.jpg)
សាលី អូមើត ថតជាមួយមន្រ្តីរបស់ NOCC ក្រោយពេលឈ្នះមេដាយមាស១ និងសំរឹទ្ធ ពីការប្រកួតកីឡាអាស៊ី ឆ្នាំ២០១៨។ រូប សហការី
ភ្នំពេញ៖ ម្ចាស់មេដាយមាសកីឡាអាស៊ី លើប្រភេទកីឡាម៉ូតូទឹក សាលី អូមើត ដែលជាក្តីសង្ឃឹមខ្លាំងរបស់កម្ពុជា សម្រាប់ព្រឹត្តិការណ៍អន្តរជាតិនានានោះ បានហ្វឹកហាត់ពង្រឹងសមត្ថភាពជាមួយនឹងម៉ូតូទឹកថ្មី ជាមួយអត្តពលិកជាម្ចាស់មេដាយពិភពលោក នៅប្រទេសអូទ្រីស បានរយៈពេលជិតមួយខែហើយ។
ការចេញទៅហ្វឹកហាត់ នៅប្រទេសអូទ្រីស របស់ម្ចាស់មេដាយមាស សាលី អូមើត នេះ ត្រូវបានមន្ត្រីសហព័ន្ធកីឡាម៉ូតូទឹកកម្ពុជា អះអាងថា គឺដើម្បីត្រៀមខ្លួនចូលប្រកួតប្រជែងដណ្តើមមេដាយជូនកម្ពុជា ពីការប្រកួតកម្រិតអន្តរជាតិនានា និងត្រៀមស៊ីហ្គេម លើកទី៣២ ឆ្នាំ ២០២៣ ដែលកម្ពុជាធ្វើជាម្ចាស់ផ្ទះ។
កីឡាករ សាលី អូមើត ដែលកំពុងហ្វឹកហាត់ ក្នុងប្រទេសនៃតំបន់អឺរ៉ុបមួយនេះ បានប្រាប់ឱ្យដឹងតាមបណ្តាញអនឡាញថា៖ «ខ្ញុំបានមកហ្វឹកហាត់រយៈពេល ១ ខែហើយ ជាមួយម៉ូតូថ្មីដែលសហព័ន្ធ បានទិញ និងប្រគល់ជូន ប៉ុន្តែបច្ចុបប្បន្ន កំពុងជួបការលំបាកខ្លះៗ លើបញ្ហាអាកាសធាតុត្រជាក់ខ្លាំង ទាំងនៅកន្លែងស្នាក់នៅ និងកន្លែងហ្វឹកហាត់»។
ម្ចាស់មេដាយមាសកីឡាអាស៊ីរូបនេះ បានបញ្ជាក់ថា៖ «តែទោះជាយ៉ាងណាក៏ដោយ ដើម្បីទទួលបានបទពិសោធ ព្រមទាំងចំណេះជំនាញថ្មីៗ និងទេព្យកោសលថ្មីៗ យកទៅចែករំលែកដល់កីឡាករម៉ូតូទឹកកម្ពុជា ឱ្យកាន់តែរីកចម្រើនបន្ថែមទៀតនោះ ខ្ញុំត្រូវតែព្យាយាម ព្រោះដៃគូជាគ្រូបង្វឹក នៅប្រទេសអូទ្រីសនេះ គាត់ជាម្ចាស់មេដាយមាសពិភពលោក»។
សាលី អូមើត បានថតជាមួយម្ចាស់មេដាយមាសពិភពលោករបស់ប្រទេសអូទ្រីស ហើយបុរសម្នាក់នេះ ក៏ជាអ្នកបង្វឹករូបគេ ផងដែរ។ រូប សហការី
