.jpg)
ហ៊ឹម សេរី (ស្តាំ) ពេលប្រកួតជាមួយ នូវ សុខទី នៅក្នុងវគ្គជម្រុះ មុនឈានទៅយកឈ្នះ សាន សំអុន នៅវគ្គផ្តាច់ព្រ័ត្រ។ រូបថត ថោន
ភ្នំពេញ៖ អ្នកប្រដាល់ជើងខ្លាំង ហ៊ឹម សេរី របស់ក្លិបតាព្រហ្មមានជ័យ ដែលបាត់មុខពីសង្វៀនយូរខែមកហើយនោះ បានវិលមកប្រកួតវិញ និងដណ្តើមបានប្រាក់លាន ប្រចាំសប្តាហ៍ នៅសង្វៀនថោន កាលពីថ្ងៃអាទិត្យ ដោយរូបគេ បានផ្តួលកីឡាករវ័យក្មេង នូវ សុខទី មកពីក្លិបតាឡីមានរិទ្ធ ត្រឹម ២ ទឹក រួចឈានទៅយកឈ្នះកីឡាករ សាន សំអុន ដោយពិន្ទុ ក្នុងលក្ខណៈតឹងតែង សម្រាប់ការប្រកួតផ្តាច់ព្រ័ត្រ។
ជាមួយគ្នានេះ គូប្រដាល់ម៉ាសហ្វៃ ដែលជាកីឡាករឆ្នើមវ័យក្មេងបំផុត ពេជ្រ សម្បត្តិ មកពីក្លិបចលនាយុវជន ១៥៧ ជាកូនសិស្សរបស់លោក ពេជ្រ សុផាន់ បានបន្ថែមនូវភាពខ្លាំងមួយកម្រិតទៀត ដោយរូបគេ បានផ្តួលកីឡាករ ឯម ភារុន មកពីក្លិបថ្មគោលពោធិ៍សែនជ័យ ជាគូសងសឹកផង ដោយប្រើរយៈពេលចំនួន ២ នាទី។
អ្នកប្រដាល់ ហ៊ឹម សេរី ដែលមិនធ្លាប់ឈ្នះប្រាក់លាន នៅម៉ាសហ្វៃ ប៉ុន្តែលើកនេះដូចជាសំណាងផងដែរ ខណៈដៃគូប្រកួត ដែលត្រៀមគឺកីឡាករ ធន់ អៀនឡេង មានបញ្ហាសុខភាព ហើយត្រូវបានជំនួសដោយកីឡាករ នូវ សុខទី នោះ។
តាមរយៈការប្រកួតជម្រុះ ៣ ទឹក នោះ ហ៊ឹម សេរី បានយកឈ្នះលើ នូវ សុខទី ដោយងាយ តាមរយៈការទាត់ឱ្យខូចជើង នៅត្រឹមទឹកទី ២ ខណៈ សាន សំអុន បានផ្តួល បាង កាណុន ត្រឹមទឹកទី ១ ប៉ុន្តែ សម្រាប់ការឡើងទៅជួបគ្នា នៅវគ្គផ្តាច់ព្រ័ត្រ គឺ ហ៊ឹម សេរី បានឈ្នះពិន្ទុ សាន សំអុន ដោយតានតឹង និងលំបាកបំផុត។
ហ៊ឹម សេរី និង សាន សំអុន ពេលឡើងទទួលប្រាក់រង្វាន់ ក្រោយការប្រកួតផ្តាច់ព្រ័ត្រ បានបញ្ចប់។ រូបថត ថោន
យ៉ាងណាក៏ដោយ នៅក្រោយការប្រកួត បានបញ្ចប់ សាន សំអុន បានទទួលស្គាល់ថា រូបគេ ពិតជាចាញ់ គឺចាញ់ដោយអស់ចិត្ត។ សាន សំអុន បាននិយាយថា៖ «ខ្ញុំចាញ់ក្បាច់ ហ៊ឹមសេរី ដោយគាត់ចេញចូលលឿន និងមានក្បាច់ជង្គង់ទាញបានល្អ ព្រមទាំងគេចលឿនទៀតផង»។
