The Phnom Penh Post Search

Search form




Logo of Phnom Penh Post newspaper Phnom Penh Post - ជា​ វ៉ាន់​សាន្ត ​និង ​ធៀង​ សុចិត្រា​ ឈ្នះ​មេដាយ​មាស ​ពីការ​ប្រកួត​​កីឡា​យុទ្ធសិល្ប៍​ចម្រុះ​ប្រចាំ​ឆ្នាំ​ ២០២១​

ជា​ វ៉ាន់​សាន្ត ​និង ​ធៀង​ សុចិត្រា​ ឈ្នះ​មេដាយ​មាស ​ពីការ​ប្រកួត​​កីឡា​យុទ្ធសិល្ប៍​ចម្រុះ​ប្រចាំ​ឆ្នាំ​ ២០២១​

Content image - Phnom Penh Post
ម្ចាស់មេដាយមាស ធៀង សុចិត្ត្រា និងកីឡាការិនី​ម្ចាស់​មេដាយ​ប្រាក់ គង់ ម៉ូណាជេស៊ីកា ពេល​ថត​ជាមួយថ្នាក់​ដឹកនាំ និងគ្រូ​បង្វឹក ក្រោយ​ការ​ប្រកួត បានបញ្ចប់។ រូប សហការី

ជា​ វ៉ាន់​សាន្ត ​និង ​ធៀង​ សុចិត្រា​ ឈ្នះ​មេដាយ​មាស ​ពីការ​ប្រកួត​​កីឡា​យុទ្ធសិល្ប៍​ចម្រុះ​ប្រចាំ​ឆ្នាំ​ ២០២១​

ភ្នំពេញ៖ កីឡាករ​ ​ជា ​វ៉ាន់​សាន្ត​ និង​ ​ធៀង ​សុចិត្ត្រា​ ដែល​ជា​អ្នក​និយម​ហាត់​ក្បាច់​គុន​កីឡា​ហាប់​គី​ដូ​ បាន​ឈ្នះមេដាយមាសរៀងៗ​ខ្លួន ​នៅ​ក្នុងការ​​ប្រ​កួត​សម្តែង​ដាក់​ពិន្ទុ ​ ក្នុង​ព្រឹត្តិការណ៍​​​កីឡា​យុទ្ធ​សិល្ប៍​គុន​ចម្រុះ​ ពាន​រង្វាន់​សម្តេច ​ស ​ខេង ​លើក​ទី៤ ​ឆ្នាំ​ ២០២១ ​នៅ​ឯ​អគ្គ​លេខាធិការ​ក្រុម​ប្រឹក្សា​កីឡា​ក្រសួង​មាហ​ផ្ទៃ​។​

ជា​មួយ​គ្នា​នេះ ​បង​ប្អូន​បង្កើត​ ជា​​អ្នក​​ហ្វឹក​ហាត់​ក្បាច់​កុន​ហាប់​គីដូ ​តាំង​​ពី​កុមារភាព ​គឺ​កីឡាករ​ គង់​ ម៉ូណា​មិថុរ៉ា​ និង​កីឡាការិនី​ ​គង់ ​ម៉ូណា​​ជេស៊ី​កា ​​បាន​​ទទួល​បាន​មេដាយ​ប្រាក់លើ​វិញ្ញាសាបង្ហាញ​​ក្បាច់​ការ​ពារ​ខ្លួន ពីការ​ប្រកួត​​មិន​បើក​ទូលាយ​ ​ដែលបាន​ធ្វើ​ឡើង កាល​ពី​ចុង​សប្តាហ៍មុននេះដែរ។

ការ​ដណ្តើមបានមេដាយ​មាស និងមេដាយ​ប្រាក់​របស់អត្តពលិកទាំង​៤​នាក់នេះ ​បន្ទាប់​ពី​ពួកគេ ​​បាន​ព្យា​យាម​ហ្វឹក​ហាត់​បំប៉ន​បច្ចេកទេសជា​ពិសេស ដោយ​​ត្រៀម​បាន​ចំនួន ​១ ​សប្តាហ៍​ជាមួយ​​លោក​គ្រូ​ធំ ​សេង ​ប៊ុន​សុង ​នៅ​ឯ​ក្លិប​ Top Team របស់​លោក​គ្រូ​ ហ៊ុន​ ច័ន្ទរាជ ​នៅ​បឹង​ត្របែក។

