ភ្នំពេញ៖ អង្គការផ្កាយសមុទ្រកម្ពុជា (ISF) សហការជាមួយក្រុមហ៊ុនធានារាប់រង AIA Cambodia នឹងរៀបចំកម្មវិធីរៃអង្គាសថវិកា តាមរយៈការលក់សំបុត្រចូលរួមផ្សងសំណាងឈ្នះអាវ ដែលមានរយៈពេលមួយខែ ដោយអ្នកមានសំណាង នឹងទទួលបានអាវកីឡាករពាក់ ក្នុងការប្រកួត រវាងក្រុម Tottenham Hotspur (Spurs) និងក្រុម Sheffield United កាលពីខែឧសភា ឆ្នាំ ២០២១។
អាវកីឡារចនាដ៏ស្អាតនេះ ចុះហត្ថលេខាដោយកីឡាករទាំងអស់ ក្នុងក្រុមដំបូងគេរបស់ក្លិប THFC ប្រចាំឆ្នាំ ២០២០-២០២១ ដែលរចនា ដោយអក្សរខ្មែរពីកម្ពុជា រវាងដៃគូមានក្រុមហ៊ុន AIA Cambodia ជាមួយនឹងនិមិត្តសញ្ញារបស់អង្គការផ្កាយសមុទ្រកម្ពុជា (ISF) នៅផ្ទៃខាងមុខទៀតផង ខណៈដែលអក្សខ្មែរបង្ហាញតាមរយៈអាវ ក្នុងទីលានប្រកួត គឺជាមោទនភាពរបស់កម្ពុជា។ ចំណែកសំបុត្រចូលរួមកម្មវិធី Raffle អាចជាវបានចាប់ពីទឹកប្រាក់យ៉ាងតិច១ដុល្លារ និងអាចជាវបានតាមបីរបៀប។
នាយិការអង្គការផ្កាយសមុទ្រ ជួប វិច្ឆិកា បានពន្យល់លម្អិតថា៖«វិធីដើម្បីចូលរួមមាន ៣ របៀប គឺទី១ តាមអនឡាញ ត្រូវតំណភ្ជាប់ទៅនឹង isfcambodia ទី២ តាមរយៈធនាគារ ABA គណនីលេខ 002345589 ឈ្មោះគណនី Indochina Starfish Foundation ហើយទី៣ តាមរយៈ Pi Pay លេខទូរស័ព្ទ 098977981 គណនីឈ្មោះ ISF Cambodia ដើម្បីស្វែងយល់ពីលក្ខខណ្ឌ ក្នុងការចូលរួម ត្រូវបានអនុវត្ត»។
នាយិការរូបនេះ បានឱ្យជាឧទាហរណ៍ថា៖ «១០ ដុល្លារ នឹងជាវបានសំបុត្រចំនួន ១០ សន្លឹក តែអ្នកចូលរួម ត្រូវបញ្ចូលនូវអ៊ីម៉ែល រឺលេខទូរស័ព្ទឱ្យបានត្រឹមត្រូវ។ បើសិនអ្នកឈ្នះមិនបានផ្តល់នូវអ៊ីម៉ែល និងលេខទូរស័ព្ទត្រឹមត្រូវនោះទេ រង្វាន់នឹងត្រូវបានផ្តល់ជូនអ្នកឈ្នះបន្ទាប់។នេះមិនផ្តោតទៅលើការរកប្រាក់ចំណូលទេ គឺជាការទាញការចាប់អារម្មណ៍ពីបងប្អូនខ្មែរ ដើម្បីជំរុញឱ្យឃើញថា លើវាលស្មៅបាល់ទាត់នៅឆាកអន្តរជាតិមានរចនាអក្សរខ្មែរ លើអាវកីឡាករដោយមានហត្ថលេខាក្រុមបាល់ទាត់ Spurs ដែលនោះហើយ ជាមោទនភាពខ្លាំងរបស់កម្ពុជា»។
