ក្រុងឡុងដ៍: លោក Thomas Tuchel បានទះដៃសរសើរអ្នកចាំទី Edouard Mendy ដែលបង្ហាញនូវទម្រង់លេងយ៉ាងអស្ចារ្យ ក្នុងការជួយឱ្យក្រុមតោខៀវ Chelsea ឈ្នះក្រុមម្ចាស់ផ្ទះ Brentford ទាំងលំបាក ១-០ សម្រាប់ការប្រកួត នៅក្របខ័ណ្ឌ Premier League កាលពីថ្ងៃសៅរ៍។
ក្រុម Chelsea បានធ្លាក់ចេញពីអ្នកនាំមុខគេ ក្នុងតារាង ពេលក្រុមហង្សក្រហម Liverpool បំបាក់ក្រុមម្ចាស់ផ្ទះ Watford គ្មានប្រណី ៥-០ ក្នុងការប្រកួត នៅប៉ុន្មានម៉ោងមុនហ្នឹង តែក្រុមរបស់លោក Tuchel បានដណ្ដើមយកចំណាត់ថ្នាក់ទី ១ មកវិញ ជាមួយនឹងជ័យជម្នះពីជំនួបក្នុងលីគជាលើកដំបូង រយៈពេល ៧៤ ឆ្នាំ ជាមួយក្រុមក្បែរខាងនៅភាគខាងលិចក្រុងឡុងដ៍។
ការស៊ុត ១ គ្រាប់យ៉ាងស្រួចរបស់ខ្សែការពារ Ben Chilwell ក្នុងម៉ោងបន្ថែមមានរបួសនៃវគ្គទី១ គឺគ្រប់គ្រាន់នាំជ័យជម្នះឱ្យក្រុមតោខៀវជាលើកទី៦ ក្នុងចំណោមការប្រកួត ៨ លើក នៅលីគ។ តែយ៉ាងណាក្ដី គ្រាប់បាល់នោះ ក៏ទំនងជាមិនអាចដណ្ដើមបាន ៣ ពិន្ទុដែរ ប្រសិនបើមិនបានការជួយសង្គ្រោះជាបន្តបន្ទាប់របស់អ្នកចាំទី Mendy ពីការស៊ុតយ៉ាងល្អៗ នៅចុងម៉ោង នៃការប្រកួតទេនោះ។
«ពួកគេបានបង្កបញ្ហាឱ្យអ្នកជាមួយនឹងការបោះបាល់ (គប់បាល់) រយៈឆ្ងាយ និងការទាត់ហ្វ្រីឃិក។ ពួកគេបានបង្កើតឱកាសល្អជាច្រើន ដែលអាចកើតមានគ្រាប់បាល់បាន តែ Mendy គឺជាកីឡាករដ៏សំខាន់ ក្នុងការជួយរារាំង មិនឱ្យរបូតគ្រាប់បាល់»។ នេះជាការលើកឡើងរបស់គ្រូបង្វឹកក្រុម Chelsea លោក Tuchel។
អ្នកចាត់ការសញ្ជាតិអាល្លឺម៉ង់ លោក Tuchel បានបន្តទៀតថា៖ «យើងមានភាពរឹងមាំល្អរយៈពេល ៧០ នាទី និងមានសំណាងល្អ នៅ ២០ នាទីចុងក្រោយ ដើម្បីបានជ័យជម្នះនេះ។ យើងបានរួចខ្លួនជាមួយនឹងការឈ្នះ ៣ ពិន្ទុ ដោយសារ Mendy»។
«នៅជិតចប់ វាហាក់បីដូចជាការប្រកួតដណ្ដើមពានរង្វាន់អ៊ីចឹង ពួកគេហ៊ានលេង ហើយបរិកាស បានជួយផ្ដល់ការជំរុញចិត្តយ៉ាងច្រើនដល់ពួកគេ។ វាជារឿងប្រសើរណាស់ ក្នុងការបានឡើងទៅនៅទីកំពូលតារាងវិញ តែមានក្រុមជាច្រើន ដែលកំពុងតាមមកប្រកិតៗ»។ នេះជាការបន្ថែមរបស់លោក Tuchel។
ដូច្នេះ ក្រោយបញ្ចប់សប្ដាហ៍ទី ៨ សម្រាប់គូប្រកួត កាលពីថ្ងៃសៅរ៍នេះ ក្រុម Chelsea កំពុងឈរទី១ ក្នុងតារាងពិន្ទុរបស់ Premier Leagueដោយមាន ១៩ ពិន្ទុ ខណៈដែលក្រុមលេខ ២ Liverpool តាមពីក្រោយ ១ ពិន្ទុ ហើយក្រុមការពារជើង Manchester City ដែលនៅលេខ ៣ តាមពីក្រោយ ២ ពិន្ទុ៕ AFP/VN