លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរបានថ្លែងថា៖ «ក្នុងនាមសហព័ន្ធកីឡាប្រដាល់គុនខ្មែរ ដែលបានសហការរៀបចំប្រកួត បានលទ្ធផលល្អជោគជ័យកន្លងមក ខ្ញុំសូមកោតសរសើរ និងគាំទ្រលើកទឹកចិត្ត ចំពោះការបង្កើតឱ្យមានការប្រកួតដ៏ប្លែក និងទាក់ទាញអារម្មណ៍នេះឡើង ដែលបង្កឱ្យមានសកម្មភាព និងការគាំទ្រពីវិស័យឯកជនមហាជន ដើម្បីភាពរីកចម្រើនទាំងអស់គ្នា»។
លោកបានបន្ថែមថា៖ «ការបង្កើតឱ្យមានការប្រកួតប្លែក មានភាពទាក់ទាញនេះ បាននាំមកនូវប្រាក់ចំណូលឧបត្ថម្ភ ដល់មន្ត្រីបច្ចេកទេស និងគ្រូបង្វឹក កីឡាករ ដែលជាការរួមចំណែកមួយផ្នែកធំ ដល់ជីវភាពប្រចាំថ្ងៃ។ បន្ថែមលើសពីនេះ ខ្ញុំសូមថ្លែងអំណរគុណដល់ក្រសួងអប់រំ យុវជន និងកីឡា, ក្រសួងសុខាភិបាល និងរាជរដ្ឋាភិបាល ដែលយកចិត្តទុកដាក់ ក្នុងការអនុញ្ញាតឱ្យមានការប្រកួត ក្រោមការណែនាំឱ្យរក្សាបាននូវអនាម័យ និងវិធានការពារកូវីដ ១៩ បានល្អប្រសើរ»។
ចំណែកលោក ជួប វុត្ថា អ្នកផ្គូផ្គងប្រចាំសង្វៀនថោន បានប្រាប់ថា ៖«ដើម្បីអបអសាទរខួប ២ ឆ្នាំ នៃការបើកសង្វៀនថោន ជាពិសេសកម្មវិធីប្រកួតប្រដាល់ម៉ាសហ្វៃ,គុនខ្មែរ និងគុនខ្មែរលក្ខណម៉ារ៉ាតុង ជាដើមនោះ យើងនឹងរៀបចំឱ្យមានការប្រកួតដ៏ពិសេស គឺកីឡាករម្នាក់ ប្រកួតទល់ជាមួយកីឡាករ ៣ នាក់ ដោយចូលប្រកួតម្នាក់ ១ ទឹក សម្រាប់ការប្រកួត ៣ ទឹក (១ ទឹក មាន ៣ នាទី)។ បន្ថែមពីលើនេះ យើងមានគូម៉ាសហ្វៃធម្មតា ១ ទល់ ១ នាក់ ព្រមទាំងគូម៉ារ៉ាតុងដណ្តើមប្រាក់លានដូចមុនៗ តែមានចំនួន ២ ឈុត ឬ ២ ប្រភេទទម្ងន់ផ្សេងគ្នា»។
គណៈកម្មការចម្រុះ បានឱ្យដឹងថា ការគូម៉ាសហ្វៃ ៣ វ៉ៃ ១ គឺកីឡាករ ព្រំ សំណាង ត្រូវវ៉ៃតទល់ជាមួយកីឡាករ ៣ នាក់ ទី១ កីឡាករ ម៉ាជ សុខរ៉ា ទី២ ឡុង សុវណ្ណឌឿន និងទី៣ កីឡាករ វង្ស ណយ។ ការប្រកួតដ៏ប្លែកនេះ តម្លៃខ្លួនកីឡាករតួឯក ព្រំ សំណាង កើនដល់ ៦០០ ដុល្លារ ហើយបើវ៉ៃដៃគូឱ្យសន្លប់ នឹងទទួលបានប្រាក់បន្ថែម ២០០ ដុល្លារទៀត។