​ក្រុម​​អត្តពលិក​ទាំង​ ៤ ​នាក់​ខាង​លើនេះ ទទួល​បាន​លទ្ធផល​ល្អ​ ដោយ​ឆ្លង​កាត់​​ការ​​សម្តែង​នូវ​វិញ្ញាសា​សំខាន់ៗ​ជា​ច្រើន ​ដូច​ជា​ប្រើ​កម្លាំង​ថាមពល ​បំបែក​ដុំ​ឥដ្ឋ​ និង​ឧបករណ៍​រឹង​ផ្សេងៗ ​ព្រម​ទាំង​បង្ហាញ​ក្បាច់​ការ​ពារ​ខ្លួន​ ចំណែក​អត្តពលិក ចំនួន ​៦ ​នាក់​ទៀត ​មិន​ទទួល​បាន​ពិន្ទុ​ជាប់​ចំណាត់​ថ្នាក់​នោះ​ឡើយ​។​

Content image - Phnom Penh Post
កីឡាករ ជា វ៉ាន់សាន្ត បានថត​ជាមួយគ្រូ​ធំ លោក សេង ប៊ុនសុង បន្ទាប់ពីរូបគេ ដណ្តើម​បាន​មេដាយមាស។ រូប សហការី

លោក គង់​ ចាន់​ធីណា​ ជំនួយ​ការ​លោក​ឧត្តម​សេនីយ៍​ឯក ​ជា ​ប៊ុន​ហេង ​អគ្គ​លេខា​ធិការ​ក្រុម​ប្រឹក្សា​កីឡា​ក្រសួង​មហា​ផ្ទៃ​ បាន​ប្រាប់​​ថា​៖​ «​ការ​ប្រកួត​នេះ​ ជា​ព្រឹត្តិការ​ណ៍​ប្រចាំ​ឆ្នាំ ​ដែល​មាន​កីឡា​ប្រភេទ​ប្រយុទ្ធ​ចំនួន ​៤ ​ប្រ​ភេទ ​គឺ​​កីឡាហាប់​គី​ដូ​ ការ៉ាតេ​ដូ​ យូដូ​ និង​កីឡា​តេក្វាន់​ដូ ​ប៉ុន្តែ​ខ្ញុំ​មិន​បាន​ដឹង​លទ្ធផល​ ការប្រកួត​​កីឡា​ចំនួន​៣​ប្រភទ​ទៀត​នោះ​ទេ​ ​ព្រោះ​ការ​ប្រកួត​មាន​ការ​រឹត​បន្តឹង ​មិន​បើក​ទូលាយ​នោះ​ឡើយ​ ដោយ​គោរព​តាម​គោល​ការណ៍​ ​បញ្ហា​កូវីដ ​១៩ ​របស់​ក្រសួង​សុខាភិបាល»​។​

អគ្គ​លេខា​ធិ​ការ​សហ​ព័ន្ធ​ខ្មែរ​កីឡា​ហាប់​គី​ដូ លោក គង់ ចាន់ធីណា ​​បាន​​បន្ថែម​ថា​៖ «​ខ្ញុំ​ដឹង​ច្បាស់​តែ​សកម្មភាព​ហ្វឹក​ហាត់​ និង​​ការ​ឈ្នះ​​មេដាយ ​សម្រាប់​ប្រ​ភេទ​កីឡា​ហាប់គី​ដូ​ប៉ុណ្ណោះ ព្រោះ​ខ្ញុំ​កាន់​ផ្ទាល់​»។​

លោក​ថា ជា​មួយ​នឹង​លទ្ធផល​នេះ​ អត្តពលិក​ហាប់​គី​ដូ ​មាន​កីឡាករ ​គង់ ​ម៉ូណា​មិថុរ៉ា​ បង្ហាញ​ក្បាច់​ទាត់ ​៣ ​ប្រភេទ ​មាន​ទាត់​ក្រោម ​ទាត់​ខ្ពស់ ​និង​លោត​ទាត់ ​ហើយ​កីឡាការិនី​ គង់ ​ម៉ូណា​​ជេស៊ី​កា​ ជា​សិស្ស​ស្រី​ សម្តែង​លើ​វិញ្ញា​សា​ការ​ពារ​ខ្លួន ​គឺ​ទទួល​បាន​មេដាយ​ប្រាក់​។​

