិទូ ចាន់ទិវា ដែលបានជាប់ជាក្រុមជម្រើសជាតិ តាំងពីឆ្នាំ ២០១៧ ក្នុងក្រុមថ្នាល ដោយធ្លាប់លេងក្នុងវិញ្ញាសាចំនួន ៣ មានរត់ល្បឿន ១០០ ម៉ែត្រ ២០០ ម៉ែត្រ និង ៤០០ ម៉ែត្រនោះ បច្ចុប្បន្នបានហ្វឹកហាត់សម្រួចតែលើជំនាញរត់ល្បឿន ៤០០ ម៉ែត្រទេ បន្ទាប់ពីរូបគេបានដាក់ឱ្យចូលនៅក្នុងក្រុមធំជម្រើសជាតិ នៃប្រភេទកីឡាអត្តពលកម្ម។
យ៉ាតពិទូ ចាន់ទិវា បាននិងកំពុងហ្វឹកហាត់យកជំនាញរត់ល្បឿន ៤០០ ម៉ែត្រនេះ ដើម្បីសម្រួចសម្រាំងបច្ចេកទេសឱ្យបានល្អ ត្រៀមព្រឹត្តិការណ៍អន្តរជាតិនានា ជាពិសេសការប្រកួតស៊ីហ្គេម លើកទី៣១ ឆ្នាំ ២០២១ នៅវៀតណាម ដែលបានលើកពេលទៅធ្វើនៅឆ្នាំ ២០២២ និងស៊ីហ្គេម លើកទី៣២ ឆ្នាំ ២០២៣ ពេលកម្ពុជាធ្វើម្ចាស់ផ្ទះ ខណៈ យ៉ាតពិទូ ចាន់ទិវា ជាបេក្ខភាពមួយដ៏ល្អ មានសក្តានុពល ព្រមទាំងឆ្លងកាត់ការប្រកួតថ្នាក់ជាតិ និងអន្តរជាតិផងដែរ។
ជាមួយគ្នានេះ ចាន់ទិវា ក៏ជាបេក្ខភាពម្នាក់ ក្នុងចំណោមបេក្ខភាពទាំង ១៥ នាក់ ដែលសហព័ន្ធខ្មែរអត្តពលកម្មស្ម័គ្រចិត្ត សម្រិតសម្រាំងរួចហើយ សម្រាប់ការត្រៀមចេញទៅហ្វឹកហាត់នៅសាធារណរដ្ឋប្រជាមានិតចិនផងដែរ ដោយរូបគេបានជ្រើសយកវិញ្ញាសា ៤០០ ម៉ែត្រនេះតែម្តង។
កញ្ញា កែវ មនោរម្យ ជាអគ្គលេខាធិការសហព័ន្ធខ្មែរអត្តពលកម្មស្ម័គ្រចិត្ត បាននិយាយថា៖«អត្តពលិករត់ចម្ងាយ យ៉ាតពិទូ ចាន់ទិវា ជាបេក្ខភាពវ័យក្មេងឆ្នើម ធ្លាប់ទទួលបានជយលាភី ចំនួន ៣ វិញ្ញាសាមាន ១០០ ម៉ែត្រ ២០០ ម៉ែត្រ និង ៤០០ ម៉ែត្រ ដោយរូបគេបានជាប់ជយលាភីលេខ ១ ថ្នាក់ជាតិ តាំងពីឆ្នាំ ២០១៧ រៀងមករហូត ហើយបន្ថែមពីលើនេះ ចាន់ទិវា ក៏ ធ្លាប់ចេញទៅប្រកួតលក្ខណៈអន្តរជាតិនៅក្រៅប្រទេសចំនួន ៣ ព្រឹត្តិការណ៍ផងដែរ»។
កញ្ញា មនោរម្យ បានបន្ថែមថា៖ «សម្រាប់ការជ្រើសរើសវិញ្ញាសាជាជំនាញឯកទេស គឺសហព័ន្ធបានផ្តល់ឱកាសឱ្យ យ៉ាតពិទូ ចាន់ទិវា ចាប់យកជំនាញចម្ងាយ ៤០០ ម៉ែត្រតែម្តង ដើម្បីចេញទៅហ្វឹកហាត់តាមកម្មវិធីរបស់រាជរដ្ឋាភិបាលកម្ពុជា និងមហាមិត្តចិន ក្នុងពេលឆាប់ៗនេះ ព្រោះអត្តពលិកម្នាក់ត្រូវចាប់យកជំនាញតែ ១ វិញ្ញាសា ហើយក្រៅពីនេះ អាចលេងវិញ្ញាសាផ្សេងៗបន្ថែមទៅតាមកម្មវិធីរបស់គេ»។
