ក្រុងប៉ារីស: កីឡាការិនី Pernille Harder បានស៊ុតបញ្ចូលទី ១ គ្រាប់ ដើម្បីជួយឱ្យក្រុមនារី Chelsea ដែលចាញ់ក្នុងវគ្គផ្ដាច់ព្រ័ត្ររដូវកាលមុន ដណ្ដើមបាននូវជ័យជម្នះយ៉ាងប្រផិតប្រផើយ ២-១ លើក្រុមនារី Juventus ពីការប្រកួតវគ្គសន្សំពិន្ទុតាមពូលរបស់ក្របខ័ណ្ឌ UEFA Women''s Champions League កាលពីថ្ងៃពុធ។
ក្រុមភ្ញៀវ Chelsea របស់អង់គ្លេស ដែលកាលពីសប្ដាហ៍មុន ប្រកួតស្មើ ៣-៣ ជាមួយក្រុមនៅអាល្លឺម៉ង់ Wolfsburg បានបើកការនាំមុខក្រុម Juve មុនតាមរយៈការស៊ុតរបស់ខ្សែប្រយុទ្ធសញ្ជាតិស្កុតឡេន Erin Cuthbert ពេលការប្រកួត ដំណើរការទៅបានកន្លះម៉ោង តែក្រុមម្ចាស់ផ្ទះតាមស្មើវិញ នៅប៉ុន្មាននាទីបន្ទាប់ពីនោះ ដោយសារការស៊ុតបាល់ក្នុងលំហពីសំណាក់កីឡាការិនីចាស់វស្សាសញ្ជាតិអ៊ីតាលី Barbara Bonansea។
តែក្រោយមកខ្សែប្រយុទ្ធអន្តរជាតិដាណឺម៉ាក Harder ដែលផ្លាស់ពីក្រុម Wolfsburg មកក្រុម Chelsea ក្នុងតម្លៃខ្លួនជាកំណត់ត្រាពិភពលោក សម្រាប់កីឡាការិនី ក្នុងឆ្នាំ ២០២០ បានធ្វើចលនាយ៉ាងរហ័សតម្រង់ទៅរកបាល់ ដែលបុកខ្លួនខ្សែការពារ ហើយឡង ដោយការស៊ុតផុតដៃអ្នកចាំទី Pauline Peyraud Magnin របស់ក្រុម Juve ចូលទីយ៉ាងស្អាត។
១ គូទៀត ក្រុម Wolfsburg បានលត់ក្រុម Servette ដែលមកពីប្រទេសជិតខាងស្វ៊ីស ៥-០។ ៥ គ្រាប់របស់ក្រុម Wolfsburg នោះ ២ គ្រាប់ស៊ុតដោយកីឡាការិនី Tabea Wassmuth ខណៈដែលកីឡាការិនី Svenja Huth, Dominique Janssen និង Joelle Smits ធ្វើបានសម្រេចម្នាក់ ១ គ្រាប់ដូចគ្នា។
ក្រុម Chelsea និង Wolfsburg ឈរទី១ និងទី២ ក្នុងពូល ដោយមាន ៤ ពិន្ទុស្មើគ្នា ដោយគ្រាន់តែមានគ្រាប់បាល់ចំណេញខុសគ្នា។ ចំណែក Juve ឈរលេខ ៣ ក្រោយបញ្ចប់ ២ ហ្គេម ឈ្នះ ១ ដង និងចាញ់ ១ ដង៕ AFP/VN