.jpg)
លោក វ៉ាត់ ចំរើន (ឆ្វេង) និងលោក ថោង ខុន ពេលចូលរួមកិច្ចប្រជុំ កាលពីថ្ងៃអង្គារ។ រូបថត CAMSOC
ភ្នំពេញ: កម្ពុជាបានក្លាយជាប្រទេសដំបូងគេ ដែលត្រូវបានបណ្តាប្រទេសនៅក្នុងតំបន់អាស៊ាន គាំទ្រឱ្យបង្កើត ឬនិពន្ធបទភ្លេងគោរពទង់ស៊ីហ្គេម ដែលជាស្នាដៃសម្រាប់ប្រើប្រាស់ជាប្រវត្តិសាស្ត្រក្នុងព្រឹត្តិការណ៍ថ្នាក់តំបន់ដ៏ធំមួយនេះ ហើយស្របពេលជាមួយគ្នានេះ កម្ពុជាក៏មានគម្រោងរៀបចំពិធីបើក និងពិធីបិទការប្រកួតកីឡាស៊ីហ្គេមលើកទី៣២ ឆ្នាំ ២០២៣ ជាលើកដំបូង លើទឹកដីរបស់ខ្លួន ឱ្យមានលក្ខណៈធំ និងអស្ចារ្យផងដែរ។
អ្នកជំនាញផ្នែកកីឡារបស់គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ ២០២៣ ហៅកាត់ថា CAMSOC លោក វ៉ាត់ ចំរើន ចាត់ទុកការទទួលបានការគាំទ្រពីបណ្តាប្រទេសនៅអាស៊ាន ដើម្បីឱ្យកម្ពុជានិពន្ធបទភ្លេងគោរពទង់ស៊ីហ្គេមនេះថា ជាមោទនភាពដ៏ធំ ព្រោះបទភ្លេងនេះ នឹងក្លាយជាស្នាដៃជាប្រវត្តិសាស្ត្ររបស់កម្ពុជា នៅក្នុងព្រឹត្តិការណ៍ស៊ីហ្គេមនេះ។
លោក វ៉ាត់ ចំរើន ថ្លែង បន្ទាប់ពីកិច្ចប្រជុំរបស់គណៈកម្មការ CAMSOC កាលពីថ្ងៃអង្គារថា៖ «អ្វីដែលចាប់អារម្មណ៍ខ្លាំងបំផុត គឺយើងកំពុងធ្វើកម្មវិធីបើក-បិទ ស៊ីហ្គេម ឆ្នាំ ២០២៣ ឱ្យមានលក្ខណៈអស្ចារ្យ និងទាក់ទាញបំផុត ជាងកម្មវិធីផ្សេងៗទៀត ហើយជាមួយគ្នានេះ បណ្តាប្រទេសអាស៊ីអាគ្នេយ៍ បានឯកភាពគ្នាស្នើសុំឯកឧត្តមបណ្ឌិត ថោង ខុន ក្នុងពេលដែលឯកឧត្តមបណ្ឌិតក្លាយជាប្រធានក្រុមប្រឹក្សាកីឡាអាស៊ីអាគ្នេយ៍ ជួយរៀបចំនិពន្ធបទភ្លេងគោរពទង់ស៊ីហ្គេម ឆ្នាំ ២០២៣ ហើយបន្តយកទៅប្រើប្រាស់សម្រាប់ស៊ីហ្គេម នាពេលខាងមុខជាបន្តបន្ទាប់»។
លោកបន្តថា៖ «បញ្ហាលើការគោរពទង់ស៊ីហ្គេមនេះ គឺមិនទាន់មានបទភ្លេង ពេលគោរពទង់ស៊ីហ្គេមនៅឡើយទេ ហើយស៊ីហ្គេមចំនួន ៣១ លើក រយៈពេលជាង ៦០ ឆ្នាំកន្លងមក គឺពេលគោរពទង់ស៊ីហ្គេម បណ្តាប្រទេសជាម្ចាស់ផ្ទះស៊ីហ្គេម បានចាក់បទភ្លេងផ្សេងៗ ពោលគឺមិនទាន់មានបទភ្លេង ១ ដែលត្រូវបានប្រើប្រាស់ជារួម សម្រាប់ម្ចាស់ផ្ទះនីមួយៗនោះទេ ហេតុនេះ វាជាមោទនភាពមួយរបស់កម្ពុជា ពេលធ្វើជាម្ចាស់ផ្ទះ និងទទួលបានការអនុញ្ញាតបង្កើតបទភ្លេងគោរពទង់ស៊ីហ្គេមនេះ តែម្តង»។
CAMSOC នៅមិនទាន់បានប្រជុំលម្អិតទៅលើការនិពន្ធបទភ្លេងនេះនោះទេ ប៉ុន្តែលោក វ៉ាត់ ចំរើន បានអះអាងថា យើងនឹងព្យាយាមធ្វើឱ្យសម្រេច ដើម្បីជាមោទនភាពជាតិកម្ពុជាយើងទាំងមូល ហើយបទភ្លេងគោរពទង់រួមនេះ នឹងមានវត្តមានលើកដំបូងនៅពេលកម្ពុជា រៀបចំពិធីបើកការប្រកួតស៊ីហ្គេមលើកទី២៣ ឆ្នាំ ២០២៣ នៅពហុកីឡដ្ឋានជាតិមរតកតេជោ ដែលត្រូវបានរាជរដ្ឋាភិបាលកម្ពុជា កំណត់យកថ្ងៃទី ៥ ខែឧសភា ខណៈពិធីបិទ គឺនៅថ្ងៃទី ១៧ ខែ ឧសភា ឆ្នាំ ២០២៣។
លោក វ៉ាត់ ចំរើន បានបញ្ជាក់ថា៖ «ក្រោយពីចេញពីស៊ីហ្គេមនៅកម្ពុជា ទៅក្រោមភាពជាអ្នកដឹកនាំរបស់ឯកឧត្តមបណ្ឌិត ថោង ខុន ជាប្រធានប្តូរវេននោះ នឹងត្រូវចារចូលក្នុងកំណត់ត្រាប្រវត្តិសាស្ត្រអាស៊ានថា បទភ្លេងគោរពទង់ស៊ីហ្គេម ត្រូវបានបង្កើតឡើងនៅស៊ីហ្គេមលើកទី៣២ នៅព្រះរាជាណាចក្រកម្ពុជា។ កន្លែងនេះ គឺជាចំណុចពិសេសដែលយើងនឹងព្យាយាមធ្វើឱ្យបានសម្រេច ដើម្បីជាមោទនភាពជាតិកម្ពុជាយើងទាំងមូល ក៏ដូចជាបង្ហាញជូនមិត្តអន្តរជាតិថា កម្ពុជាពិតជាមានសមត្ថភាពអាចធ្វើទៅបាន ដោយអាចធ្វើឱ្យមានភាពប្រែប្រួលលក្ខណពិសេសលើចំណុចមួយចំនួន»៕