ចំណែក​កីឡាករ​ ជា​ វ៉ាន់​​សាន្ត​ ខ្សែ​ក្រវាត់​ខ្មៅ ​៣​ ដាន់​ នៅ​ប្រ​ទេស​កូរ៉េ​ ប្រ​កួត​វិញ្ញាសា​វាយ​បំបែក​ដុំ​ឥដ្ឋ ​និង​ឧបករណ៍​រឹង​ផ្សេង​ទៀត ដោយ​​ទទួល​បាន​មេដាយ​មាស​ គឺ​​​ស្រដៀង​គ្នា​​ទៅ​នឹង​​​កីឡា​ករ ​ធៀង ​សុចិត្ត្រា​ កម្រិត​ខ្សែ​ក្រវាត់​ខ្មៅ ​២​ដាន់​ ដែល​ឈ្នះ​មេដាយ​មាស ​ពី​វិញ្ញា​សា​ដូច​គ្នា​នេះ​ដែរ​។

លោក​ឧត្តម​សេនិយ៍​ឯក​ ម៉ក់​ សំអុល​ ប្រធាន​សហព័ន្ធ​ខ្មែរ​កីឡា​ហាប់​គី​ដូ ​​បាន​ថ្លែង​​ថា​៖ «សកម្មភាព​ប្រ​កួត​នេះ ​គឺ​បាន​ដាស់​រំឭក​​ធ្វើ​ឱ្យ​​អត្តពលិក​យើង ​មាន​ភាព​រីក​ចម្រើន​ខាង​កម្លាំង​កាយ​ និង​វិជ្ជា​គុន​ ​ព្រោះ​បើ​គ្មាន​សកម្មភាព​ប្រ​កួត​សម្តែង​នេះទេ ​គឺ​អត្ត​ពលិក នឹង​​មាន​កម្រិត​បច្ចេកទេស​ធ្លាក់​ចុះ​»។

Content image - Phnom Penh Post

លោក​​បាន​បន្ថែម​​ថា៖ ​«​ការ​ប្រ​កួត​នេះ​ ក្រោម​ការ​គ្រប់​គ្រង​ដឹក​នាំ​របស់​ឧត្តម​សេនីយ៍​ឯក ​ជា​ ប៊ុន​ហេង ​ប្រធាន​អង្គភាព​កីឡា​ក្រ​សួង​មហា​ផ្ទៃ ​និង​មាន​ការ​ចូល​រួម​ពី​លោក​ព្រឹទ្ធាចារ្យ​ សេង ប៊ុនសុង​ ជួយ​បង្ហាត់​បន្ថែម​ផ្នែក​ទេព្យ​កោសល្យ​ និង​​ក្បាច់​គុន ​បាន​ធ្វើ​ឱ្យ​​ហាប់​គី​ដូ​ បន្ត​សកម្ម​ភាព​ ទោះ​ស្ថិត​ក្នុង​សម័យវិបត្តិ​នៃជំងឺកូវីដ​ ១៩​ ក៏​ដោយ»​។​​

លោក​គ្រូ ​សេង ​ប៊ុន​សុង ​អតីត​ប្រធាន​សហព័ន្ធ​កីឡា​ខ្មែរ​ហាប់​គី​ដូ ​ផង​នោះ​ នៅ​តែ​ព្យា​យាម​ចុះ​ពង្រឹង​ទេព្យ​កោសល្យ​ក្បាច់​គុន ​ដល់​អត្តពលិក​ តាម​បណ្តា​ក្លិប​គុន​ចម្រុះ​ ជា​ប្រចាំ ជា​ពិសេស​ក្លិប​ក្នុង​រាជ​ធានី​ភ្នំពេញ​ ខេត្ត​បាត់​ដំបង ​ខេត្ត​សៀម​រាប​ និងនៅ​​សមាគម​កីឡា​ប្រ​យុទ្ធ​ក្នុង​ក្រសួង​មហា​ផ្ទៃ​។​

លោក​គ្រូ​ សេង ​ប៊ុន​សុង ​​មាន​ប្រសាសន៍​ថា៖​ «​​ខ្ញុំ​ធ្លាប់​ជា​កីឡាករ ​និង​ធ្លាប់​ជា​គ្រូ​បង្វឹក​ហាប់​គី​ដូ​នេះ ​ច្រើន​ឆ្នាំ​មក​ហើយ​ ហើយ​​អ្វី​ដែល​ជា​ក្តី​ប្រាថ្នា​របស់​ខ្ញុំ ​គឺ​ចង់​លើក​ស្ទួយ​ក្បាច់​គុន​ហាប់​គី​ដូ​ ឱ្យ​​មាន​វត្តមាន ​ក្នុង​ព្រឹត្តិការណ៍​កីឡា​ជាតិ​ និង​អន្តរ​ជាតិ ​ក្នុង​ពេល​ខាង​មុខ ​ដែល​អាច​ធ្វើ​ទៅ​បាន»​៕​

អត្ថបទគួរចាប់អារម្មណ៍