.jpg)
លោក Thomas Bach ប្រធាន IOC ពេលថ្លែងសុន្ទរកថា កន្លងមក។ AFP
ក្រុងឡូសាន: គណៈកម្មាធិការអូឡាំពិកអន្តរជាតិ (IOC) កាលពីថ្ងៃសៅរ៍ បានធ្វើការរិះគន់ចំពោះគម្រោងផែនការរបស់សហព័ន្ធបាល់ទាត់ពិភពលោក (FIFA) ដែលមានបំណងចង់រៀបចំការប្រកួត World Cup ផ្នែកបុរស ២ ឆ្នាំម្ដង ដោយសម្ដែងការបារម្ភពីផលប៉ះពាល់ ដែលអាចនឹងកើតមាន ចំពោះវិស័យកីឡាផ្សេងៗទៀត។
គម្រោងផែនការដែលមានការគាំទ្រពីសំណាក់អតីតអ្នកចាត់ការក្រុម Arsenal លោកArsene Wenger ដែលពេលនេះ ធ្វើការឱ្យ FIFA ទទួលបាននូវការរិះគន់យ៉ាងខ្លាំងពីសំណាក់សហព័ន្ធបាល់ទាត់អឺរ៉ុប (UEFA) និងសហព័ន្ធបាល់ទាត់អាមេរិកឡាទីន (CONMEBOL) ក៏ដូចជាអ្នកចាត់ការក្រុម និងអ្នកវិភាគនានាផងដែរ។
IOC បានគូសបញ្ជាក់បន្ថែមពីសំឡេងរបស់ខ្លួន ចំពោះអ្នកដែលមិនយល់ស្របនឹងសំណើនោះ ដោយប្រាប់ថា សហព័ន្ធកីឡាផ្សេងៗជាច្រើនបានជំទាស់នឹងគំនិតនោះ។
IOC បានឱ្យដឹង ក្នុងសេចក្ដី ប្រកាសរបស់ខ្លួនថា៖ «ក្រុមប្រឹក្សាប្រតិបត្តិ (EB) នៃគណៈកម្មាធិការអូឡាំពិកអន្តរជាតិ (IOC) ធ្វើការកត់សម្គាល់ ចំពោះគម្រោងផែនការរបស់ FIFA ក្នុងការចង់ផ្លាស់ប្តូរកាលវិភាគ នៃការប្រកួតបាល់-ទាត់ ដោយការរៀបចំ World Cup រៀងរាល់ ២ ឆ្នាំម្តង»។
«សហព័ន្ធអន្តរជាតិ (IFs) នៃកីឡាផ្សេងៗ សហព័ន្ធបាល់ទាត់ជាតិក្លិបអាជីព សមាគមកីឡាករ និងគ្រូបង្វឹកជាច្រើន បាននាំគ្នាបញ្ចេញនូវការសង្ស័យ និងក្ដីបារម្ភយ៉ាងខ្លាំង ពាក់ព័ន្ធនឹងគម្រោងការ ដែលនឹងបង្កើនប្រាក់ចំណូលបន្ថែមដល់ FIFA»។ នេះជាការរៀបរាប់បន្តក្នុងសេចក្ដីប្រកាសរបស់ IOC នោះ។
IOC បានធ្វើជាតារាងពីផលប៉ះពាល់នោះ ចំពោះកីឡាដទៃផ្សេងទៀត ការប្រឈមបន្ថែមទៀតដល់ការលើកតម្កើងចំពោះបាល់ទាត់នារី និងការបង្កក្ដីកង្វល់ដ៏ធំបន្ថែមទៀតចំពោះសុខភាពរបស់កីឡាករ ដែលជាមូលហេតុមិនបានលេង World Cup ទៀងទាត់ជាងនេះ។
ក្នុងសេចក្ដីប្រកាសនោះ បានបន្ថែមថា៖ «IOC សូមចែករំលែកនូវការបារម្ភ និងគាំទ្រឱ្យមានការអំពាវនាវដល់អ្នកពាក់ព័ន្ធនឹងវិស័យបាល់ទាត់ សហព័ន្ធកីឡាអន្តរជាតិ និងអ្នករៀបចំព្រឹត្តិការណ៍ធំៗនានា ឱ្យបង្កើតនូវកិច្ចពិភាក្សាដ៏ទូលំទូលាយមួយ ក្នុងនោះរួមជាមួយអ្នកតំណាងរបស់អត្តពលិកដែរ ដែលមិនទាន់កើតចេញជារូបរាងនៅឡើយ»។
គិតតាំងពីការប្រារព្ធលើកដំបូង ក្នុងឆ្នាំ ១៩៣០ មកព្រឹត្តិការណ៍ World Cup តែងតែត្រូវបានរៀបចំឡើងរៀងរាល់ ៤ ឆ្នាំម្ដង លើកលែងការផ្អាក អំឡុងសង្គ្រាមលោកលើកទី២ ម្ដងប៉ុណ្ណោះ។ FIFA ក៏ចង់ឱ្យការប្រកួតប្រចាំទ្វីប ក្នុងនោះ រួមទាំង Euro នៅអឺរ៉ុប និង Copa America នៅអារមេរិកឡាទីនដែរនោះ កើតឡើងរៀងរាល់ ២ ឆ្នាំម្ដងដូចគ្នា៕ AFP/VN
