.jpg)
លន បញ្ញា និងឡុង សំណាង សុទ្ធតែរំពឹងឈ្នះ នៅក្នុងជំនួបសងសឹក។ ឌុន រដ្ឋា ត្រូវជួបកីឡាករអង់គ្លេស ជំនួស វង្ស វិឆ័យ នៅម៉ាសហ្វៃ។ សហការី
ភ្នំពេញៈ អ្នកប្រដាល់ជើងខ្លាំងលំដាប់ជួរមុខ ប្រភេទទម្ងន់ ៦៣,៥ គីឡូក្រាមរបស់កម្ពុជា គឺ លន បញ្ញា របស់សមាគមកីឡាប្រដាល់កងយោធពលខេមរភូមិន្ទ និង ឡុង សំណាង មកពីសមាគមកីឡាប្រដាល់ក្រសួងមហាផ្ទៃ ត្រូវដាក់ឱ្យសងសឹកគ្នាឡើងវិញ បន្ទាប់ពីធ្លាប់ចាញ់ឈ្នះគ្នាជាច្រើនលើកកន្លងមក ក្នុងគុនខ្មែរ។
ចំណែកកីឡាករ Peter Trieman ជនជាតិអង់គ្លេស មកហាត់នៅក្លិបអាណាចក្រអ្នកប្រយុទ្ធគុនខ្មែរខេត្តសៀមរាប ត្រូវបានដាក់ឱ្យប្រកួតក្នុងកម្មវិធីម៉ាសហ្វៃ ១ ទឹកចំនួនរយៈពេល ៩ នាទី ជាមួយ ឌុន រដ្ឋា នាល្ងាចថ្ងៃអាទិត្យនេះ នៅសង្វៀនថោន ប្រភេទទម្ងន់ ៧៣ គីឡូក្រាមដូចគ្នា។
តាមប្រវត្តិជួបប្រកួតគ្នាកន្លងមករវាង លន បញ្ញា និង ឡុង សំណាង ធ្លាប់ប្រកួតគ្នាញឹកញាប់ តែមានចាញ់មានឈ្នះគ្នា ប៉ុន្តែការប្រកួតចុងក្រោយកាលពី ៣ ខែមុន ឡុង សំណាង ខូចជើង ដោយស្នៀតទាត់របស់ លន បញ្ញា នៅសង្វៀន CNC។ តែទោះយ៉ាងណា មួយរយៈនេះ លន បញ្ញា បានឃ្លាតពីសង្វៀន ដោយបញ្ហាសុខភាពផងដែរ ខណៈការប្រកួតម៉ាសហ្វៃ ៩ នាទីនេះ ពិតជាមានឱកាសសងសឹកគ្នា ដោយអស់លទ្ធភាព និងអស់ចិត្តមិនខាន។
លោក ធន់ សុភា គ្រូបង្វឹក លន បញ្ញា បាននិយាយថា៖ «សម្រាប់ការប្រកួតនេះ ខ្ញុំនៅតែសង្ឃឹមលើសមត្ថភាពល្អរបស់ លន បញ្ញា គឺក្បាច់ឱបឡើងជង្គង់ ដោយមានប្រៀបជាងតែម្តង។ ជាមួយគ្នានេះ លន បញ្ញា មកហាត់បាន៣សប្តាហ៍ល្អឡើងវិញហើយ បន្ទាប់ពីខកខានប្រហែល៣ខែ ហេតុនេះមានខ្ញុំទំនុកចិត្តថា លន បញ្ញា នឹងឈ្នះ ៧០ ភាគរយ»។
ចំណែក ឡុង សំណាង ដែលព្យាយាមមកសងសឹក លន បញ្ញា បាននិយាយថា៖ «ខ្ញុំហាត់បានល្អ ដើម្បីត្រៀមសងសឹកយកឈ្នះឱ្យបាន ហើយសម្រាប់ការប្រកួតរយៈពេល ៩ នាទី ក្នុងម៉ាសហ្វៃនេះ ខ្ញុំរំពឹងឈ្នះ ៨០ភាគរយ ព្រោះមានឱកាសច្រើន ក្នុងការរកល្បិច ដើម្បីផ្តួលយកឈ្នះ»។
តាមប្រវត្តិប្រកួត ដែលក្រុមបច្ចេកទេសផ្គូផ្គង បានទៅសម្ភាសផ្ទាល់ បានឱ្យដឹងថាកីឡាករ លន បញ្ញា មានកម្ពស់ ១,៧៥ ម៉ែត្រ ប្រកួតបាន ៦១ ដង ឈ្នះ ៤៧ ចាញ់ ១១ ស្មើ ៣ ដង ក្នុងនោះផ្តួលដៃគូឱ្យសន្លប់បាន១៦ ដង រីឯ ឡុង សំណាង មានកម្ពស់ ១,៧០ ម៉ែត្រ ប្រកួតបាន ៨០ ដង ឈ្នះ ៦៥ ចាញ់ ១៣ ស្មើ ២ ដង ក្នុងនោះផ្តួលដៃគូឱ្យសន្លប់បាន ១៧ ដង។
ដោយឡែក គូប្រកួតទម្ងន់ធ្ងន់ កីឡាករ Peter Trieman ជនជាតិអង់គ្លេស ហាត់នៅខេត្តសៀមរាប ក្នុងក្លិបអាណាចក្រអ្នកប្រយុទ្ធគុនខ្មែរ ដំបូងឡើង ត្រូវជួប វង្ស វិឆ័យ ប៉ុន្តែដោយបញ្ហាក្លិបនេះ កំពុងធ្វើចត្តាឡីស័ក គណៈកម្មការបានដាក់ជំនួសដោយកីឡាករ ឌុន រដ្ឋា មកពីក្លិបអេភូថងវិញ។
កីឡាករ Peter Trieman ធ្លាប់ប្រកួតគុនចម្រុះ ហើយនៅក្នុងប្រកួតគុនខ្មែរ ធ្លាប់ប្រកួតបាន ១២ ដង ឈ្នះ ៧ និងចាញ់ ៥ ដង ដោយចុងក្រោយចាញ់ពិន្ទុកីឡាករ ទេស សំខាន់ នៅសង្វៀន CNC។
លោក ជា សារ៉ាក់ ជាគ្រូបង្វឹក Peter Trieman និយាយថា៖ «គាត់ធ្លាប់ប្រកួត MMA និងគុនខ្មែរ មានបទពិសោធតិចទេ ប៉ុន្តែកម្លាំងគាត់ល្អ និងមានចំណុចខ្សោយផ្នែកក្បាច់ឡើងជង្គង់ ប៉ុន្តែបើគាត់អាចគេចផុតពីក្បាច់ឡើងជង្គង់បាន ខ្ញុំសង្ឃឹមឈ្នះ ៩០ ភាគរយ»៕
