ក្រុងអាំស្ទែរដាំ: កីឡាករ Sebastien Haller បានស៊ុតបញ្ចូលទីគ្រាប់ទី៦ របស់ខ្លួននៅក្របខ័ណ្ឌ Champions League ក្នុងចំណោមការចូលលេង៣ហ្គេម ខណៈដែលក្រុម Ajax បង្ហាញឱ្យឃើញនូវជំហរយ៉ាងរឹងមាំ ក្នុងពូលរបស់ខ្លួន ជាមួយនឹងទស្សនីយភាពនៃការលេងយ៉ាងឃោរឃៅនៅទឹកដីខ្លួនឯង ដោយការបំបាក់ក្រុម Borussia Dortmund ៤-០ កាលពីថ្ងៃអង្គារ។
ឥឡូវនេះ ក្រុម Ajax កំពុងស្ថិតនៅលើផ្លូវឈានទៅវគ្គ ១៦ ក្រុមចុងក្រោយ ជាមួយនឹងជ័យជម្នះ ៣ លើក ពីការប្រកួត ៣ ដង នៅអឺរ៉ុប ហើយកីឡាករ Haller នៅតែជាអ្នកស៊ុតបញ្ចូលទីច្រើនជាងគេ នៅក្នុងកម្មវិធីប្រកួតប្រជែងនេះ បន្ទាប់ធ្វើបានសម្រេចគ្រាប់ទី៤ ឱ្យក្រុមរបស់ខ្លួន ដោយការតែតពេញកម្លាំងបំប៉ោងសំណាញ់ទីយ៉ាងស្អាត។
ខ្សែប្រយុទ្ធសញ្ជាតិកូតឌីវ័រ Haller ស៊ុតបញ្ចូលទី ៤ គ្រាប់ម្នាក់ឯង ពេលលេងទល់នឹងជាមួយក្រុមរបស់ព័រទុយហ្គាល់ Sporting Lisbon នៅថ្ងៃបង្ហាញខ្លួនដំបូងរបស់ខ្លួន ក្នុង Champions League នេះ កាលពីខែមុន ហើយបន្ទាប់មក ក៏នៅតែទទួលបានការចាប់អារម្មណ៍ទៀត ពេលប៉ះជាមួយក្រុមតួកគី Besiktas ជាមួយនឹងការស៊ុតធានាជ័យជម្នះឱ្យក្រុមរបស់ប្រទេសហូឡង់ឈ្នះ ២-០។
ការដណ្ដើមបាន ៣ ពិន្ទុនេះ ឃើញថា ក្រុមជើងឯកលីគកំពូលហូឡង់ ជាអ្នកឈរលើគេ ក្នុងពូល C ដោយនាំមុខដាច់ ៣ ពិន្ទុលើក្រុមលេខ ២ Dortmund របស់អាល្លឺម៉ង់ ខណៈដែលក្រុមទាំង ២ សុទ្ធតែឈ្នះការប្រកួត ២ ដង បន្តបន្ទាប់គ្នា មុនប៉ះគ្នាកាលពីយប់ថ្ងៃអង្គារនេះ។
គ្រូបង្វឹករបស់ក្រុម Ajax លោក Erik ten Hag បានប្រាប់វេបសាយ Amazon Prime ដោយក្ដីរំភើបរីករាយថា៖ «យើងបានបង្កើតឱ្យមានទម្រង់លេង ដ៏ពិសេសអស្ចារ្យ ហើយលេងបាល់ទាត់ដ៏គួរឱ្យជក់ចិត្តមួយ។ នៅពេលក្រុម ២ ជាមួយនឹងការមានគំនិត ចង់លេងស្តាយល៍ប្រយុទ្ធដូចនោះ អ៊ីចឹងវាក្លាយជាការស៊ុតបាល់ប៉េណាល់ទី ដែលពួកយើងជាអ្នកឈ្នះ»។
ក្រុមម្ចាស់ផ្ទះ Ajax បានចាប់ផ្ដើមមានប្រៀប ដោយសារគ្រាប់បាល់ធ្វើឱ្យចូលទីខ្លួនឯងពីសំណាក់កីឡាករប្រធានក្រុម Marco Reus និងការស៊ុតយ៉ាងស្អាតរបស់កីឡាករ Daley Blind ដែលនាំឱ្យក្រុមម្ចាស់ផ្ទះនាំមុខ ២-០ មុនចប់វគ្គទី១។
កីឡាករ Haller បានបង្កើតឱកាសឱ្យទៅខ្សែបម្រើស្លាបសញ្ជាតិប្រេស៊ីល Antony ស៊ុតបន្ថែមការនាំមុខ ៣-០ សិន មុននឹងខ្លួនឯងតែតគ្រាប់បាល់ជ័យជម្នះចុងក្រោយ នៅនាទីទី៧២៕ AFP/VN