.jpg)
កិឡាករ អេ ណារ័ត្ន ឡើងទទួលប្រាក់រង្វាន់ ក្រោយបានទាត់ឱ្យ ស៊ន រ៉ាគីម ខូចជើង នៅវគ្គផ្តាច់ព្រ័ត្រ។ រូប សហការី
ភ្នំពេញ៖ អ្នកប្រដាល់ អេ ណារ័ត្ន របស់ក្លិបប្រដាល់អេភូថង ដែលឡើងមកជំនួសកីឡាករមានបញ្ហាសុខភាព សេកកំសាន្តនោះបានឈ្នះប្រាក់លាន ពីសង្វៀនថោនជាលើកទី ២ បន្ទាប់ពីប្រកួតឈ្នះផាន់សុផាតនិងបន្តផ្តួលស៊នរ៉ាគីមមកពីក្លិបរាហូខេត្តបាត់ដំបង ឱ្យសន្លប់ត្រឹមទឹកទី២ នៅវគ្គផ្តាច់ព្រ័ត្រនោះ។ ចំណែកការប្រកួតគូម៉ាសហ្វៃ កីឡាករ ឌុន រដ្ឋា និង លន បញ្ញា សុទ្ធតែបានផ្តួលគូប្រកួតឱ្យសន្លប់ដូចគ្នា។
អេណារ័ត្នអាចចាត់ទុកថាហេងនិងសំណាងផងដែរ ព្រោះរូបគេ មិនបានត្រៀមខ្លួនមុននោះទេក្នុងការប្រកួតដណ្តើមប្រាក់លាននេះប៉ុន្តែការអវត្តមានរបស់កីឡាករ សេក គឹមសាន្ត ដោយបញ្ហាសុខភាព (តេស្តវិជ្ជមានកូវីដ១៩) នោះនាំឱ្យ អេណារ័ត្ន ទទួលបានឱកាសមាសតែម្តង។
តាមរយៈការប្រកួតនោះ អេ ណារ័ត្ន បានយកឈ្នះ ផាន់ សុផាត ដោយពិន្ទុក្នុងវគ្គជម្រុះ ៣ ទឹក ដើម្បីឡើងទៅប្រកួតផ្តាច់ព្រ័ត្រជាមួយស៊នរ៉ាគីមដែលបានឈ្នះកីឡាករទូចដេវីដទាំងលំបាក។យ៉ាងក៏ដោយ តាមរយៈការប្រកួតផ្តាច់ព្រ័ត្រនោះ អេណារ័ត្ន បានផ្តួលស៊នរ៉ាគីមយ៉ាងផុយស្រួយដោយសារ ស៊ន រ៉ាគីម រងរបួសឈឺជើងស្រាប់ នាំឱ្យ ណារ័ត្ន ប្រើស្នៀតទាត់សន្ធាប់បំបុកផ្តាច់តែម្តង ត្រឹមទឹកទី២។
ឌុន រដ្ឋា ត្រូវបានលោកអាជ្ញាកណ្តាល លើកដៃឱ្យឈ្នះ ក្រោយបានវ៉ៃកីឡាករអង់គ្លេស ឱ្យបោះបង់ការប្រកួត។ រូប សហការី
ជាមួយការឈ្នះតំណែងជើងឯក អមដោយប្រាក់រង្វាន់ចំនួន ៣,៤ លានរៀលនេះ អេ ណារ័ត្ន បាននិយាយថា៖ «ជ័យជម្នះនៃការប្រកួតនេះខ្ញុំហេងណាស់ព្រោះមិនបានត្រៀមខ្លួនសោះគឺឡើងជំនួសគេ។ បន្ថែមពីលើនេះខ្ញុំធ្លាប់ចាញ់ផាន់សុផាតតែពេលនេះដូចបានសងសឹកដែរ ចំណែកការឈ្នះ ស៊ន រ៉ាគីម ក្នុងវគ្គផ្តាច់ព្រ័ត្រដោយសារ រ៉ាគីម រងរបួសជើងកាលពីជុំទី១ ហេតុនេះខ្ញុំព្យាយាមទាត់តែល្វែងក្រោមគឺបានឈ្នះតែម្តង»។
សម្រាប់ការមកចាញ់ក្រោមស្នៀតជើងរបស់ អេ ណារ័ត្ន នេះ ស៊ន រ៉ាគីម បាននិយាយថា៖ «មូលហេតុដែលចាញ់នេះ ព្រោះពេលឈ្នះទូចដេវីដនៅវគ្គជម្រុះនោះ ខ្ញុំឈឺជង្គង់ហើយពេលប្រកួតជាមួយ អេ ណារ័ត្ន គឺប្រើតែក្បាច់កណ្តាប់ដៃ»។ទោះខ្ញុំខំការពារនិងគេចពីការទាត់ប៉ុន្តែខ្ញុំមិនអាចគេចរួចនោះទេគឺខូចជើង នៅក្នុងទឹកទី២»។
ដោយឡែក សម្រាប់ការប្រកួតគូម៉ាសហ្វៃវិញ កីឡាករ ឌុន រដ្ឋា បានប្រើកែងមុខកាណូតផ្តួលកីឡាករអង់គ្លេស Pither ឱ្យសន្លប់ និងបែកឈាម នាំឱ្យអាជ្ញាកណ្តាលបញ្ឈប់ ហើយស្រដៀងគ្នានេះ លន បញ្ញា បានទាត់ឱ្យ ឡុង សំណាង ខូចជើង នៅមុនការប្រកួតចំនួន ៩ នាទី ពេញដូចគ្នា ដើម្បីទទួលបានប្រាក់រង្វាន់បន្ថែមចំនួន ៨០ ម៉ឺនរៀល ដូច ឌុន រដ្ឋា ដែរ។
កីឡាករ ឌុន រដ្ឋា បាននិយាយថា៖ «ពីដំបូង ខ្ញុំមិនសូវសង្ឃឹមទេ ប៉ុន្តែការវាយកណ្តាប់ដៃ និងកែងរបស់ខ្ញុំ គឺចូលធ្ងន់ៗ។ ទោះបីជា ខ្ញុំខកខានប្រកួតយូរមែន ប៉ុន្តែនៅតែកាន់ស៊ីបបង្ហាត់គឺកម្លាំងដៃរឹងមាំ»៕
លន បញ្ញា ទទួលបានប្រាក់រង្វាន់បន្ថែមពីម៉ាសហ្វៃ ចំនួន ៨០ ម៉ឺនរៀល ចំពោះការផ្តួល ឡុង សំណាង ឱ្យសន្លប់។ រូប សហការី
