ភ្នំពេញៈ គ្រូបង្គោលក្រុមកោះកុងអេហ្វស៊ី បានបង្ហាញការបារម្ភទៅលើហានិភ័យនៃការឆ្លងជំងឺកូវីដ ១៩ ដែលអាចនឹងកើតមានឡើង នៅពេលក្រុមរបស់លោក ត្រូវប្រកួតផ្តាច់ព្រ័ត្រដណ្តើមពានរង្វាន់សម្តេច ហ៊ុន សែន (ថ្នាក់ខេត្ត) ឆ្នាំ ២០២១ ជាមួយក្រុមខេត្តត្បូងឃ្មុំ នៅកីឡដ្ឋានខេមបូឌាអ៊ែរវ៉េ នារសៀលម៉ោង ៣ ថ្ងៃសៅរ៍ ស្អែកនេះ។
បើទោះបីជាមិនទាន់មានព័ត៌មានពីការឆ្លងជំងឺកូវីដ ទៅលើកីឡាករណាម្នាក់របស់ក្រុមទាំង ២ ប៉ុន្តែ លោក ហុក សុជីវ័ន បានស្នើសុំទៅគ្រប់ភាគីត្រូវតែហ៊ានប្រាប់ការពិត បើកីឡាករខ្លួនមានវិជ្ជមានជំងឺកូវីដ ព្រោះបញ្ហានេះ អាចសម្លាប់មនុស្សបាន។
លោក សុជីវ័ន បានសរសេរបង្ហោះ នៅលើហ្វេសប៊ុកពីថ្ងៃព្រហស្បតិ៍ថា៖ «ដំណាក់កាលនេះ ពានឣ្នកណាក៏ចង់បានដែរ តែសុខភាពសំខាន់ជាងពានទៅទៀត ព្រោះអា ១៩ (កូវីដ១៩) អាចងាយសម្លាប់មនុស្សបាន។ ខ្ញុំសំណូមពរតែម្យ៉ាងទេ បើកីឡាករមានកូវីដ កុំព្យាយាមលាក់ ដើម្បីបានលេង ព្រោះពេលខ្លះអាចចម្លង គ្រាន់តែមិនទាន់ចេញរោគសញ្ញាប៉ុណ្ណោះ គឺវាផ្តល់ផលប៉ះពាល់ដល់ឣ្នកដទៃខ្លាំងណាស់»។
គ្រូបង្វឹករូបនេះបន្ថែមថា៖ «មាន ១ វាអាចចៃដន្យ តែបើឡើង ៨ ទៅ ១០ នាក់ហើយ មិនមែនចៃដន្យទេ ហើយការព្យាបាលអាចប្រើរយៈពេល ៣ ឬ ៤ ឬ ៥ ថ្ងៃ តេស្តក៏បាត់វិញ តែត្រូវតែចត្តាឡីស័កឱ្យបានគ្រប់ចំនួន។ ៣ ការពារ ៣ កុំ ធ្វើជាមនុស្ស ត្រូវមានគុណធម៌»។
គួរបញ្ជាក់ថា ក្រុមកោះកុងបានយកឈ្នះក្រុមខេត្តបន្ទាយមានជ័យ ១-០ ដើម្បីឡើងមកវគ្គផ្តាច់ព្រ័ត្រនេះ តែខេត្តត្បូងឃ្មុំ ត្រូវបានគណៈកម្មការសម្រេចឱ្យឈ្នះក្រុមខេត្តបាត់ដំបង ដោយស្វ័យប្រវត្តិ ព្រោះកីឡាកររបស់បាត់ដំបង បានធ្វើតេស្តរកឃើញវិជ្ជមានកូវីដដល់ទៅ ២ លើក ដែលត្រូវបានកំណត់ឱ្យចាញ់តាមច្បាប់បានកំណត់តែម្តង៕