.jpg)
ផល សោភ័ណ្ឌ បានបុកកែងទៅលើផ្ទៃមុខ អេលីត ភក្តី កាលប្រកួតប្រដាល់គុនខ្មែរអលស្តារ វគ្គ ១ កន្លងមក។ រូប គុនខ្មែរអលស្តារ
ភ្នំពេញ៖ កម្មវិធីប្រកួតប្រដាល់គុនខ្មែរអលស្តារ (Kun Khmer All Stars) ដែលបានចាប់កំណើតលើកដំបូង កាលពីថ្ងៃទី ២៥ ខែ កក្កដា ២០២១ នោះ គ្រោងនឹងបើកដំណើរការវគ្គ ២ នៅថ្ងៃទី ២៧ ខែ តុលា ឆ្នាំ២០២១ នេះ ខណៈព្រឹត្តិការណ៍ ដែលផ្តើមដោយ លោក ស៊ន អេលីត អ្នកគ្រប់គ្រងក្លិបនាយកដ្ឋានអង្គរក្ស មួយនេះ កំពុងមានការចាប់អារម្មណ៍ខ្លាំងពីមហាជន ដោយសារការប្រកួតលើកទី ១ មានភាពទាក់ទាញខ្លាំង។
យ៉ាងណាក៏ដោយ ការប្រកួតគុនខ្មែរអលស្តារ វគ្គ ២ នេះ អាចដំណើរការទៅបាន គឺពឹងទៅលើកញ្ចប់ថវិកាពីវិស័យឯកជន និងសប្បុរសធម៌ជិតឆ្ងាយ ហើយគិតត្រឹមថ្ងៃនេះ លោក ស៊ន អេលីត បានប្រាប់ថា ដំណើរការរៀបចំការប្រកួតនេះ អាចធ្វើបានតាមគម្រោងហើយ ចំណែកថវិកាចំណាយយើងបានប្រហែល ៧០ភាគរយទៅហើយ និងកំពុងស្វះស្វែងរកអ្នកឧបត្ថម្ភបន្ថែម ដើម្បីគ្រប់គ្រាន់លើការចំណាយ។
អតីតអ្នកកីឡាប្រភេទប្រយុទ្ធច្រើនជំនាញ មានប្រដាល់សកល ប្រដាល់គុនខ្មែរ វ៉ូវីណាម តេក្វាន់ដូ និងធ្លាប់ទទួលជយលាភីថ្នាក់អន្តរជាតិ លោក ស៊ន អេលីត បានបន្ថែមថា៖ «នាពេលថ្មីៗនេះ ដំណើរការរៀបចំ ការប្រកួតគុនខ្មែរអលស្តារ វគ្គ ២ នេះ យើងបានទទួលការឧបត្ថម្ភជាបន្តបន្ទាប់ ហើយកញ្ចប់ថវិកានេះ សម្រាប់ចំណាយទៅលើការតុបតែង សម្ភារ បច្ចេកទេសផ្សេងៗ ដោយឡែកចំពោះបេក្ខភាពប្រកួតវិញ យើងត្រៀមរួចរាល់អស់ជាស្ថាពរហើយ។ តែទោះបីជាយ៉ាងណា ចំពោះបេក្ខភាព ឬកីឡាករចូលរួមនេះ ក៏អាចនឹងមានការត្រៀមផ្លាស់ប្តូរដោយចៃដន្យពាក់ព័ន្ធនឹងបញ្ហាមួយចំនួនផងដែរ»។
គ្រូប្រដាល់ក្លិបនាយដ្ឋានអង្គរក្ស លោក ស៊ន អេលីត បានបញ្ជាក់ថា៖ «បញ្ហាប្រឈមខ្លះៗនោះ គឺការមិនទាន់មានក្រុមហ៊ុន ឬអ្នកឧបត្ថម្ភវិស័យឯកជនធំៗ ចូលរួមជួយដល់កម្មវិធីរបស់យើង សម្រាប់ការចំណាយជាច្រើន នៅពេលប្រកួត ដូចជាតម្លៃខ្លួនកីឡាករ និងបច្ចេកទេសផ្សេងៗ ប៉ុន្តែយើងត្រូវតែតស៊ូ និងស្វែងរក ដើម្បីបំពេញតាមផែនការលើកស្ទួយកម្មវិធីនេះ ឆ្ពោះទៅរកភាពប្រកួតប្រជែងជាមួយព្រឹត្តិការណ៍ធំៗ នៅលើឆាកអន្តរជាតិ ក្នុងពេលអនាគត»។
ចំណែកអតីតកីឡាករជើងខ្លាំង សែន រ៉ាដេត ដែលបច្ចុប្បន្ន បានក្លាយជាគ្រូបង្វឹកប្រចាំក្លិបនាយកដ្ឋានអង្គរក្ស ទៅហើយនោះ បានអំពាវនាវដល់អ្នក ដែលចាប់អារម្មណ៍កម្មវិធីប្រដាល់មួយនេះ សូមចូលរួមជួយឧបត្ថម្ភ ឬផ្សព្វផ្សាយ ដើម្បីបន្តសកម្មភាព និងអាចឈានដល់ការរៀបចំ ការបកួតប្រដាល់គុនខ្មែរអលស្តារ វគ្គ ៣ ជាបន្តបន្ទាប់ទៀត៕
