.jpg)
កីឡាករ វី សម្ភស្ស (ឆ្វេង) ត្រូវប្រកួតជម្រុះជាមួយ សែត សារឹត នៅថ្ងៃអាទិត្យ។ រូបថត សហការី
ភ្នំពេញ: កីឡាករជម្រើសជាតិប្រដាល់សកលកម្ពុជា ទាំង ៤ រូប នឹងត្រូវបន្តប្រកួតជម្រុះវិលជុំ ជាលើកទី២ នៅថ្ងៃអាទិត្យនេះ ដើម្បីស្វែងរកអ្នកមានពិន្ទុខ្ពស់ជាងគេចំនួន ២ នាក់ ឡើងទៅប្រកួតក្នុងវគ្គផ្តាច់ព្រ័ត្រ ដណ្តើមខ្សែក្រវាត់ ទម្ងន់ ៦៣,៥ គីឡូក្រាម នៃព្រឹត្តិការណ៍ Ultimate Boxing Championship 2021 ខណៈការប្រកួតលើកនេះ វី សម្ភស្ស ត្រូវជួប សែត សារឹត ហើយ ម៉ាង ព្រហ្មម៉ាញ ត្រូវប៉ះជើងខ្លាំង ទូច ដេវីដ។
សម្រាប់ វី សម្ភស្ស និង ម៉ាង ព្រហ្មម៉ាញ ទើបតែចាប់ផ្តើមប្រកួតបើកឆាក នៅថ្ងៃអាទិត្យនេះទេ ព្រោះការជួបគ្នាលើកមុនរបស់អ្នកទាំង ២ នេះ ត្រូវបានលើកពេល ដោយសារតែ ព្រហ្មម៉ាញ មានបញ្ហាផ្នែកសុខភាព ចំណែក ទូច ដេវីដ កំពុងឈរនៅលេខ ១ ជាបណ្តោះអាសន្ន ខណៈរូបគេបានយកឈ្នះដោយពិន្ទុដាច់លើ សែត សារឹត សម្រាប់ការប្រកួតលើកទី១ កាលពីថ្ងៃទី ១០ ខែតុលានោះ។
យ៉ាងណាក៏ដោយ វី សម្ភស្ស ដែលបានយកឈ្នះលើរៀមច្បង ផល សោភ័ណ្ឌ ក្នុងការប្រកួតមិត្តភាព កាលពីថ្ងៃទី ១០ ខែតុលានោះ មានការជឿជាក់ថា រូបគេនឹងអាចឆ្លងផុតការប្រកួតវគ្គជម្រុះនេះ ដើម្បីបានឡើងទៅកាន់វគ្គផ្តាច់ព្រ័ត្រ ហើយការជួបជាមួយ សែត សារឹត នៅថ្ងៃអាទិត្យនេះ គេសង្ឃឹមខ្ពស់បំផុត ក្នុងការដណ្ដើមបាន ៣ ពិន្ទុ។
កីឡាករមានកម្ពស់ ១,៧៣ ម៉ែត្រ និងមានប្រវត្តិប្រកួតចំនួន ៣៨ ដង ឈ្នះ ៣៤ ដង ចាញ់ ៣ ដង និងស្មើ ១ ដង វី សម្ភស្ស បាននិយាយថា៖ «ខ្ញុំមានទំនុកចិត្តថា នឹងឈានទៅដល់វគ្គផ្តាច់ព្រ័ត្រ ហើយការប្រកួតជម្រុះជាមួយ សែត សារឹត លើកនេះ ខ្ញុំសង្ឃឹមឈ្នះ ៩០ ភាគរយ»។
ចំណែកឯកីឡាករ សែត សារឹត ហាក់មិនសូវហ៊ានរំពឹងខ្ពស់ប៉ុន្មានទេ ព្រោះគេមើលឃើញថា វី សម្ភស្ស ពេលនេះកំពុងល្អ។ កីឡាករដែលមានកម្ពស់ ១,៧០ ម៉ែត្រ និងធ្លាប់ប្រកួត ២៥ ដង ក្នុងនោះឈ្នះ ១៧ ចាញ់ ៥ និងស្មើ ៣ ដងរូបនេះ បាននិយាយថា៖ «ខ្ញុំធានាប្រកួតអស់ពីសមត្ថភាព ប៉ុន្តែលទ្ធផលមិនហ៊ានរំពឹងមុនទេ ព្រោះដៃគូរបស់ខ្ញុំ គេខ្លាំង និងកំពុងល្អផងដែរ ហេតុនេះ ខ្ញុំរំពឹងឈ្នះត្រឹម ៦០ ភាគរយប៉ុណ្ណោះ»។
ចំណែកការជួបគ្នារវាង ម៉ាង ព្រហ្មម៉ាញ និង ទូច ដេវីដ ពិតជាលំបាកទស្សន៍ទាយណាស់ពីព្រោះអីអ្នកទាំង ២ នេះ សុទ្ធតែមានសមត្ថភាពល្អដូចគ្នា។ ព្រហ្មម៉ាញ ទោះជាមានបទពិសោធតិច ក្នុងការប្រកួតប្រដាល់សកល ដោយធ្លាប់ប្រកួតបានត្រឹម ១១ ដង ឈ្នះ ១០ ដង និងចាញ់ ១ ដង ប៉ុន្តែកីឡាករកម្ពស់ ១,៧២ ម៉ែត្ររូបនេះ មានភាពរឹងមាំពីប្រដាល់គុនខ្មែរ ហើយជំនួបលើកនេះ គេមានសង្ឃឹមឈ្នះ ៧០ ភាគរយ។
ចំពោះ ទូច ដេវីដ វិញ គេមានកម្ពស់ ១,៧០ ម៉ែត្រ និងធ្លាប់មានប្រវត្តិប្រកួត ៣២ ដង ឈ្នះ ២៧ និងចាញ់ ៥ ដង ហើយការប្រកួតលើកនេះ បើសិនជា ទូច ដេវីដ អាចដណ្តើមជ័យជម្នះពី ព្រហ្មម៉ាញ បាននោះ គឺគេនឹងមានភាគរយខ្ពស់បំផុត ក្នុងការឈ្នះកៅអីឡើងទៅវគ្គផ្តាច់ព្រ័ត្រ។ តែទោះយ៉ាងណាក្ដី ទូច ដេវីដ បានអះអាងថា គេសង្ឃឹមឈ្នះ ម៉ាង ព្រហ្មម៉ាញ រហូតដល់ ៩០ភាគរយឯណោះ។
ជាមួយគ្នានេះដែរ លោក ប៊ុយ សុភ័ណ្ឌ អគ្គលេខាធិការសហព័ន្ធកីឡាប្រដាល់គុនខ្មែរ និងជាអ្នកគ្រប់គ្រងការប្រកួតនេះ បានប្រាប់ឱ្យដឹងថា កម្មវិធីប្រកួត Ultimate Boxing Championship ជាមួយនឹងការដាក់ឱ្យមានការប្រកួតគូដណ្តើមប្រាក់លាននេះ គឺពិតជាទាក់ទាញណាស់ ហើយនៅសប្តាហ៍នេះ យើងក៏មានគូប្រដាល់ចំនួន ៤ គូបន្ថែមទៀត ឱ្យប្រកួតក្នុងថ្ងៃជាមួយគ្នានោះ ផងដែរ៕
