ភ្នំពេញ: សហព័ន្ធកីឡាប្រដាល់សកលកម្ពុជា បានសម្រិតសម្រាំងរួចហើយនូវជើងខ្លាំងជម្រើសជាតិចំនួន ៤ នាក់ ដើម្បីដាក់ឱ្យប្រកួតជើងឯកប្រាក់លាន នៅក្នុងព្រឹត្តិការណ៍ Ultimate Boxing Championship 2021 ហើយជើងឯកប្រាក់លាន ក្នុងប្រភេទទម្ងន់ ៦៣,៥ គ.ក ប្រជែងយកប្រាក់ចំនួន ៣ លានរៀល គឺចំណាយពេលតែ ២ សប្តាហ៍ប៉ុណ្ណោះ។ នេះជាផ្នែកមួយយ៉ាងសំខាន់ ដែលសហព័ន្ធបានប្រឹងប្រែងឱ្យមានសកម្មភាពល្អ មុននឹងព្រឹត្តិការណ៍ស៊ីហ្គេមមកដល់។
លោក ប៊ុយ សុភ័ណ្ឌ អគ្គលេខាធិការសហព័ន្ធកីឡាប្រដាល់សកលកម្ពុជា និងជាប្រធានគណៈកម្មការរៀបចំការប្រកួតនេះ ប្រាប់ថា៖ «ប្រដាល់សកល ត្រៀមរួចហើយ នូវព្រឹត្តិការណ៍ប្រកួតជើងឯករង្វាន់ប្រាក់លាន ដើម្បីសម្រួចសម្រាំងនូវកម្លាំង ព្រមទាំងបច្ចេកទេសរបស់កីឡាករក្នុងទម្ងន់ ៦៣,៥ គ.ក ដើម្បីត្រៀមសម្រាប់ការប្រកួតអន្តរជាតិនានា ជាពិសេសស៊ីហ្គេម លើកទី៣១ នៅវៀតណាម និងស៊ីហ្គេមលើកទី៣២ ឆ្នាំ ២០២៣ នៅកម្ពុជា»។
តាមកម្មវិធី គឺការប្រកួតជើងឯកប្រាក់លាននេះ មាន ២ សប្តាហ៍ គឺលើកទី១ គ្រោងធ្វើនៅថ្ងៃទី ១០ ខែតុលា និងលើកទី២ នៅថ្ងៃទី ២១ ខែ វិច្ឆិកា ឆ្នាំ ២០២១ នៅសង្វៀនប្រដាល់នាយកដ្ឋានអង្គរក្សរបស់លោក ស៊ន អេលីត ស្ថិតនៅឫស្សីកែវ រាជធានីភ្នំពេញ។
ចំពោះបេក្ខភាពទាំង ៤ នាក់ បានត្រៀមរួចជាស្រេច សម្រាប់ការប្រកួតនេះត្រូវបានលោក ប៊ុយ សោភ័ណ្ឌ ប្រាប់ថា ជាកីឡាករក្នុងក្រុមជម្រើសជាតិតែម្តង ក្នុងនោះមានកីឡាករ សែត សារីត, ទូច ដេវីដ, វី សម្ភស្ស និង ម៉ាង ព្រហ្មម៉ាញ ដោយអ្នកទាំង ៤ នេះ ត្រូវប្រកួតជម្រុះ រួចយកអ្នកឈ្នះ ឡើងទៅប្រកួតវគ្គផ្តាច់ព្រ័ត្រ ហើយអ្នកលេខ ១ នឹងទទួលបានប្រាក់ ៣ លានរៀល និងអ្នកលេខ ២ ទទួលបាន ១ លានរៀល។
សម្រាប់ការកៀរគរ និងស្វះស្វែងរកបានថវិកាពីវិស័យឯកជន ដើម្បីរៀបចំបន្ថែមឱ្យមានការប្រកួតជើងឯកប្រាក់លានប្រដាល់សកលលើកដំបូង ក្នុងព្រឹត្តិការណ៍ Ultimate Boxing Championship 2021 ដែលធ្វើឡើង បាន ២ លើកមកហើយនោះ លោក ប៊ុយ សុភ័ណ្ឌ បានបញ្ជាក់ថា៖ «ចំនួនទឹកប្រាក់រង្វាន់នេះ ទោះបីមានចំនួនតិចតួច មិនបានច្រើនដូចប្រដាល់គុនខ្មែរ ប៉ុន្តែវាជាការចាប់ផ្តើម និងឈានទៅបន្តបន្ទាប់ ដើម្បីមានទីផ្សារប្រកួតទូលំទូលាយដូចប្រដាល់គុនខ្មែរ»។
តាមប្រវត្តិប្រកួតរបស់បេក្ខជនទាំង ៤ នាក់នេះ កីឡាករមានកម្ពស់ ១,៧០ ម៉ែត្រ សែត សារឹត ធ្លាប់ប្រកួត ២៥ ដង ឈ្នះ ១៧ ចាញ់ ៥ ស្មើ ៣ ដង ហើយធ្លាប់ឈ្នះមេដាយប្រាក់ពីការប្រកួតជើងឯកថ្នាក់ជាតិ ឆ្នាំ២០១៩ ចំណែក វី សម្ភស្ស មានកម្ពស់ ១,៧៣ ម៉ែត្រ ធ្លាប់ប្រកួត ៣៧ ដង ឈ្នះ ៣៣ ចាញ់ ៣ ស្មើ ១ ដង ក្នុងនោះគេធ្លាប់ឈ្នះមេដាយសំរឹទ្ធពីការប្រកួត CHINA-ASEAN Boxing Championship 2019។
ចំណែក ទូច ដេវីដ កម្ពស់ ១,៧០ ម៉ែត្រ ធ្លាប់ប្រកួត ៣២ ដង ឈ្នះ ២៧ ដង ចាញ់ ៥ ដង ហើយគេធ្លាប់ឈ្នះមេដាយប្រាក់ជើងឯកថ្នាក់ជាតិ ឆ្នាំ ២០២០។ ចំពោះ ម៉ាង ព្រហ្មម៉ាញ មានកម្ពស់ ១.៧២ ម៉ែត្រ ធ្លាប់ប្រកួត ១១ ដង ឈ្នះ ១០ ស្មើ ១ ដង និងធ្លាប់ឈ្នះមេដាយមាសជើងឯកថ្នាក់ជាតិ ឆ្នាំ ២០២០។ ព្រហ្មម៉ាញ មានបទពិសោធតិចជាងគេ ប៉ុន្តែត្រូវបានគេរំពឹងខ្ពស់ជាងគេថា មានលទ្ធភាពដណ្តើមបានប្រាក់លាននេះ៕