ក្រុងរីយ៉ាដ៖ ក្រុមយក្ស Al Hilal របស់ប្រទេសអារ៉ាប៊ី សាអ៊ូឌីត បានស្ថិតនៅលើផ្លូវ ក្នុងការឆ្ពោះទៅរកការឈ្នះជើងឯកក្របខ័ណ្ឌ AFC Champions League (ACL) របស់តំបន់អាស៊ី ជាលើកទី២ ក្នុងរយៈពេល ៣ ឆ្នាំ ជាមួយនឹងការបានជ័យជម្នះដ៏តឹងតែង ២-១ ក្នុងវគ្គ ៤ ក្រុមចុងក្រោយ លើក្រុមគូប្រជែងក្នុងក្រុងតែ ១ Al Nassr កាលពីថ្ងៃអង្គារ។
គ្រាប់បាល់ពីខ្សែប្រយុទ្ធសញ្ជាតិម៉ាលី Moussa Marega និងខ្សែប្រយុទ្ធអន្តរជាតិអារ៉ាប៊ី សាអ៊ូឌីត Salem al-Dawsari ដែលធ្វើបានបន្ទាប់ពីសម្រាកវគ្គទី១ បានជួយឱ្យក្រុម Hilal ធ្វើដំណើរទៅវគ្គផ្ដាច់ព្រ័ត្រ ដែលនឹងរៀបចំ នៅថ្ងៃទី ២៣ ខែវិច្ឆិកានេះ ដោយរង់ចាំក្រុមទាំង២ របស់ប្រទេសកូរ៉េខាងត្បូងទាំង ២ គឺ Pohang Steelers និងក្រុមការពារជើងឯក Ulsan Hyundai ដែលនឹងតទល់គ្នា នៅថ្ងៃពុធនេះ។
ក្រុម Hilal បានឈ្នះពានដ៏ធំរបស់អាស៊ីនេះ ជាលើកទី៣ ក្នុងឆ្នាំ ២០១៩ តែបានធ្លាក់ចេញពីការប្រកួតប្រជែង កាលពីឆ្នាំមុន បន្ទាប់ពីក្លិបជួបនឹងបញ្ហា ដោយសារសមាជិកជាច្រើននាក់ធ្វើតេស្តទទួលបានលទ្ធផលវិជ្ជមាននៃជំងឺកូវីដ ១៩។
ក្រុម Hilal និង Nassr បានជួបគ្នារាប់មិនអស់ សម្រាប់ការប្រកួតក្នុងស្រុក តែភាពសំខាន់នៃការប្រកួតដ៏ធំ ក្នុងតំបន់ មិនបានរសាត់ទៅណាពីពួកគេឡើយ ខណៈទាំង ២ក្រុម បានធ្វើការចាប់ផ្ដើម ដោយប្រុងប្រយ័ត្នដូចគ្នា សម្រាប់ហ្គេម នៅឯកីឡដ្ឋាន King Saud University (King Saud University Stadium) នារាជធានីរបស់ប្រទេសអារ៉ាប៊ីសាអ៊ូឌីតនេះ។
កីឡាករ Marega ស៊ុតគ្រាប់បើកឆាកឱ្យក្រុម Hilal នៅនាទីទី១៧ ហើយត្រូវបានក្រុម Nassr តាមស្មើវិញ នៅនាទីទី៥០ ដែលបានមកពីការតែតរបស់កីឡាករ Anderson Talisca មុនពេលកីឡាករ al-Dawasari ស៊ុតគ្រាប់ជ័យជម្នះ នៅនាទីទី៧១៕ AFP/VN