.jpg)
យ៉េន ឌីណា បើកឱកាសឱ្យ ផល សោភ័ណ្ឌ សងសឹក រីឯ ឡុង ជិន ជួប សូត្រ វាសនា។ CNC
ភ្នំពេញៈ កីឡាករ យ៉េន ឌីណា របស់សមាគមកីឡាប្រដាល់ក្រសួងកសិកម្ម បានបើកឱកាសឱ្យអ្នកប្រដាល់ ផល សោភ័ណ្ឌ មកពីក្លិបតាឡីដំរីមានរិទ្ធនៃសមាគមប្រដាល់ក្រសួងមហាផ្ទៃ ឡើងមកប្រកួតសងសឹកគ្នាម្ដងទៀត នៅលើសង្វៀន CNC ក្នុងកម្មវិធីប្រកួតដណ្ដើមប្រាក់លានខារ៉ាបាវទម្ងន់ ៦៥ គីឡូក្រាម នៅថ្ងៃសៅរ៍នេះ បន្ទាប់ពី ផល សោភ័ណ្ឌ បានចាញ់មិនអស់ចិត្ត កាលពីពាក់កណ្តាលខែកញ្ញា ឆ្នាំ២០២១ នៅសង្វៀនបាយ័ន។
កាលពីថ្ងៃទី ១០ ខែ កញ្ញា ឆ្នាំ ២០២១ យ៉េន ឌីណា និង ផល សោភ័ណ្ឌ ធ្លាប់បានជួបគ្នាម្ដង គឺការប្រកួតដណ្ដើមប្រាក់លាន នៅលើសង្វៀនបាយ័ន ដោយអ្នកទាំង ២ បានប្ដូរកណ្ដាប់ដៃគ្នាយ៉ាងជក់ចិត្ត ចំនួន ៥ ទឹកពេញ ប៉ុន្តែគួរឱ្យស្ដាយបំផុតនោះ ផល សោភ័ណ្ឌ ចាញ់ពិន្ទុ យ៉េន ឌីណា ទាំងប្រផុតប្រផើយ ព្រមទាំងបានធ្វើឱ្យរបូតបាត់ប្រាក់ចំនួន ២ លាន ពីក្នុងដៃផងដែរ។ ចំណែក សប្តាហ៍នេះ ផល សោភ័ណ្ឌ តាមមកសងសឹក នៅសង្វៀន CNC តែម្ដង ថែមទាំងបានសន្យាថា មិនឱ្យអ្នកគាំទ្រខកចិត្តនោះឡើយ។
បើនិយាយពីកម្រិតបច្ចេកទេសក្បាច់គុនរបស់អ្នកប្រដាល់ទាំង ២ នេះ គឺមានកេរ្តិ៍ឈ្មោះល្បីល្បាញដូចគ្នា និងមានម្ចាស់ខ្សែក្រវាត់គ្រប់គ្រងដូចគ្នា ប៉ុន្តែ ផល សោភ័ណ្ឌ មានជំនាញកណ្តាប់ដៃ និងទាត់ល្អ ខណៈដែល យ៉េន ឌីណា ទាត់លឿន កែងរហ័ស និងវាយរបៀបដកថយ គេចលឿន មិនសូវហ៊ានវាយតទល់ជាមួយដៃគូនោះទេ។
ផល សោភ័ណ្ឌ និយាយថា៖ «លើកនេះ ខ្ញុំរំពឹងឈ្នះ ៨០ ភាគរយ។ កាលលើកមុន ខ្ញុំចាញ់មិនអស់ចិត្តសោះ ព្រោះគេវាយដកថយច្រើន តែបានលទ្ធផលឈ្នះខ្ញុំ ប៉ុន្តែលើកនេះ ខ្ញុំសង្ឃឹមខ្ពស់តែម្តង។ ចំណែក លោក ម៉ាក់ សាខន ជាគ្រូបង្វឹក និយាយថា៖«សោភ័ណ្ឌ ហាត់បានគ្រប់គ្រាន់ អ៊ីចឹងលើកនេះ សង្ឃឹមឈ្នះច្រើនជាងមុន ដោយយើងឡើងវ៉ៃសម្រុក មិនមែនឡើងទៅរត់ទេ»។
ចំណែកកីឡាករ យ៉េន ឌីណា មិនអាចទាក់ទងសម្ភាសបានទេ ប៉ុន្តែលោកស្រី សាំង សុម៉ាលី អ្នកគ្រប់គ្រងកីឡាករ យ៉េង ឌីណា បានប្រាប់ថា យ៉េន ឌីណា កំពុងហ្វឹកហាត់ ហើយការប្រកួតលើកនេះ តាមមើលលំបាកថាណាស់ ព្រោះពួកគេទាំង២ខ្លាំងដូចគ្នា គឺចាំមើលប្រកួតជាក់ស្តែងទៅ។
បើនិយាយពីប្រិយភាពវិញ ផល សោភ័ណ្ឌ លេចធ្លោ និងមានអ្នកគាំទ្រស្រឡាញ់ច្រើនជាង ព្រោះប្រវត្តិប្រកួតរបស់គេ វ៉ៃមិនដែលលាក់កម្លាំង ឬបន្ធូរដៃឱ្យដៃគូទេ ចាញ់ឈ្នះ គឺអស់ពីសមត្ថភាពពិត ចំណែក យ៉េន ឌីណា ពេលខ្លះ ខ្លាំងវាយអស់ពីសមត្ថភាព ប៉ុន្តែពេលខ្លះត្រូវបានគេមើលឃើញថា ការប្រកួតមិនអស់ពីសមត្ថភាព ឬប្រកួតដោយមិនសូវប្រឹងនោះឡើយ៕