សាលី អូមើត ជាកីឡាករម៉ូតូទឹក ដែលឈ្នះមេដាយមាសកីឡាអាស៊ីជូនកម្ពុជា ហើយកីឡាកររូបនេះ ក៏ជាជើងខ្លាំងមួយរូប ធ្លាប់ប្រជែងដណ្តើមបានមេដាយបានជូនក្លិប ពីការប្រកួតកម្រិតពិភពលោក ជាច្រើនព្រឹត្តិការណ៍កន្លងមក។ គោលបំណងធំរបស់ សាលី អូមើត គឺរូបគេ ចង់ឈ្នះមេដាយមាស ស៊ីហ្គេម លើកទី៣២ ឆ្នាំ ២០២៣ ដែលកម្ពុជាធ្វើជាម្ចាស់ផ្ទះ។
ចំណែកលោក វ៉ាត់ ចំរើន អគ្គលេខាធិការ CAMSOC បានប្រាប់ថា៖ «ឆ្នាំ២០២២ ជាឆ្នាំដែលសម្រុកហ្វឹកហាត់ ហើយសម្រាប់វិញ្ញាសារប្រភេទកីឡាម៉ូតូទឹកនេះ បេក្ខជនល្អផ្តាច់គេ ដែលកម្ពុជា ផ្តល់ក្តីសង្ឃឹម គឺ សាលី អូមើត ព្រោះគាត់មានសមត្ថភាពប្រជែងដណ្តើមមេដាយមាសជូនកម្ពុជា ប៉ុន្តែយើងមិនអាចបំភ្លេចនូវបញ្ហាហ្វឹកហាត់សម្រួច ត្រៀមឱ្យល្អនោះឡើយ ពិសេសការហ្វឹកហាត់ នៅក្រៅប្រទេស ដ្បិតអីការហ្វឹកហាត់ជាមួយគ្រូល្អ មានបទពិសោធល្អ និងជាម្ចាស់មេដាយពិភពលោកផងនោះ គឺធ្វើឱ្យយើង មានគុណផលល្អណាស់»។
លោក វ៉ាត់ ចំរើន បានបន្តថា៖ «ហ្វឹកហាត់ជាមួយនឹងម៉ូតូទឹកថ្មី សមឱ្យស្គាល់ច្បាស់ ដែលសហព័ន្ធ ទើបទិញឱ្យ ពិសេសបានហ្វឹកហាត់ជាមួយកីឡាម្ចាស់មេដាយមាសពិភពលោករបស់ប្រទេសអូទ្រីសផងដែរ គឺជាឱកាសល្អបំផុត ហើយចំពោះប្រភេទកីឡាណា ដែលធ្លាប់ដណ្តើមបានមេដាយអន្តរជាតិ គឺយើងខិតខំស្វែងរកទីតាំង និងកន្លែងហាត់ឱ្យបានល្អ ទើបរក្សាបានជយជម្នះ»។
គួររំឭកថា កីឡាករ សាលី អូមើត ជាកូនកាត់ខ្មែរ-ឥស្លាម ដែលពីដំបូងទៅធ្វើជាកម្មករនៅប្រទេសថៃ បន្ទាប់មកមានឱកាសបានហាត់ជិះម៉ូតូទឹកកម្សាន្តលេង ប៉ុន្តែក្រោយមកទៀត មានទេព្យកោសល្យល្អ ត្រូវបានគ្រូបង្វឹកប្រទេសថៃ ផ្តល់ឱកាសឱ្យចូលរួមហ្វឹកហាត់ និងប្រកួតនៅប្រទេសថៃ ក្នុងព្រឹត្តិការណ៍អន្តរជាតិជាច្រើន និងដណ្តើមបានពាន និងមេដាយមាស ប្រាក់ និងសំរឹទ្ធ ជាច្រើនដង។ ជាមួយភាពល្បីល្បាញ និងមានលទ្ធផលល្អនេះ កីឡាករ សាលី អូមើត បាននឹកឃើញ ដោយចង់លេងតំណាងឱ្យប្រទេសកម្ពុជាវិញ គឺមិនតំណាងឱ្យប្រទេសគេនោះឡើយ៕