ចំណែក ហ៊ឹម សេរី ដែលឈ្នះប្រាក់រង្វាន់ ៣,៤ ជាលើកដំបូង បាននិយាយថា៖ «ខ្ញុំឈ្នះប្រាក់លាននេះ ជាលើកដំបូង។ នៅជុំទី ១ ពេលប៉ះ នូវ សុខទី គឺស៊ីផុយ ដោយសារគេ នៅមានបទពិសោធខ្ចី ប៉ុន្តែវគ្គផ្តាច់ព្រ័ត្រ ពិតជាលំបាក ព្រោះ សាន សំអុន ជំនាញកណ្តាប់ដៃល្អ ហើយចិត្តធំ វាយសម្រុកគ្មានញញើត ទើបខ្ញុំព្យាយាមគេចឱ្យបានលឿន និងប្រើក្បាច់ជង្គង់វិញ ដើម្បីមានប្រៀបត្រឹមពិន្ទុ តែបើនៅតទល់ គឺអាចចាញ់ក៏ថាបានដែរ»។
ដោយឡែក អ្នកប្រដាល់វ័យក្មេង ពេជ្រ សម្បត្តិ ដែលមានប្រវត្តិប្រកួតចាញ់តែម្តងគត់នោះ ត្រូវបានដាក់ឱ្យសងសឹកកីឡាករ ឯម ភារុន ក្នុងកម្មវិធីម៉ាសហ្វៃ ចំនួន ៩នាទី ហើយជាលទ្ធផលជាក់ស្តែង ពេជ្រ សម្បត្តិ បានប្រើកណ្តាប់ដៃធ្ងន់ ផ្តួល ឯម ភារុន ឱ្យដេកស្អាត ត្រឹមរយៈពេល ២ នាទី ធ្វើឱ្យអ្នកតាមដានប្រដាល់ កោតសរសើរខ្លាំងណាស់។
កីឡាករ ពេជ្រ សម្បត្តិ បានឡើងទទួលប្រាក់រង្វាន់ ចំពោះការផ្តួល ឯម ភារុន ឱ្យសន្លប់។ រូបថត ថោន
លោក ពេជ្រ សុផាន់ ជាគ្រូបង្វឹក បាននិយាយថា៖ « ពេជ្រ សម្បត្តិ ឡើងវ៉ៃនៅសង្វៀនម៉ាសហ្វៃនេះ ចំនួន ៣ លើកហើយ ដោយផ្តួលដៃគូឱ្យសន្លប់ដូចគ្នា ដណ្តើមបានប្រាក់រង្វាន់បន្ថែមពីម៉ាសហ្វៃ លើតម្លៃខ្លួនទាំង ៣ លើក»។
អតីតកីឡាករជើងខ្លាំង ពេជ្រ សុផាន់ បានប្រាប់បន្ថែមថា៖ «នៅក្នុងទម្ងន់ ៥៧គីឡូក្រាមនេះ អ្នកប្រដាល់ជំនាន់ក្រោយ ពិតជាលំបាករកដៃគូណាស់ ព្រោះ ពេជ្រ សម្បត្តិ ខ្លាំង ហើយនៅក្នុងការប្រកួតចំនួន ១៦ លើកកន្លងមក គេបានចាញ់តែម្តង ឯម ភារុណ នេះទេ ប៉ុន្តែឥឡូវវាសងសឹកបានវិញហើយ។ សម្រាប់អនាគតក្មេងនេះ ល្អណាស់ ដោយហាត់បានល្អវិន័យល្អ អាចឈានចូលជម្រើសជាតិ នៅឆ្នាំក្រោយៗបាន»៕
