ភ្នំពេញ៖ សហព័ន្ធកីឡាលើកទម្ងន់កម្ពុជា មានធនធានកីឡាករ កីឡាការិនី ត្រឹម ៤ នាក់ និងគ្រូបង្វឹក ១ នាក់ប៉ុណ្ណោះ ដើម្បីបញ្ជូនទៅហ្វឹកហាត់ នៅប្រទេសចិន ទៅតាមកម្មវិធីរបស់រាជរដ្ឋាភិបាល ជាមួយប្រភេទកីឡាដទៃ ដើម្បីបង្កើនសមត្ថភាព ត្រៀមឆ្ពោះទៅកាន់ព្រឹត្តិការណ៍កីឡាអន្តរជាតិនានា ជាពិសេសប្រកួតកីឡាស៊ីហ្គេម លើកទី៣១ នៅប្រទេសវៀតណាម និងស៊ីហ្គេម លើកទី៣២ ឆ្នាំ ២០២៣ នៅប្រទេសកម្ពុជា។
លោក សំ សុខយី អគ្គលេខាធិការនៃសហព័ន្ធកីឡាលើកទម្ងន់កម្ពុជាបានប្រាប់ថា៖ «សហព័ន្ធទើបតែបង្កើត និងរៀបចំសហព័ន្ធជាថ្មី ហើយធនធាន និងសមត្ថភាពរបស់កីឡាករ ក៏មិនទាន់មានគ្រប់ប្រភេទទម្ងន់ តាមស្តង់ដាររបស់សហព័ន្ធអន្តរជាតិ ឬព្រឹត្តិការណ៍កីឡាអាស៊ីអាគ្នេយ៍នោះឡើយ។ ទោះជាយ៉ាងណា សហព័ន្ធ នៅខិតខំសម្រិតសម្រាំង នឹងបញ្ជូនកីឡាករ កីឡាការិនីរបស់ខ្លួនចំនួន ៤ នាក់ និងគ្រូបង្វឹក ១ នាក់ ទៅបានហ្វឹកហាត់នៅប្រទេសចិន ដើម្បីអភិវឌ្ឍន៍ជំនាញបច្ចេកទេសប្រភេទកីឡាលើកទម្ងន់កម្ពុជា»។
លោក សំ សុខយី បានបន្ថែមថា ចំពោះក្រុមអត្តពលិកទំាង ៤ នាក់ ដែលត្រូវបញ្ជូនទៅហាត់នៅចិន រួមមាន កីឡាករ ជឿម ពិសីដ្ឋ ប្រភេទទម្ងន់ក្រោម៨៩គីឡូក្រាម កីឡាករ ពេជ សីហា ទម្ងន់ក្រោម ៥៥ គីឡូក្រាម កីឡាការិនី សេង បូរិន ទម្ងន់ក្រោម ៤៥ គីឡូគ្រាម និងកីឡាការិនី រើន ស្រីនីត ទម្ងន់ក្រោម ៧១ គីឡូក្រាម ក្រោមការដឹកនាំរបស់អ្នកគ្រូ ទ្រី សុថាវីដែលជាអតីតកីឡាការិនីចំបាប់ឆ្នើម។
លោកស្រី ទ្រី សុថាវី ជាគ្រូបង្វឹក បាននិយាយថា៖ «សហព័ន្ធកីឡាលើកទម្ងន់កម្ពុជា ទើបតែរៀបចំរចនាសម្ព័ន្ធឡើងវិញ ហើយចំនួនអត្តពលិក នៅមានកម្រិត និងមានសមត្ថភាព នៅមិនទាន់តាមសេចក្តីត្រូវការ នៅឡើយ ហេតុនេះយើងនឹងបញ្ជូនពួកគាត់ ទៅធ្វើការហ្វឹកហាត់នៅក្រៅប្រទេស តាមនយោបាយរបស់ CAMSOC ជាមួយប្រភេទកីឡាដទៃទៀត ដែលជាកម្មវិធីរបស់ថ្នាក់ដឹកនាំកីឡា»។
គួរបញ្ជាក់ថា ក្រុមកីឡាករ កីឡាការិនីជម្រើសជាតិកម្ពុជា ចំនួន ១៣៥ នាក់ បូករួមទាំងគ្រូបង្វឹក និងគ្រូជំនួយ នឹងត្រូវចេញទៅហ្វឹកហាត់នៅប្រទេសចិន ជាថ្មី បន្ទាប់ពីបានខកខានជាច្រើនដង និងពន្យារពេល ដោយបញ្ហាកូវីដ១៩។
លោក វ៉ាត់ ចំរើន អគ្គលេខាធិការ CAMSOC បានថ្លែងថា យើងនៅមិនហ៊ាននិយាយឱ្យប្រាកដទេ ចំពោះការបញ្ជូនក្រុមជម្រើសជាតិ ទៅហ្វឹកហាត់ នៅប្រទេសចិននេះ ព្រោះបញ្ហាកូវីដ១៩ ប៉ុន្តែអាចថាចន្លោះពីនៅចុងឆ្នាំ ២០២១ ទៅដើមឆ្នាំ ២០២២ ហើយកិច្ចព្រមព្រៀងរវាងប្រទេសកម្ពុជា និងចិន នឹងផ្តល់ជូនក្រុមអត្តពលិកកម្ពុជាចំនួន ១៥៣ នាក់ ដើម្បីហាត់បំប៉នឱ្យមានសមត្ថភាពខ្ពស់៕