ភ្នំពេញ៖ គណៈកម្មការជំនាញ និងថ្នាក់ដឹកនាំ ព្រមទាំងសហព័ន្ធកីឡាជាតិ ចំណុះ CAMSOC បានប្រជុំពិភាក្សា កាលពីព្រឹកថ្ងៃអង្គារ ក្រោមអធិបតីភាព លោកបណ្ឌិត ថោង ខុន ប្រធាន NOCC និងជាអនុប្រធានអចិន្ត្រៃយ៍ CAMSOC ដោយលម្អិតទៅលើគណៈកម្មការជំនាញគ្រប់គ្រងទីតាំងស្នាក់នៅ, ហូបចុក និងចរាចរណ៍ ព្រមទាំងទីស្នាក់ការកណ្តាល នៃគណៈកម្មការរៀបចំប្រកួតស៊ីហ្គេម លើកទី៣២ ឆ្នាំ ២០២៣ នៅមុនពេលប្រកួត ក្នុងពេលកំពុងប្រកួត និងក្រោយពេលប្រកួត។
នៅក្នុងអង្គប្រជុំនោះដែរ CAMSOC ក៏បានពន្លេចនូវសេចក្តីណែនាំរបស់លោកនាយករដ្ឋមន្រ្តី ហ៊ុន សែន ប្រមុខរាជរដ្ឋាភិបាលកម្ពុជា ក្នុងការប្រុងប្រយ័ត្ន ដើម្បីលើកមុខមាត់កម្ពុជា ក្នុងនាមជាម្ចាស់ផ្ទះ ក្នុងការទទួលភ្ញៀវលំដាប់អន្តរជាតិឱ្យបានល្អ។
លោក វ៉ាត់ ចំរើន អគ្គលេខាធិការ CAMSOC បានប្រាប់ក្រុមអ្នករាយការណ៍ព័ត៌មាន ក្រោយកិច្ចប្រជុំថា៖ «បញ្ហាលម្អិតនោះ គឺជំរុញឱ្យមានការស៊ីចង្វាក់ ទៅលើទីកន្លែងស្នាក់នៅរបស់ប្រតិភូភ្ញៀវ VIP, ប្រមុខនៃប្រធានស្ថាប័នកីឡាអន្តរជាតិនានា ដោយត្រូវកំណត់ទីតាំងណាដែលងាយស្រួល ពិសេសផ្នែកអត្តពលិក គឺផ្តោតទៅកន្លែងស្នាក់នៅភូមិកីឡា ដាក់នៅជិតកន្លែងហូបចុក ជិតកន្លែងហ្វឹកហាត់ និងទីតាំងប្រកួត ព្រមទាំងលម្អិត ទៅលើមធ្យោបាយធ្វើដំណើរទៅមក»។
លោក វ៉ាត់ ចំរើន បានលម្អិតថា នៅក្នុងរាជធានីភ្នំពេញ យើងបានកំណត់ទីតាំងជាច្រើនកន្លែង មានពហុកីឡាដ្ឋានជាតិមរតកតេជោ ជាទីស្នាក់ការកណ្តាល, អាគារប្រណីត ICOC នៅជ្រោយចង្វារ, មជ្ឈមណ្ឌលជាតិកីឡាកងយោធពលខេមរភូមិន្ទ (ស្តាតចាស់) ពហុកីឡាដ្ឋានជាតិអូឡាំពិកកម្ពុជា និងសណ្ឋាគារសុខាជាដើម។
បន្ថែមទៅលើនេះ អង្គប្រជុំបានលម្អិតទៅលើចំនួនរថយន្តជាច្រើនប្រភេទ មានវីអាយភី, ពាក់កណ្តាលវីអាយភី, រថយន្តធំបើស ដោយកំណត់ទីតាំងឱ្យច្បាស់ ត្រូវមានរថយន្តទៅមកជាប្រចាំដល់ទីតាំងក្រុមអត្តពលិក និងប្រតិភូ ដោយកំណត់ក្នុងរយៈពេល ៥ នាទី ដល់ទីតាំងតែម្តងៗ។
លើសពីនេះ អង្គប្រជុំបានគិតគូទៅលើសណ្តាប់ធ្នាប់ចរាចណ៍ ដោយប្រសិទ្ធនាមផ្លូវថា «ផ្លូវស៊ីហ្គេម» ដោយសហការជាមួយអគ្គស្នងការនគរបាលជាតិ ដើម្បីសិក្សាលើផ្នែកចរាចរណ៍ថា ផ្លូវណាខ្លះត្រូវបិទ ជាអចិន្ត្រៃយ៍ ផ្លូវណាត្រូវបិទ និងបើក ទៅតាមសកម្មភាពចាំបាច់។
លោក វ៉ាត់ ចំរើន បានបញ្ជាក់ថា៖ «អង្គប្រជុំ នៅបានរំឭកបន្ថែមពីពិធីទទួលទង់ និងត្រៀមបញ្ជូនក្រុមការងារបច្ចេកទេស ដើម្បីទៅហាត់ការ ក្នុងពិធីរៀបចំកិច្ចការសព្វបែបយ៉ាង នៅប្រទេសវៀតណាម ខណៈដែលចាប់ពីខែធ្នូ ឆ្នាំ ២០២១ នេះទៅ កម្ពុជានឹងទទួលបានធ្វើជាសហប្រធានក្រុមប្រឹក្សាកីឡាអាស៊ីអាគ្នេយ៍ ជាមួយប្រទេសវៀតណាម ហើយវៀតណាម ក៏ត្រៀមសហការជាមួយកម្ពុជា ដើម្បីបន្តវេនស៊ីហ្គេម ទៅលើកទី៣២ ឆ្នាំ ២០២៣ ឱ្យមានភាពល្អប្រសើរ»។
គួរបញ្ជាក់ថា ព្រឹត្តិការណ៍កីឡាស៊ីហ្គេម លើកទី៣២ ឆ្នាំ ២០២៣ ដែលកម្ពុជាធ្វើជាម្ខាស់ផ្ទះនេះ កម្ពុជាទទួលបានកាដូ ចំនួន ២ បន្ថែម ប្លែកជាងស៊ីហ្គេម ចំនួន ៣១ លើក កន្លងមក ដោយក្រុមប្រឹក្សាកីឡាអាស៊ីអាគ្នេយ៍ បានអនុញ្ញាតឱ្យកម្ពុជា ផលិតនូវភ្លេងគោរពទង់ជាតិស៊ីហ្គេម ជាលើកដំបូង និងឱ្យកម្ពុជា ធ្វើជាសហប្រធានស៊ីហ្គេម ជាមួយប្រទេសវៀតណាម ដែលមិនធ្លាប់មានកន្លងមក៕