.jpg)
កីឡាករ អ៊ូច ធារិទ្ធ បានបង្ហាញការខកចិត្ត នោពេលលោកអាជ្ញាកណ្តាលលើកដៃឱ្យ ធន់ អៀនឡៃ ជាអ្នកឈ្នះ។ រូបថត សហការី
ភ្នំពេញ៖ ការទទួលលទ្ធផលជ័យជម្នះរបស់កីឡាករធន់អៀនឡៃមកពីសមាគមកីឡាប្រដាល់កងយោធពលខេមរភូមិន្ទលើអ៊ូចធារិទ្ធរបស់សមាគមកីឡាប្រដាល់ក្រសួងមហាផ្ទៃនាំឱ្យមានភាពចម្រូងចម្រាសផ្នែកសតិអារម្មណ៍ព្រមទាំងមានការរិះគន់ពីសាមីខ្លួនក៏ដូចជាមហាជនដែលបានទស្សនា ការប្រកួតវគ្គជម្រុះ ៨ នាក់ចុងក្រោយ ដណ្តើមខ្សែក្រវាត់ នៅលើសង្វៀន PNN កាលពីថ្ងៃអាទិត្យ។
នៅមុនការប្រកាសលទ្ធផលជាផ្លូវការ ក្រោយពេលប្រកួតចប់ភ្លាម គណៈកម្មការរៀបចំប្រកួតមាននីតិវិធិដូចជាមិនប្រក្រតីព្រោះមុននឹងសម្រេចលទ្ធផលឱ្យ ធន់អៀនឡៃ ឈ្នះនោះគឺបានចំណាយពេលយូរខុសធម្មតាដែលឆ្លុះបង្ហាញឱ្យមហាជនកំពុងរង់ចាំស្តាប់ និងទស្សនាកត់សម្គាល់ថាមានការសង្ស័យពីការសរុបពិន្ទុចេញមកវាផ្ទុយពីការប្រកួតជាក់ស្តែង។យ៉ាងណាក៏ដោយលទ្ធផលផ្លូវការដែលប្រធានវិនិច្ឆ័យប្រកាសគឺធន់អៀនឡៃឈ្នះ អ៊ូច ធារិទ្ធ ក្នុងពិន្ទុ ៣ ទល់ ២។
ជាមួយការសម្រេចសេចក្តីនេះ អ៊ូច ធារិទ្ធ បានប្រាប់ក្រោយប្រកួតថា៖«កន្លងមកខ្ញុំមិនដែលមានការតវ៉ា ឬឡាំប៉ាក្រោយគណៈកម្មការឱ្យចាញ់នោះទេគឺខ្ញុំតែងតែទទួលយកជានិច្ច ទោះបីលទ្ធផលមិនពេញចិត្តក៏ដោយ ប៉ុន្តែចៅក្រមកាត់ក្តីលើកនេះផ្តល់ពិន្ទុអយុត្តិធម៌ណាស់។ សូម្បីតែមុនប្រកាសលទ្ធផលជាផ្លូវការពួកគាត់ចំណាយពេលវែងពិភាក្សាគ្នា ព្រោះលទ្ធផលពិន្ទុចេញមកមានភាពមិនប្រក្រតីបាត់ទៅហើយ»។
អ៊ូច ធារិទ្ធ បានបន្ថែមថា៖ «កាត់ក្តីបែបនេះ ហើយបានជាធ្វើឱ្យកីឡាកររងអយុត្តិធម៌បាត់បងជំនឿ ហើយគុនខ្មែរល្បីបានតែក្នុងស្រុក តែពេលចេញប្រកួតនៅក្រៅប្រទេសចាញ់ងើបមុខមិនរួចឡើយ។ បើគណៈកម្មការផ្តល់ពិន្ទុនៅសង្វៀន ធ្វើបែបៗនេះ លំបាករកកីឡាករទៅប្រកួតណាស់ព្រោះគេគ្មានជំនឿ និងទំនុកចិត្ត។ ខ្ញុំវ៉ៃមានប្រៀបដាច់ចំនួន ៣ ទឹកគឺទឹកទី៣ ទឹកទី ៤ និងទឹកទី ៥ ប៉ុន្តែលទ្ធផលមិនសមសោះ»។