ការចាប់ឆ្នោតស្វែងរកអ្នកឈ្នះ មានសំណាង នឹងប្រព្រឹត្តទៅថ្ងៃសុក្រទី ១២ ខែ វិច្ឆិកា ឆ្នាំ ២០២១។ អ្នកឈ្នះ នឹងទទួលព័ត៌មានតាមអ៊ីម៉ែល រឺតាមទូរស័ព្ទ ហើយនឹងត្រូវបានប្រកាសតាមបណ្តាញសង្គមផងដែរ។
លោក យិន សាមឌី អ្នកសម្របសម្រួលព័ត៌មានរបស់ ISF បានប្រាប់ថា៖ «អង្គការផ្កាយសមុទ្រ មានទស្សនៈ និងមូលនិធិទ្រទ្រង់កុមារាកុមារីកម្ពុជា ក្នុងវិស័យបាល់ទាត់ ហើយទទួលបានពានរង្វាន់ និងមានបទពិសោធជាង ១៥ ឆ្នាំ ក្នុងការប្រើប្រាស់ការអប់រំកីឡា និងគម្រោងអភិវឌ្ឍសហគមន៍ ដើម្បីផ្តល់ជំនួយដល់កុមារងាយរងគ្រោះ នៅកម្ពុជា ព្រមទាំងក្រុមគ្រួសាររបស់ពួកគេ ឱ្យរួចចាកផុតពីភាពក្រីក្រ ពិសេសបានបណ្តុះបណ្តាលបាល់ទាត់អាជីពបានច្រើនកន្លងមក»។
លោកបន្តថា អង្គការបានដឹកនាំ ដោយសហគមន៍ ត្រូវបានផ្តួចផ្តើមឡើង ដោយបុគ្គលិកកម្មវិធី ដែលមានបទពិសោធជាច្រើន ក្នុងការធ្វើការយ៉ាងជិតស្និតជាមួយអាជ្ញាធរមូលដ្ឋាន ដើម្បីបង្កើតការផ្លាស់ប្តូរប្រកបដោយនិរន្តរភាព នៅក្នុងទីក្រុងភ្នំពេញ និងខេត្តមួយចំនួន នៃប្រទេសកម្ពុជាទាំងមូល ហើយបច្ចុប្បន្ន យើងកំពុងធ្វើការជាមួយសិស្សានុសិស្ស សរុប ៧០៨ នាក់តាមរយៈការសិក្សាល្បឿនលឿន ក្នុងកម្មវិធីអប់រំពន្លឿន និងការសិក្សាថ្នាក់ឧត្តមផងដែរ។ សិស្សទាំងអស់ ក្រៅពីបណ្តុះបណ្តាលផ្នែកកីឡា គឺទទួលបានការឧបត្ថម្ភគាំទ្រ ជាសម្លៀកបំពាក់ឯកសណ្ឋានសាលា សម្ភារសិក្សា និងកញ្ចប់អាហារ ប្រចាំខែធ្វើឱ្យកូនខ្មែរមានក្តីសង្ឃឹម។
ចំពោះកម្មវិធីបាល់ទាត់ ដែលទទួលបានពានរង្វាន់របស់អង្គការផ្កាយសមុទ្រ បានកំពុងរៀបចំសកម្មភាពកីឡា ដើម្បីការអភិវឌ្ឍសម្រាប់កីឡាករវ័យក្មេងជាង ៣ ០០០ នាក់ រួមមានកីឡាករពិការ និងកុមារផ្ទុកមេរោគអេដស៍ កុមារគរថ្លង់ផងដែរ ហើយកីឡាករទាំងនោះបានចូលរួមរៀនសូត្រ ក្នុងកម្មវិធីសិក្សា និងបាល់ទាត់បណ្តុះបណ្តាលថ្នាក់បឋម។
លោក យិន សាមឌី បានបន្ថែមទៀតថា៖ «ផលចំណេញបានជួយ គឺបន្ធូរការលំបាករួមចំណែកជួយដល់សង្គមជាតិ ដោយពួកគេបានរៀនសូត្រនូវជំនាញទន់ភ្លន់ ដូចជាភាពជាអ្នកដឹកនាំ ការធ្វើការងារជាក្រុម និងការដោះស្រាយបញ្ហា ដែលប្រឈម និងជួយឱ្យពួកគាត់ទទួលបានភាពរីកចម្រើន ក្នុងជីវិតរបស់ខ្លួន នៅថ្ងៃអនាគត»៕