ក្រុងមេនឆេស្ទ័រ: ខ្សែបម្រើសញ្ជាតិបារាំង Paul Pogba បានធ្វើការវាយតម្លៃយ៉ាងទាបចំពោះសភាពនៃទម្រង់លេងរបស់ក្រុមបិសាចក្រហម Manchester United (United) បន្ទាប់ពីរងបរាជ័យ ៤-២ ក្រោមថ្វីជើងរបស់ក្រុមកញ្ជ្រោងខៀវ Leicester ដែលជាលទ្ធផលនាំឱ្យពួកគេមានគម្លាត ៥ ពិន្ទុ ពីក្រុមដែលកំពុងឈរកំពូលតារាងនៃក្របខ័ណ្ឌ Premier League។
ក្រុម United មិនធ្លាប់ឈ្នះជើងឯកលីគកំពូលអង់គ្លេសម្ដងណាឡើយ តាំងតែពីឆ្នាំ ២០១៣ មក តែត្រូវបានគេរំពឹងថា នឹងអាចមានសិទ្ធិប្រកួតប្រជែង នៅរដូវកាលនេះ បន្ទាប់ពីបានចំណាយប្រាក់យ៉ាងច្រើនសន្ធឹកសន្ធាប់ នាំយកកីឡាករ Cristiano Ronaldo, Jadon Sancho និង Raphael Varane មករួមក្រុម ពេលទីផ្សារដោះដូរកីឡាករ ដំណើរការ។
តែយ៉ាងណាក្ដី ក្រុមបិសាចក្រហមរបស់ លោក Ole Gunnar Solskjaer ដណ្ដើមបានតែ ១ ពិន្ទុប៉ុណ្ណោះ ដែលគួរណាស់តែមាន ៩ ពិន្ទុពេញ ពេលតទល់នឹងក្រុម Aston Villa, Everton និង Leicester សម្រាប់ការប្រកួតនៅលីគ ៣ លើកចុងក្រោយ។
ជាមួយគ្នានេះ ក្រុម United ក៏ខ្ទាតចេញផងដែរ ពីការប្រកួត ក្នុងកម្មវិធីលីគខាប់ (League Cup) កាលពីខែមុន ហើយកំពុងរងសម្ពាធ សម្រាប់ការប្រឈមជាមួយក្រុម Atalanta របស់អ៊ីតាលី ក្នុងជំនួបនៅក្របខ័ណ្ឌ Champions League នាយប់ថ្ងៃពុធ បន្ទាប់ពីការប្រកួតបើកឆាកដំបូង ក្នុងវគ្គសន្សំពិន្ទុតាមពូលនេះ ចាញ់ក្រុមនៅស្វ៊ីស Young Boy។
កីឡាករ Pogba បានប្រាប់ទូរទស្សន៍ Sky Sports ថា៖ «ប្រសិនបើយើងចង់ឈ្នះជើងឯក មានហ្គេមច្រើន ដែលត្រូវតែឈ្នះ បើទោះបីជាហ្គេមនោះលំបាកយ៉ាងណាក៏ដោយ។ យើងបានជួបនូវហ្គេមប្រភេទនេះ អស់រយៈពេលជាយូរមកហើយ ហើយរកមិនឃើញបញ្ហាសោះ។ យើងបានរបូតគ្រាប់បាល់ងាយ និងល្ងង់ខ្លៅបំផុត»។
លោក Solskjaer បានដាក់ឱ្យលេងជម្រើសដំបូងទាំងអស់ ទាំង Pogba, Bruno Fernandes, Sancho, Mason Greenwood និង Ronaldo ហើយបានព្រលយពាក្យ ក្រោយការប្រកួតនោះថា លោកអាចនឹងត្រូវដកតារាប្រយុទ្ធខ្លះ ដើម្បីធ្វើឱ្យក្រុមមានតុល្យភាពល្អជាងនេះ។
«យើងដឹងថា អ្នកគាំទ្រកំពុងជំរុញ និងដាក់សម្ពាធមកលើពួកយើង ហើយពួកយើងត្រូវតែមានភាពចាស់ទុំជាងនេះបន្ថែមទៀត លេងដោយមានបទពិសោធ និងទំនុកចិត្តជាងនេះ ដោយការដណ្ដើមបាល់ និងលេងការប្រកួតបាល់ទាត់របស់ពួកយើង តាមវិធីដ៏ល្អ»។ នេះជាការបន្ថែមរបស់ Pogba។
កីឡាករវ័យ ២៨ ឆ្នាំរូបនេះ បញ្ជាក់ទៀតថា៖ «យើងត្រូវតែរកឱ្យឃើញនូវគន្លឹះ ដើម្បីឱ្យមានការកែប្រែ ព្រោះយើងមិនសមនឹងចាញ់នោះឡើយ។ ខ្ញុំមិនដឹងថា តើគំនិតរបស់កីឡាករទាំងអស់យ៉ាងម៉េចនោះទេ? យើងត្រូវតែកែប្រែគ្រប់យ៉ាង។ យើងត្រូវតែរកឱ្យឃើញទាំងខាងសតិស្មារតី និងតាក់ទិក ដើម្បីបានជ័យជម្នះ។ យើងត្រូវតែសម្លឹងរកទាំងក្នុងលក្ខណៈផ្ទាល់ខ្លួន និងក្រុម ដើម្បីដោះស្រាយបញ្ហានេះ»។
សម្ពាធកំពុងមានកាន់តែច្រើនឡើងៗ ចំពោះលោក Solskjaer ដែលត្រូវធ្វើយ៉ាងណាកែប្រែស្ថានការណ៍ឱ្យប្រសើរឡើងវិញយ៉ាងឆាប់បំផុត មុនពេលមានកាលវិភាគប្រកួតដ៏តានតឹងរង់ចាំនៅខាងមុខ ដោយត្រូវប្រឈមសុទ្ធតែជាមួយក្រុមខ្លាំងៗ ដូចជា Liverpool, Tottenham, Manchester City, Chelsea និង Arsenal សម្រាប់ជំនួប នៅ Premier League៕ AFP/VN