ភ្នំពេញ៖ អ្នកប្រដាល់គុនខ្មែរវ័យក្មេង ពេជ្រ សម្បត្តិ របស់ក្លិបចលនាយុវជន ១៥៧ បានតម្លើងទម្ងន់ពី ៥៧ រហូតដល់ ៦០ គីឡូក្រាម ដើម្បីប្រកួតជាមួយជើងចាស់ ម៉ិល សារុន មកពីក្លិបគុជសារមានរិទ្ធិ នៅលើសង្វៀនបាយ័ន នាយប់ថ្ងៃសៅរ៍ ចុងសប្តាហ៍នេះ ចំណែកគូឯកប្រចាំសប្តាហ៍គឺជាការជួបគ្នារវាងកីឡាករចាស់វស្សា ចាន់ ប៊ុនលាភ មកពីនិរោធន៍មានជ័យ និងកីឡាករ ឌុម កែវដា របស់ក្លិបមកុដរាជសីហ៍។
ពេជ្រ សម្បត្តិ ត្រូវបានគេកត់សម្គាល់ឃើញថា ជាកីឡាករវ័យក្មេង ដែលចាប់ផ្តើមល្បីល្បាញខ្លាំង ខណៈ ៣ ប្រកួតចុងក្រោយមកនេះ គេបានផ្តួលដៃគូប្រកួតជើងខ្លាំងមានបទពិសោធល្អៗ ឱ្យសន្លប់ក្នុងកម្មវិធីម៉ាសហ្វៃ នៅសង្វៀនថោន បានប្រាក់រង្វាន់បន្ថែមទាំង៣លើក។ជំនាញកណ្តាប់ដៃល្អរបស់ ពេជ្រ សម្បត្តិ ត្រូវបានគណៈកម្មការផ្គូផ្គងដាក់ឱ្យប្រកួតជាមួយជើងចាស់ ម៉ិល សារុន ជាគូពិសេសប្រចាំសង្វៀនបាយ័ន ថ្ងៃសៅរ៍នេះ ក្នុងប្រភេទទម្ងន់៦០គីឡូក្រាម។
លោក ធន់ សុភា ជំនួយការផ្គូផ្គងប្រចាំសង្វៀនបាយ័ន បាននិយាយថា៖«សម្រាប់គូនេះមានបទពិសោធខុសគ្នាដាច់ គឺ ម៉ិល សារុន មានប្រវត្តិប្រកួតបានជាង១០០លើក ចំណែក ពេជ្រសម្បត្តិ ទើបតែប្រកួតបាន ១៦ ដង ប៉ុន្តែគេល្អណាស់ ហើយតាមខ្ញុំមើល បើសិន ម៉ិល សារុន គេច ឬដកថយមិនផុតទេ អាចនឹងសន្លប់ក្រោមកណ្តាប់ដៃកីឡាករវ័យក្មេង ពេជ្រ សម្បត្តិ បាន ប៉ុន្តែ ម៉ិល សារុន ក៏មានប្រៀបផ្នែកឱបឡើងជង្គង់ផងដែរ»។
ចំណែកលោក ពេជ្រ សុផាន់ គ្រូបង្វឹក ពេជ្រ សម្បត្តិ បាននិយាយថា៖ «ពេជ្រ សម្បត្តិ កំពុងហ្វឹកហាត់ និងឡើងកម្លាំងល្អ ដោយគេមានកណ្តាប់ដៃធ្ងន់ និងទឹកចិត្តប្រកួតមុះមុត ដើរចូលវ៉ៃ មិនចាំបាច់តឿនឡើយ ហើយខ្ញុំមានទំនុកចិត្តឈ្នះខ្ពស់ណាស់ ដោយរំពឹងឈ្នះដល់ទៅ៨០ ភាគរយឯណោះ»។
ចំណែកលោក ណន រិទ្ធ គ្រូបង្វឹកកីឡាករ ម៉ិល សារុន បាននិយាយថា៖« ម៉ិល សារុន ខ្សោយកម្លាំងជាងមុនមែន តែបច្ចេកទេសវ៉ៃក្បាច់ជង្គង់ មិនអាចមើលរំលងបានឡើយ។ ខ្ញុំរំពឹងថា វានឹងប្រកួតបានល្អ គឺសង្ឃឹមឈ្នះ ៦០ ភាករយ»។
ដោយឡែក ចាន់ ប៊ុនលាភ និង ឌុម កែវដា សុទ្ធតែជាកីឡាករចាស់វស្សាដូចគ្នា។តាមប្រវត្តិ ចាន់ ប៊ុនលាភ ឡើងសង្វៀនយូរឆ្នាំជាង ឌុម កែវដា ប៉ុន្តែឡើងប្រកួត និងខកខានច្រើន ធ្វើឱ្យកម្រិតវិជ្ជាគុនពេលខ្លះល្អ ពេលខ្លះធ្លាក់ចុះ មិនទៀងទាត់។
ទាក់ទងការប្រកួតនេះ ឌុម កែវដា បាននិយាយថា៖ «ខ្ញុំមិនធ្លាប់ប្រកួតគ្នាទេ គាត់ល្បីមុនខ្ញុំគឺជំនាន់ រឿង សោភ័ណ្ឌ ឯណោះ។ ពីមុនគាត់ខ្លាំង ប៉ុន្តែគាត់ឡើងប្រកួតយូរៗម្តង ហេតុនេះខ្ញុំមិនញញើតទេ ដោយរំពឹងឈ្នះ ៨០ ភាគរយ»៕