ភ្នំពេញៈ កីឡាកាយវប្បកម្មកម្ពុជា ដែលធ្លាប់ឈ្នះមេដាយជាច្រើននៅលើឆាកអន្តរជាតិនោះ បាននិងកំពុងប្រមូលផ្តុំហ្វឹកហាត់ នៅក្នុងក្លិបឯកជនរបស់សហព័ន្ធ ដើម្បីពង្រឹងសមត្ថភាព ព្រមទាំងសម្រួលលក្ខខណ្ឌ សម្រាប់កីឡាករជម្រើសជាតិ និងគ្រូបង្វឹក ងាយស្រួលក្នុងការគ្រប់គ្រង និងទទួលបានគុណផលល្អ។
ជាមួយគ្នានេះ ស្ថាប័នគ្រប់គ្រងកីឡា មានមជ្ឈមណ្ឌលជាតិហ្វឹកហ្វឺនកីឡា និងអគ្គនាយកដ្ឋានកីឡា ក៏ដូចជាក្រសួងអប់រំ បានយល់ព្រម តាមសំណើរបស់សហព័ន្ធ ដែលសុំឱ្យហាត់ជុំគ្នា នៅក្នុងក្លិបផ្ទាល់ខ្លួននេះ ដើម្បីលើកកម្ពស់ និងជំរុញបន្ថែមដល់ការហ្វឹកហាត់អត្តពលិក ឱ្យទទួលបានគុណផលខ្ពស់ ខណៈប្រធានសព័ន្ធមានការរំពឹងថា ក្រុមកាយវប្បកម្មកម្ពុជានឹងអាចដណ្តើមបានមេដាយមាសនៅស៊ីហ្គេមមិនខាន។
លោក សុខ វណ្ណៈ អគ្គលេខាធិការសហព័ន្ធកីឡាកាយវប្បកម្មកម្ពុជាបានប្រាប់ថា ក្រុមជម្រើសជាតិកាយវប្បកម្ម ឆ្នាំ ២០២១ នេះ មានកីឡាករ កែវ សំណាង, ទ្រីង ចាន់, អ៊ុន បូរ៉ាត់ និង អ៊ុត សុធា នៅក្រោមការបង្វឹករបស់លោកគ្រូ ចាប វ៉ាននី។ ពួកគាត់កំពុងហាត់យ៉ាងសកម្ម ក្នុងក្លិបទំនើបមួយជាក្លិបឯកជនរបស់ប្រធានសហព័ន្ធ លោក តឹក ប៊ុនវី ដែលមានទីតាំងនៅផ្សារសំណង់ ១២ រាជធានីភ្នំពេញ ដើម្បីត្រៀមខ្លួនចូលរួមការប្រកួតស៊ីហ្គេម លើកទី៣១ ឆ្នាំ ២០២២ នៅប្រទេសវៀតណាម និងស៊ីហ្គេម លើកទី៣២ ឆ្នាំ ២០២៣ ដែលកម្ពុជាធ្វើជាម្ចាស់ផ្ទះ។
លោកបន្តថា៖ «សហព័ន្ធបានស្នើសុំទៅកាន់ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា តាមរយៈឯកឧត្តម អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡា និង លោក ប៉ុន សុខ ប្រធានមជ្ឈមណ្ឌលជាតិហ្វឹកហ្វឺនកីឡា ដើម្បីបានការឯកភាពឱ្យហ្វឹកហាត់ នៅទីលានរបស់សហព័ន្ធតែម្តង ដែលមានគុណភាព និងគ្រប់គ្រងល្អខណៈកាយវប្បកម្ម រាល់ការចេញទៅចូលរួមប្រកួតលើឆាកអន្តរជាតិ តែងតែឈ្នះបានមេដាយមាសរហូត»។
បើទោះបីជា ក្រុមកាយវប្បកម្មធ្លាប់បានជួបប្រទះឧបសគ្គច្រើន និងបានបែកបាក់ផ្ទៃក្នុង នោះក្នុងសហព័ន្ធ តែរហូតមកដល់បច្ចុប្បន្ន ក្រុមនេះទទួលបានភាពរីកចម្រើនវិញ គួរឱ្យមោទនៈ ខណៈកន្លងមកនេះ ក្រុមកាយវប្បកម្ម ធ្លាប់ឈ្នះមេដាយមាស ២ ប្រាក់ ១ និងមេដាយសំរឹទ្ធ ២ ពីការប្រកួតជើងឯកពិភពលោក ព្រមទាំងមេដាយមាស ៥ ប្រាក់ ៣ និងមេដាយសំរឹទ្ធ ២ ពីការប្រកួតជើងឯកអាស៊ាន។
ចំណែកលោក តឹក ប៊ុនវី ជាប្រធានសហព័ន្ធបានប្រាប់ថា៖ «ក្រុមយើងត្រៀមខ្លួនហាត់ឱ្យល្អ ដើម្បីចេញប្រកួតលក្ខណៈអន្តរជាតិនានា ហើយការហាត់នៅក្នុងក្លិបផ្ទាល់ខ្លួនរបស់សហព័ន្ធនេះ មានផលចំណេញច្រើន ដោយសារមានសម្ភារទំនើប និងគ្រប់គ្រងផ្ទាល់ រួមទាំងមានការថែរក្សាសុខភាពឱ្យបានល្អ ពិសេសបញ្ហាហូបចុកប្រចាំថ្ងៃដើម្បី ថែរក្សាសាច់ឱ្យល្អ ដោយត្រូវការគោរពនូវលក្ខខណ្ឌ តាមលក្ខណៈវិទ្យាសាស្ត្រ ក្នុងនោះខ្ញុំនឹងបន្ថែមនូវរបបហូបចុកពីលើរបបរបស់ក្រសួងដើម្បីលើកទឹកចិត្តផង និងថាមពលកីឡាករផង»។
ប្រធានសហព័ន្ធដែលធ្លាប់ឈ្នះមេដាយប្រាក់ ពីការប្រកួតជើងឯកពិភពលោក រូបនេះ បញ្ជាក់ថា៖ «ជាមួយនឹងការហ្វឹកហាត់នេះ សហព័ន្ធតែងតែធ្វើតេស្តពួកគាត់រាល់ថ្ងៃសុក្រ និងថ្ងៃសៅរ៍ ដើម្បីស្វែងរកនូវចំណុចខ្វះខាត និងចំណុចខ្លាំង ហើយយើងតែងតែណែនាំពួកគាត់ អំពីរបបអាហារ សម្រាប់ការពារសុខភាពឱ្យល្អមិនអាចធ្វេសប្រហែសបានឡើយ ដូច្នេះក្នុងនាមខ្ញុំជាអតីតកីឡាករកាយវប្បកម្មឆ្នើមម្នាក់ ខ្ញុំរំពឹងថា ការប្រកួតស៊ីហ្គេមលើកទី៣១ និងស៊ីហ្គេមលើកទី៣២ កីឡាករកាយវប្បកម្មកម្ពុជា នឹងទទួលបានមេដាយមាសជាមិនខាន»៕