ចំណែកគូដណ្តើមប្រាក់លានវិញ ឈុតទី១ ក្នុងប្រភេទទម្ងន់ ៦០ គីឡូក្រាម មានជើងខ្លាំងចំនួន ៤ នាក់ គឺ ឈុត សេរីវ៉ាន់ថង, ម៉ន សាម៉េត, វ៉េង សុភ័ក្រ និង ឡុង ជិន រីឯឈុតទី២ ក្នុងទម្ងន់ ៧១ គីឡូក្រាម មានជើងខ្លាំង ធឿន ធារ៉ា, ថៃ រិទ្ធី, ឈឿង ល្វៃ និងកីឡាករ ថៃ រ៉េត ហើយលោក ជួប វុត្ថា បានបង្ហើបថា សម្រាប់ជម្រើសជើងខ្លាំងទាំងពីរឈុតនេះ ប្រាក់រង្វាន់ បានកើនឡើង គឺជើងឯករង នឹងទទួលបាន ៦០០ ដុល្លារ និងជើងឯកបាន ១ ០០០ ដុល្លារឯណោះ។
ចំពោះការប្រកួតនេះ កីឡាករ ព្រំ សំណាង បាននិយាយថា៖ «ខ្ញុំគ្មានព្រួយបារម្ភនោះទេព្រោះទោះបីជាគេ ៣ នាក់ ប៉ះជាមួយខ្ញុំម្នាក់ឯងមែន តែរូបមន្តប្រកួតនេះ គឺពួកគេ ចូលវ៉ៃជាមួយខ្ញុំ ម្នាក់ ១ទឹកៗ អ៊ីចឹងបើសរុបទៅ ខ្ញុំប្រកួត ៩ នាទី ដូចម៉ាសហ្វៃ កន្លងមកដែរ ហេតុនេះ ខ្ញុំសង្ឃឹមថា មិនអាចចាញ់បានឡើយ ព្រោះខ្ញុំបានហាត់ត្រៀមយូរដែរ។ បើពួកគេ វាយសម្រុកខ្លាំងយ៉ាងណា ក៏ការប្រកួតមានតែ ៣ ទឹក រយៈពេលចំនួន ៩ នាទីប៉ុណ្ណោះ ហើយខ្ញុំមានពេលសម្រាកពេលចប់ទឹកនីមួយៗផងដែរ អ៊ីចឹងមិនខុសពីការប្រកួតធម្មតាប៉ុន្មានឡើយ»។
ចំណែកកីឡាករជើងចាស់ ម៉ន សាម៉េត ដែលត្រូវប្រកួតម៉ារ៉ាតុងដណ្តើមប្រាក់លាន ទម្ងន់ ៦០ គីឡូក្រាម បាននិយាយថា៖ «នៅក្នុងចំណោម ៣នាក់នេះ ខ្ញុំសុទ្ធតែធ្លាប់ឈ្នះ ប៉ុន្តែបច្ចុប្បន្ន ពួកគេក៏ល្អដែរ ហេតុនេះមិនងាយស្រួលឈ្នះនោះឡើយ ដោយខ្ញុំរំពឹងតែ៥០ភាគរយប៉ុណ្ណោះ»។ រីឯ ឡុង ជិន ក៏សង្ឃឹមឈ្នះត្រឹម ៥០ ភាគរយដែរ។
សម្រាប់គូម៉ារ៉ាតុង ទម្ងន់ ៧១ គីឡូក្រាម ដែលមានបេក្ខភាព ឈឿង ល្វៃ, ធឿន ធារ៉ា និង ថៃ រ៉េត នោះ ត្រូវបានលោក ធន់ សុភា គ្រូបង្វឹក ថៃ រិទ្ធី និយាយថា៖ «ខ្ញុំគិតថា ដៃគូ ដែលជាឧបសគ្គរបស់ ថៃ រិទ្ធី គឺមានតែ ធឿន ធារ៉ា មួយទេ ចំណែក ឈឿង ល្វៃ និង ថៃ រ៉េត លំបាកមធ្យមទេ តែការប្រកួតប្រភេទទម្ងន់ធ្ងន់នេះ អាចសន្លប់ផុយស្រួយ បើវាយចូលគោលដៅល្អ»៕