ជុំវិញបញ្ហាដ៏រសើបនេះ លោក តាំង លីហួរ អ្នកសម្របសម្រួលព័ត៌មាន នៅសង្វៀន PNN បាននិយាយថា៖ «ខាងបច្ចេកទេសខ្ញុំមិនហ៊ាននិយាយទេ ប៉ុន្តែនៅចុងទឹកទី ៥ អ៊ូច ធារិទ្ធ បែបចង់ធ្លាក់ដៃដែរ»។
ចំណែកលោក ធន់ សុភា គ្រូបង្វឹកធន់អៀនឡៃ បាននិយាយថា៖ «លទ្ធផលនោះវាឈ្នះមិនដាច់មែនហើយការប្រកួតជម្រុះ អ៊ីចឹងមិនអាចស្មើបានទេគឺត្រូវតែមានអ្នកឈ្នះតែម្នាក់គត់ ហេតុនេះអ្នកចាញ់ពិតជាមិនអស់ចិត្ត អ៊ីចឹងវាគ្មានអ្វីប្លែកទេ ព្រោះអ្នកចាញ់ភាគតិចណាស់និយាយថាអស់ចិត្តនោះលើកលែងតែសន្លប់បានឈប់តវ៉ា»។
ចំពោះរឿងដែល ធន់ អៀនឡៃ ដួលច្រើនលើកនោះលោក ធន់ សុភា បានបញ្ជាក់ថា៖ «វាដួលដោយសារកម្រាលរេញរអិលប៉ុណ្ណោះគឺមិនមែនដួលដោយកាច់ជង្គង់ ឬកាច់ឱ្យដួលនោះទេ ដូចបងប្អូនទស្សនាមើលឃើញហើយ ផ្ទុយពីនេះ អៀនឡៃ ចេញកណ្តាប់ដៃចូលល្អចំគោលដៅជាង អ៊ីចឹងវាឈ្នះនេះសមហើយមិនមែនដូចពាក្យគេចោទថា មានខ្សែមានខ្នងនោះឡើយ»។
ជាមួយគ្នានេះ លោក ណន រិទ្ធ ជាអាជ្ញាកណ្តាលក្នុងគូប្រកួតជម្រុះដណ្តើមខ្សែក្រវាត់នេះ បាននិយាយថា៖ «ខ្ញុំមិនហ៊ាននិយាយទេព្រោះការដាក់ពិន្ទុនិងឱ្យចាញ់ឈ្នះគឺចៅក្រមនិងប្រធានវិនិច្ឆ័យ ឯណោះទេហើយខ្ញុំក៏មិននិយាយថាខាងណាមានប្រៀបនោះដែរកុំឱ្យគេស្តីឱ្យ»។
ចំណែក ធន់ អៀនឡៃ បាននិយាយក្រោយការប្រកួតថា៖ «ជំនួបនេះលំបាកមែនគាត់ល្អហើយខ្ញុំគ្មានអ្វីនិយាយច្រើននោះទេ ព្រោះបងប្អូនមើលឃើញស្រាប់ហើយ»។ សម្រាប់ការឡើងទៅប្រកួតវគ្គពាក់កណ្តាលផ្តាច់ព្រ័ត្រ ធន់ អៀនឡៃ បានប្រាប់ថាសុំចាំមើលសិនមិនទាន់ដឹងប៉ះនរណាទេរវាងជើងខ្លាំងវ៉ាន់វឿននិងអេលីតចំរើន។
គួរបញ្ជាក់ថា តាមរយៈលទ្ធផលនៃការប្រកួតនៅក្នុងវគ្គ ៨ នាក់ចុងក្រោយនេះ គឺបានរកឃើញបេក្ខភាពចំនួន ៣ នាក់ហើយ ដែលត្រូវឡើងទៅប្រកួតនៅវគ្គ ៤ នាក់ចុងក្រោយ ឬវគ្គពាក់កណ្តាលផ្តាច់ព្រ័ត្រ ក្នុងនោះមានកីឡាករប៊ុនសុធាកីឡាករបឺតសង្ឃឹមនិងកីឡាករធន់អៀនឡៃគឺនៅរង់ចាំ អ្នកឈ្នះតែម្នាក់ទៀតប៉ុណ្ណោះ ដែលអាចជា វ៉ាន់ វឿន ឬ អេលីត ចំរើន ព្រោះអ្នកទាំង ២ នេះ នឹងប្រកួតជម្រុះវគ្គ ៨ នាក់ នៅសប្តាហ៍ក្រោយ៕
