ភ្នំពេញៈ ការជួបគ្នារវាងកីឡាករជម្រើសជាតិប្រដាល់សកលកម្ពុជា អ៊ូច ធារិទ្ធ មកពីក្លិបគុជសារមានរិទ្ធ និងជើងខ្លាំង ធន់ អៀនឡៃ របស់សមាគមកីឡាប្រដាល់កងយោធពលខេមរភូមិន្ទ ក្នុងការប្រកួតដណ្តើមខ្សែក្រវាត់ ទម្ងន់ ៥៧ គីឡូក្រាម វគ្គជម្រុះ ៨ នាក់ចុងក្រោយ នៅលើសង្វៀន PNN នាថ្ងៃអាទិត្យនេះ បានក្លាយជាការប្រកួតដ៏ស្រួចស្រាល់ព្រោះអ្នកទាំង ២ នេះ ខ្លាំងដូចគ្នាសមត្ថភាពកំពុងតែល្អដូចគ្នា និងមានទឹកចិត្តប្រកួតធំដូចគ្នា ដែលលទ្ធផលលំបាកទស្សន៍ទាយឬប៉ាន់ស្មានមុនណាស់។
តាមប្រវត្តិ អ្នកប្រដាល់ទាំង ២ ធ្លាប់ប្រកួតគ្នាបានម្តង ដោយលទ្ធផល បានត្រឹមស្មើគ្នានៅលើសង្វៀនថោន។ រីឯការប្រកួតជម្រុះដណ្តើមខ្សែក្រវាត់នេះ គឺរវាង អ៊ូច ធារិទ្ធ និង ធន់ អៀនឡៃ អ្នកណាឈ្នះ ក្នុងការប្រកួតនេះ នឹងត្រូវឡើងទៅប្រកួតជាមួយអ្នកឈ្នះម្នាក់ទៀតរវាងវ៉ាន់ រឿន និង អេលីត ចំរើន ក្នុងវគ្គពាក់កណ្តាលផ្តាច់ព្រ័ត្រ ខណៈ បឺត សង្ឃឹម និង ប៊ុន សុធា កំពុងអង្គុយចាំនៅវគ្គនោះ រួចជាស្រេច។
ទាក់ទងការប្រកួតនេះ អ៊ូច ធារិទ្ធ បានប្រាប់ថា៖ «ខ្ញុំកំពុងហាត់ត្រៀមបានល្អ និងរក្សាសុខភាព ដើម្បីប្រកួតយកកៅអី ក្នុងវគ្គ ៤ នាក់ចុងក្រោយ។ ខ្ញុំរំពឹងឈ្នះ ៧០ ភាគរយ ចំណែកបច្ចេកទេស សុំមិននិយាយទេ កុំឱ្យគេដឹងពីល្បិចប្រយុទ្ធរបស់យើង»។
អ៊ូច ធារិទ្ធ បានបន្ថែមថា៖ «ខ្ញុំធ្លាប់ប៉ះប្រកួតគ្នាម្តង ក្នុងកម្មវិធីម៉ាសហ្វៃ ដោយទទួលបានលទ្ធផលស្មើ។ ចំណែកលើកនេះ ប្រសិនវ៉ៃ ក្នុងលក្ខណៈប្រហាក់ប្រហែលគ្នា គឺយើងមិនសូវសង្ឃឹមទេ ព្រោះរឿងពិតមួយទៀត នៅលើខ្សែធំ ឬបក្ខពួក អាចមានឥទ្ធិពលធ្វើឱ្យមានការប្រែប្រួលផងដែរ»។
ចំណែកលោក ធី ណារិទ្ធ ជាគ្រូបង្វឹក បាននិយាយថា៖ «គូនេះ វាប្រហាក់ប្រហែលគ្នា គឺលំបាកទស្សន៍ទាយណាស់។ អ៊ូច ធារិទ្ធ ហាត់ត្រៀមកម្លាំង និងបច្ចេកទេសបានល្អហើយ ប៉ុន្តែវគ្គនេះ គេក៏ប្រឹង យើងក៏ប្រឹង ហេតុនេះគិតថា ៥០ ភាគរយឈ្នះសិនចុះ។ តែទោះយ៉ាងណា ខ្ញុំសង្ឃឹមតែក្នុងចិត្តថា អាចនឹងបានទៅដល់កៅអី ៤ នាក់ចុងក្រោយ មិនខាន វាគ្រាន់តែមានឧបសគ្គធំ»។
ចំពោះលោក ធន់ សុភា ជាគ្រូបង្វឹក ធន់ អៀនឡៃ បាននិយាយថា៖ «គូនេះ ប្រហាក់ប្រហែលគ្នាមែន អ៊ីចឹងការចាញ់ ឬឈ្នះ ពិតជាលំបាកទស្សន៍ទាយមុនណាស់ ប៉ុន្តែវាស៊ីសងលើការប្រកួត ជាក់ស្តែង ភ្លាមៗ នៅលើសង្វៀន ក្នុងការផ្លាស់ប្តូរយុទុ្ធសាស្ត្រប្រកួតឱ្យបានឈ្នះពិន្ទុ ឬមានប្រៀបលើគេ ដែលនេះជាបំណងរបស់យើង»។
តាមប្រវត្តិប្រកួត ដែលទទួលបានជាផ្លូវការរបស់គណៈកម្មការបច្ចេកទេស ធន់ អៀនឡៃ ធ្លាប់ប្រកួត ៦២ ដង ឈ្នះ ៤៩ ចាញ់៨ ស្មើ ៥ ក្នុងនោះផ្តួលដៃគូបានចំនួន ១៣ ដង។ ចំណែក អ៊ូច ធារិទ្ធ ប្រកួតបាន ៨៧ដង ឈ្នះ ៧១ ចាញ់ ១៣ ស្មើ ៣ ដង ក្នុងនោះផ្តួលដៃគូឱ្យសន្លប់បាន ២៣ លើក។
យ៉ាងណាក៏ដោយ កីឡាករជើងខ្លាំងទាំង ២ សុទ្ធតែកំពុងបារម្ភពីបញ្ហារក្សាទម្ងន់ តាមកិច្ចសន្យា ឱ្យបានត្រឹម ៥៧ គីឡូក្រាម ព្រោះទម្ងន់ពិតរបស់ ធន់ អៀនឡៃ និង អ៊ូច ធារិទ្ធ នៅពេលនេះ គឺ ៦០ គីឡូក្រាម ខណៈដែលបទបញ្ជាប្រកួត នរណាលើសទម្ងន់ គឺពិន័យឱ្យចាញ់ដោយគ្មានលើកលែង ឬអនុគ្រោះឡើយ៕