ចំណែកលោក សំហេង បុរស ប្រធានសហព័ន្ធខ្មែរអត្តពលកម្មស្ម័គ្រចិត្ត បានប្រាប់ថា៖ «យើងមានផែនការយុទ្ធសាស្ត្រ និងទស្សនៈវែងឆ្ងាយ ក្នុងការជំរុញលើកទឹកចិត្ត ដោយផ្តោតទៅលើអត្តពលិកវ័យក្មេង សម្រាប់ព្រឹត្តិការណ៍ខាងមុខ គឺយើងមានការហ្វឹកហាត់អភិវឌ្ឍសមត្ថភាពឈានទៅប្រជែងដណ្តើមមេដាយជូនកម្ពុជា ដូចជាការប្រកួតកីឡាជាតិ លើកទី៣ ឆ្នាំ ២០២២, ការប្រកួតស៊ីហ្គេមនៅវៀតណាម ឆ្នាំ ២០២២ និងស៊ីហ្គេម លើក៣២ ដែលកម្ពុជាធ្វើម្ចាស់ផ្ទះ»។
ចំណែក យ៉ាតពិទូ ចាន់ទិវា បាននិយាយថា៖«សម្រាប់ការប្រកួតថ្នាក់ជាតិ ខ្ញុំទទួលបានមេដាយមាសរាល់ឆ្នាំ តាំងពីឆ្នាំ ២០១៧ ហើយកន្លងមក ខ្ញុំធ្លាប់បានចូលរួមប្រកួត នៅក្នុងព្រឹត្តិការណ៍អន្តរជាតិបានចំនួន ៣ លើកហើយ ដោយទទួលបានចំណាត់លេខ ៦ និងលេខ ៧ ក្នុងវគ្គជម្រុះផងដែរ»។
«ការប្រកួតលើកទី១ នៅប្រទេសជប៉ុន ឆ្នាំ ២០១៨ ក្នុងព្រឹត្តិការណ៍ជើងឯកយុវជន លើវិញ្ញាសា ២០០ ម៉ែត្រ ដែលមាន ៤៥ ប្រទេសចូលរួមនោះ ខ្ញុំបានបំបែកឯតទគ្គកម្ម ខ្លួនឯង ដោយប្រើពេល ២៣:៣១ វិនាទី ចំណែកលើកទី២ នៅក្នុងព្រឹត្តការណ៍សិស្សនិស្សិតអាស៊ាន នៅប្រទេសម៉ាឡេស៊ី ចុងឆ្នាំ ២០១៨ គឺខ្ញុំបានលេងទាំង៣០០ម៉ែត្រ និង ៤០០ ម៉ែត្រ ហើយលើកទី៣ ខ្ញុំបានចូលរួមការប្រកួតលក្ខណៈបើកទូលាយ នៅប្រទេសថៃ គឺលទ្ធផលដែលខ្ញុំទទួលបាន គឺមានការរីកចម្រើនជាងពេលមុនៗ»។ កីឡាករ យ៉ាតពិទូ ចាន់ទិវា បានបន្ថែម។
កីឡាករ យ៉ាតពិទូ ចាន់ទិវា ដែលជាពន្លកនៃក្តីសង្ឃឹមក្នុងវិញ្ញាសាចម្ងាយ ៤០០ ម៉ែត្រមានស្រុកកំណើតក្នុងរាជធានីភ្នំពេញ ដែលមានឪពុកម្តាយជាអ្នកបោកគក់ខោអាវ ហើយប្អូនស្រីរបស់គេ យ៉ាតពិទូ សិរិវឌ្ឍនា និង យ៉ាតពិទូ សុខសិរិលក្ខិណា ក៏ជាអ្នកលេងកីឡាដែរ ក្នុងនោះ សិរិវឌ្ឍនា ធ្លាប់បានលេខ ១ ក្នុងការប្រកួតកីឡាដើរ នាងលេងឱ្យមន្ទីរអប់រំ យុវជន និងកីឡារាជធានីភ្នំពេញ។
យ៉ាតពិទូ ចាន់ទិវា បញ្ជាក់ថា៖ «ពេលនេះ ខ្ញុំកំពុងប្រមូលផ្តុំហ្វឹកហាត់នៅពហុកីឡដ្ឋានជាតិមរតកតេជោ និងត្រៀមចេញទៅហ្វឹកហាត់ នៅចិនទៀត ហើយខ្ញុំនឹងខិតខំប្រឹងហាត់ ដើម្បីប្រជែងដណ្តើមមេដាយជូនសហព័ន្ធឱ្យបាន។ ខ្ញុំរំពឹងជឿជាក់ថា ការជួយជំរុញពីគ្រូបង្វឹក និងការផ្តល់កម្លាំងចិត្តគាំទ្រពីថ្នាក់ដឹកនាំ ជាពិសេសឯកឧត្តម សំហេង បុរស នឹង ជួយឱ្យពួកខ្ញុំទទួលបានជោគជ័យពីការប្រកួតនានានៅលើឆាកអន្តរជាតិ សម្រាប់ជាកិត្តិយសជូនខ្លួនឯង និងក្រុមគ្រួសារ ជាពិសេសជូនប្រទេសជាតិកម្ពុជាទាំងមូល»៕