ក្រុងឡេសេស្ទ័រ: លោក Ole Gunnar Solskjaer បានអះអាងថា សម្ពាធកំពុងតែមានការកើនឡើង ខណៈគ្រូបង្វឹកពេញដោយកង្វល់រូបនេះត្រូវ បានសួរពីមហិច្ឆតារបស់ក្រុមបិសាច Manchester United (Man Utd) ក្រោយពីរងបរាជ័យ ៤-២ នៅផ្ទះរបស់ក្រុមកញ្ជ្រោងខៀវ Leicester City។
លោក Solskjaer នឹងត្រូវប្រឈមជាមួយការពិនិត្យតាមដានជាថ្មី បន្ទាប់ពីបរាជ័យរបស់ក្រុម Man Utd នៅឯកីឡដ្ឋាន King Power ដែលធ្វើឱ្យពួកគេមិនឈ្នះសូម្បី ១ ដង ពីការប្រកួត ៣លើកចុងក្រោយរបស់ពួកគេនៅ Premier League។
«ទម្រង់លេងទាំងមូល មិនល្អគ្រប់គ្រាន់នោះទេ ទោះមាន ឬមិនមានបាល់»។ នេះជាការលើកឡើងរបស់អ្នកចាត់ការ លោក Solskjaer ដែលក្រុម Man Utd របស់លោក បាននាំមុខ ពីការបាញ់ (ស៊ុតពេញកម្លាំង) ក្រៅតំបន់គ្រោះថ្នាក់របស់ខ្សែប្រយុទ្ធ Mason Greenwood មុននឹងខ្សែបម្រើ Youri Tielemans ស៊ុតឱ្យក្រុម Leicester ស្មើវិញ មុនចប់វគ្គទី១។
ប្រមាណ ១២ នាទីចុងក្រោយ ខ្សែការពារ Caglar Soyuncu តែតឱ្យក្រុមកញ្ជ្រោងខៀវនាំមុខវិញម្ដង តែត្រូវបានក្រុមភ្ញៀវតាមស្មើវិញ ជាមួយនឹងគ្រាប់បាល់ពីការបង្ហាញខ្លួនលើកដំបូងរបស់ខ្សែប្រយុទ្ធ Marcus Rashford នារដូវកាលនេះ បន្ទាប់ពីធ្វើការវះកាត់ស្មាហើយ។
យ៉ាងណាក៏ដោយ ការបញ្ចប់មួយប្រកបទៅដោយការរំជួលចិត្តបង្ហាញឱ្យឃើញថា ក្រុមម្ចាស់ផ្ទះ Leicester បានមកកាត់ផ្ដាច់ដំណើរផ្លូវ ដែលជាការកំណត់ត្រានៃការលេងមិនចាញ់សោះ ២៩ ហ្គេម ក្នុងលីគអង់គ្លេស នៅក្រៅផ្ទះរបស់ក្រុម Man Utd ជាមួយនឹងគ្រាប់បាល់ ២ គ្រាប់បន្ថែម ពីខ្សែប្រយុទ្ធ Jamie Vardy និង Patson Daka ដែលកើតឡើង ក្នុងរង្វង់ប្រមាណជា ៧ នាទីចុងក្រោយ។
វាជាការខកចិត្តដ៏ជូរចត់ សម្រាប់លោក Solskjaer ដែលបាននិងកំពុងអត់ធ្មត់ជាមួយការរិះគន់រួចរាល់ បន្ទាប់ពីក្រុម Man Utd ចាញ់ក្រុម Aston Villa និងស្មើជាមួយក្រុម Everton ពីការប្រកួតចុងក្រោយ។ ទោះបីជាលោក Solskjaer ទំនងជាមិនត្រូវបានប្រឈមនឹងការដេញចេញឆាប់ៗនេះក៏ដោយ ក៏គ្រូបង្វឹកសញ្ជាតិន័រវែស ត្រូវយកជ័យជម្នះ ដ៏គួរឱ្យសម្គាល់បានខ្លះ ក្នុងអំឡុងពេលតេស្ត ដើម្បីធានាតួនាទីរបស់គាត់ ពេលជួបជាមួយក្រុម Liverpool, Tottenham និង Manchester City នៅលីគ ព្រមទាំងការជួបក្រុម Atalanta ចំនួន ២ ដង សម្រាប់ក្របខ័ណ្ឌ Champions League។
«រាល់ពេល អ្នកចាញ់ ពិតណាស់ សម្ពាធនឹងកើតមានឡើងជារឿងធម្មតា តែយើងស៊ាំនឹងការ-រស់ជាមួយសម្ពាធនោះហើយ។ យើងគឺក្រុម Man Utd។ យើងត្រូវតែប្រសើរឡើងវិញ។ ពេលខ្លះ ប្រហែលជាមានការផ្លាស់ប្ដូរ។ តើយើងត្រូវការមានជើងបន្ថែមទៀតឬ? តើអ្វីដែលពួកយើងត្រូវការ? វាជាបញ្ហាមួយ ដែលយើងត្រូវរកឱ្យឃើញ ប្រាកដណាស់»។ លោក Solskjaer បានបន្ថែម ខណៈពេលនេះ Man Utd ធ្លាក់ទៅឈរនៅលំដាប់ទី៥ មាន ១៤ ពិន្ទុ៕ AFP/VN