ភ្នំពេញ: គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ក្នុងឆ្នាំ ២០២៣ (CAMSOC) បានបើកការប្រជុំពេញមួយព្រឹក កាលពីថ្ងៃអង្គារ ដើម្បីកំណត់លម្អិតពិធីបើក និងពិធីបិទ នៃព្រឹត្តិការណ៍ប្រកួតកីឡាស៊ីហ្គេម អាស៊ានប៉ារ៉ាហ្គេម ឆ្នាំ ២០២៣ ដោយនឹងចាប់ហ្វឹកហាត់ជាបណ្តើរៗ នៅដើមខែមករា ឆ្នាំ ២០២២ ខណៈដែលក្រុមអ្នកជំនាញផ្ទាំងទស្សនីយភាពការរៀបចំលក្ខណៈបែបវិទ្យាសាស្ត្រឌីជីថលនេះ នឹងត្រៀមមកដល់កម្ពុជានៅខែក្រោយនេះ។
នៅក្នុងកិច្ចប្រជុំនោះ ភាគីពាក់ព័ន្ធ ជាពិសេសក្រសួងវប្បធម៌ និងវិចិត្រសិល្បៈ, ក្រសួងអប់រំ យុវជន និងកីឡា, ក្រសួងការពារជាតិ, សហព័ន្ធកីឡាជាតិ និងអ្នកជំនាញតាមគណៈកម្មការ CAMSOC បានសម្រេចថា នឹងបង្ហាញពីវប្បធម៌ដ៏សម្បូរបែប និងកិត្យានុភាពជាតិនៅលើឆាកអន្តរជាតិក្នុងពិធីបើក-បិទ នោះ ដោយប្រើប្រាស់កម្លាំងមនុស្សខ្ទង់ពី ៥ ០០០ ទៅ ៧ ០០០ នាក់ ក្នុងនោះកម្លាំង មកពីកងយោធពលខេមរភូមិន្ទ ប្រហែល ៧០%។
លោកឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ទៀ បាញ់ ដែលជាប្រធាន CAMSOC បានលើកឡើង តាមរយៈផេចហ្វេសប៊ុករបស់លោក កាលពីព្រឹកថ្ងៃអង្គារ នោះដែរថា៖ «ជាមួយនឹងការជំរុញហ្វឹកហាត់លើកកម្ពស់សមត្ថភាព បច្ចេកទេសដល់កីឡាករ កីឡាការិនីជម្រើសជាតិទាំងក្នុង និងក្រៅប្រទេស ឱ្យទទួលបានគុណផលកីឡាខ្ពស់ ប្រកួតប្រជែងដណ្តើមមេដាយជូនជាតិ ការរៀបចំព្រះរាជពិធីសុំភ្លើងអាទិទេព រត់ភ្លើងគប់ និងពិធីបើក-បិទ គឺជាព្រឹត្តិការណ៍ប្រវត្តិសាស្ត្រធំមួយរបស់ព្រះរាជាណាចក្រកម្ពុជា សម្រាប់ការទទួលធ្វើម្ចាស់ផ្ទះស៊ីហ្គេម-អាស៊ានប៉ារ៉ាហ្គេម ឆ្នាំ ២០២៣»។
លោក ទៀ បាញ់ បានគូសបញ្ជាក់ទៀតថា៖ «ទន្ទឹមនេះ ពិធីបើក ពិធីបិទ ជាការរៀបចំមួយដ៏ធំជាងគេបំផុត ក្នុងព្រឹត្តិការណ៍ប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ ២០២៣ ដើម្បីបង្ហាញពីវប្បធម៌ដ៏សម្បូរបែប កិត្យានុភាពជាតិលើឆាកអន្តរជាតិ ក្នុងសម័យសន្តិភាពតេជោសែន ផងដែរ»។
តាមគម្រោងស៊ីហ្គេម លើកទី៣២ នៅកម្ពុជាត្រូវបានរាជរដ្ឋាភិបាលកំណត់យកថ្ងៃទី ៥ ខែ ឧសភា ឆ្នាំ ២០២៣ ជាថ្ងៃរៀបចំពិធីបើក ខណៈពិធីបិទ គឺនៅថ្ងៃទី ១៧ ខែឧសភា ឆ្នាំ ២០២៣។ រីឯការប្រកួតកីឡាអាស៊ានប៉ារ៉ា-ហ្គេម លើកទី១២ សម្រាប់ក្រុមអត្ថពលិកជនពិការនៅកម្ពុជា នឹងរៀបចំពីថ្ងៃទី ១ ដល់ថ្ងៃទី ១០ ខែ មិថុនា ឆ្នាំ ២០២៣។
លោក វ៉ាត់ ចំរើន អគ្គលេខាធិការ CAMSOC បានប្រាប់ប្រព័ន្ធផ្សព្វផ្សាយ ក្រោយកិច្ចប្រជុំថា៖ «កម្មវិធីបិទ និងបើកនេះមានសារៈសំខាន់ខ្លាំង ដែលអង្គប្រជុំ ត្រូវការលម្អិតនូវក្បូនផ្ទាំងទស្សនីយភាព ដែលសម្តែងដោយមនុស្ស និងបញ្ចូលបច្ចេកទេសភ្លើង ព្រមទាំងបច្ចេកវិទ្យាទំនើបត្រូវមានចលនារស់រវើក ដោយសកម្ម មិនអាចខូចការបានទេ គឺទាមទារ ការហាត់សមច្រើនលើកណាស់»។
«ធនធានមនុស្ស ដែលចូលរួម ក្រៅពីអត្តពលិក គឺមានកម្លាំងមកពីកងយោធពលខេមរភូមិន្ទ ដែលបង្ហាញជាផ្ទាំងទស្សនីយភាពទៅតាមគម្រោងប្លង់ ដែលឯកភាពគ្នា ជាធ្លុង ១ ពី CAMSOC ដែលកងទ័ពនេះ មានចំនួនប្រហែល ៧០%។ ចំណែកផ្ទាំងទស្សនីយភាពនីមួយៗ ត្រូវបានកំណត់ ដោយផែនផ្សេងៗគ្នា គឺទទួលខុសត្រូវបន្តបន្ទាប់គ្នា ត្រូវការស៊ីចង្វាក់ដែលទាមទារ ការហ្វឹកហាត់សម្តែងតាំងពីខែមករា ឆ្នាំ ២០២២ ខណៈដែលអ្នកជំនាញមកពីប្រទេសចិន នឹងមកដល់ដើម្បីរៀបចំនៅខែវិច្ឆិកា ឆ្នាំ ២០២១ នេះហើយ»។ លោក វ៉ាត់ ចំរើន បានបន្ថែម៕