.jpg)
Maupay (កណ្ដាល) ស៊ុតឱ្យ Brighton ស្មើ Crystal ១-១ អំឡុងការប្រកួត នៅ Premier League កាលពីថ្ងៃចន្ទ។ AFP
ក្រុងឡុងដ៍: ខ្សែប្រយុទ្ធ Neal Maupay ស៊ុតបញ្ចូលទីនៅវិនាទីចុងក្រោយ ដើម្បីជួយស្រោចស្រង់ Brighton & Hove Albion ឱ្យដណ្ដើមបាន ១ពិន្ទុ ដោយការតាមស្មើក្រុមគូប្រជែងស្លាប់រស់ Crystal Palace ១-១ ពីការប្រកួត នៅក្របខ័ណ្ឌ Premier League កាលពីថ្ងៃចន្ទ។
ដោយតាមពីក្រោយគ្រាប់បាល់របស់ក្រុមម្ចាស់ផ្ទះ Crystal ដែលបានមកពីការស៊ុតបាល់ពិន័យ ១១ម៉ែត្ររបស់ខ្សែប្រយុទ្ធ Wilfried Zaha នៅវគ្គទី ១ ក្រុម Brighton បានគេចផុតពីបរាជ័យ ក្នុងទម្រង់ដ៏គួរឱ្យកត់សម្គាល់បំផុតជាមួយនឹងគ្រាប់បាល់នៅនាទីទី៩០+៥។
ជាមួយនឹងការនៅសល់តែប៉ុន្មានវិនាទីទៀតប៉ុណ្ណោះ សម្រាប់ការប្រកួត នាកីឡដ្ឋាន Selhurst Park ខ្សែប្រយុទ្ធសញ្ជាតិបារាំង Maupay បានដាក់ទោសចំពោះការផ្ដាច់បាល់មិនបានល្អរបស់អ្នកចាំទី Vicente Guaita ដែលជាលទ្ធផលធ្វើឱ្យក្រុម Crystal ស្រឡាំងកាំង។
ក្រុម Brighton គឺជាកញ្ចប់រង្វាន់ដ៏គួរឱ្យភ្ញាក់ផ្អើលសម្រាប់រដូវកាលនេះ ហើយការអាចមានជ័យជម្នះពីជំនួបរវាងក្រុមនៅក្រុងឡុងដ៍ភាគខាងត្បូងនេះ នឹងរុញឱ្យពួកគេឡើងទៅឈរទី ១ ក្នុងតារាងពិន្ទុរបស់លីគកំពូលលើកដំបូងជាប្រវត្តិសាស្ត្ររបស់ក្លិប ក្នុងរយៈពេល ១២០ឆ្នាំ។
ទោះបីជាក្រុម Brighton របស់លោក Graham Potter មិនអាចសម្រេចគោលដៅដ៏ខ្ពស់នោះបានក៏ដោយ ក៏ការដណ្ដើមបាន ១ពិន្ទុ ពីការប្រកួតនេះ គឺជារង្វាន់លួងចិត្តគ្រប់គ្រាន់ល្មមទទួលយកបានដែរ។ ពួកគេឈរនៅលេខ ៦ ដោយតាមតែ ១ពិន្ទុពីក្រោយក្រុមកំពូលតារាង Liverpool ដែលមាន ១៤ពិន្ទុ។
គ្រូបង្វឹករបស់ក្រុម Brighton លោក Potter បានថ្លែងថា៖ «នៅពេលដែលអ្នកត្រូវបាននាំមុខ ១-០ រហូតដល់នាទី៩៦ ទៅហើយ ហើយអ្នកអាចស៊ុតបញ្ចូលទីបាននោះ វាពិតជាមានអារម្មណ៍ដូចដណ្ដើមបានជ័យជម្នះអ៊ីចឹង។ វាជាអារម្មណ៍ដ៏ពិសេស ដែលបានតាមស្មើ។ ស្មារតីរបស់ក្រុមពិតជាពិសេសអស្ចារ្យមែនទែន»។
តែវាគឺជាលទ្ធផលដ៏គួរឱ្យឈឺចាប់សម្រាប់លោក Patrick Vieira ដែលក្រុម Crystal របស់លោកមានប្រៀប ក្នុងរយៈពេលយ៉ាងយូរ ក្នុងហ្គេមនេះ ហើយវាក៏បានធ្វើឱ្យក្រុមឥន្ទ្រីខកខានឈ្នះជាលើកទី ២ ក្រោមការដឹកនាំរបស់អតីតកីឡាកររបស់ក្រុមកាំភ្លើងធំ Arsenal រូបនេះ ពីការប្រកួតទាំង ៦លើកដំបូង នារដូវកាលនេះ។
«ពួកយើងពិតជាមានការស្រងាកចិត្តគ្រប់គ្នា។ យើងបានលេងនូវហ្គេមដ៏ល្អមួយ ហើយការរបូតគ្រាប់បាល់ ក្នុងវិនាទីចុងក្រោយនៃការប្រកួត វាពិតជាអ្វី ដែលពិបាកនឹងទទួលយកណាស់»។ នេះជាការពោលដោយខកចិត្តរបស់លោក Vieira។
ការរបូត ២ពិន្ទុនេះ ធ្វើឱ្យក្រុម Crystal នៅតែស្ថិតនៅលេខ ១៥ ក្នុងតារាងពិន្ទុដដែល ដោយមាន ៦ពិន្ទុស្មើគ្នានឹងក្រុមនៅពីលើខ្លួន Wolverhampton Wanderers៕ AFP/VN
