.jpg)
កែវ សុខផេង ពេលលើកពានសម្តេចហ៊ុនសែន ជាមួយមិត្តរួមក្រុម កាលពីឆ្នាំ ២០២០។ ហ៊ាន រង្សី
ភ្នំពេញ: ការប្រកួតពានរង្វាន់សម្តេច ហ៊ុន សែន (ថ្នាក់ជាតិ) លើកទី១៥ ឆ្នាំ ២០២១ នឹងចាប់ដំណើរការប្រកួត នៅថ្ងៃអង្គារនេះ ហើយជាមួយគ្នានេះ ក្រុមវិសាខា បានអះអាងថា ពួកគេបានប្រឹងប្រែងខ្លាំងទៅលើការប្រមូលផ្តុំហ្វឹកហាត់ និងការគោរពវិន័យ គឺធ្វើយ៉ាងណាត្រូវការពារតំណែងជើងឯករបស់ពួកគេឱ្យបាន។
សម្រាប់ការប្រកួតជម្រុះវគ្គ ១៦ ក្រុមចុងក្រោយ ថ្នាក់ជាតិនេះ ក្រុមភ្នំពេញក្រោន វិសាខា និងព្រះខ័នរាជស្វាយរៀង ដែលកំពុងមានពិន្ទុខ្ពស់ជាងគេ នៅលីគកំពូលកម្ពុជា សុទ្ធតែត្រូវប៉ះក្រុមទើបឡើងមកពីខេត្ត និងត្រូវបានគេមើលឃើញថា ក្រុមទាំង ៣ នេះ អាចមានភាគរយខ្ពស់ក្នុងការឆ្លងផុតវគ្គជម្រុះនេះ ដើម្បីឡើងទៅកាន់វគ្គ ១/៤ ផ្តាច់ព្រ័ត្រ។
ជាមួយគ្នានេះ ក្រុមម្ចាស់ជើងឯកវិសាខា ហាក់មិនបានបង្ហាញការចាប់អារម្មណ៍ខ្លាំងទៅលើការជួបក្រុមលេខ ៣ ថ្នាក់ខេត្ត ខេត្តបន្ទាយមានជ័យ នៅកីឡដ្ឋានព្រីនស៍ នារសៀលម៉ោង ៣ ថ្ងៃអង្គារនេះប៉ុន្មានទេ ព្រោះក្រុមនេះ ជឿថា នឹងអាចឆ្លងផុត ហើយវិសាខា ថែមទាំងបានបង្ហាញការតាំងចិត្តថា នឹងត្រូវការពារតំណែងជើងឯករបស់ខ្លួនឱ្យបានតាមរយៈការប្រឹងប្រែងរួមគ្នា។
តាមរយៈក្លិបវិសាខា ខ្សែប្រយុទ្ធជាប្រធានក្រុម កែវ សុខផេង បាននិយាយថា៖ «ពួកខ្ញុំបានរៀបចំក្រុម និងត្រៀមខ្លួនរួចរាល់ ដើម្បីការពារតំណែងជើងឯក ពានសម្តេចតេជោ ហ៊ុន សែន នាឆ្នាំនេះ ពោលគឺពួកយើង ខំប្រឹងខ្លាំងជាងមុនទៀត។ ឆ្នាំមុន ទោះយើងបានពាន តែយើងនៅមានចំណុចខ្វះខាតមួយចំនួនដែរ អ៊ីចឹងឆ្នាំនេះ យើងមានការតាំងចិត្ត និងខំប្រឹងទ្វេដង ទាំងការប្រមូលផ្តុំហ្វឹកហាត់ និងវិន័យ គឺខ្លាំងជាងមុន ដើម្បីធ្វើការការពារតំណែងជើងឯករបស់យើង»។
ជាមួយគ្នានេះ ក្រុមសិង្ហក្រហម ភ្នំពេញក្រោន នឹងត្រូវជួបជាមួយក្រុមខេត្តត្បូងឃ្មុំ នៅកីឡដ្ឋានស្មាតអអេសអិន នារសៀលម៉ោង ៣ ថ្ងៃនេះ ដូចគ្នា ហើយការប្រកួតនេះ ក្រុមរបស់លោក Oleg Starynskyi មានការជឿជាក់ថា នឹងអាចយកឈ្នះក្រុមខេត្តត្បូងឃ្មុំ ដើម្បីបានឆ្លងទៅវគ្គបន្ត ហើយក៏ដើម្បីឈានទៅរកការឈ្នះពានជាថ្មីផងដែរ បន្ទាប់ពីពួកគេ បានឈ្នះពាននេះ ចំនួន ២ លើក តាំងពីឆ្នាំ ២០០៨ និងឆ្នាំ ២០០៩។
គ្រូបង្គោល លោក Oleg Starynskyi បានបញ្ជាក់ថា៖ «យើងត្រូវតែដាក់កីឡាករល្អៗលេង ក្នុងការប្រកួតនេះ ដើម្បីឱ្យទទួលបានលទ្ធផលល្អ។ ចំណែកការរៀបចំ យើងយល់ថា ក្រុមមកពីខេត្ត ដែលបានលេង ២ ថ្នាក់ខេត្តនេះ ជាក្រុមខ្លាំង អ៊ីចឹងយើងមិនអាចរំពឹងថា ជាការប្រកួតដែលងាយស្រួល ឬក៏ដាក់កីឡាករក្មេងៗលេងច្រើននោះទេ។ យើងត្រូវតែរៀបចំដូចការប្រកួតរាល់ដង ដូច្នេះ វាមិនមានពេល ក្នុងការបង្កើតកំហុសនោះទេ យើងត្រូវតែឈ្នះ ដើម្បីបានឡើងទៅលេងនៅវគ្គបន្តទៀត»។
ចំណែកឯក្រុមព្រះខ័នរាជស្វាយរៀង នឹងត្រូវទទួលក្រុមលេខ ១ ថ្នាក់ខេត្ត កោះកុងអេហ្វស៊ីរបស់លោក ហុក សុជីវ័ន ដែលបានទទួលស្គាល់ថា ក្រុមរបស់លោក នៅមានបទពិសោធខ្ចីជាង ដែលមិនអាចវាយតម្លៃពីការប្រកួតទុកមុនបានទេ។ ជាមួយគ្នានេះដែរ ក្រុមវិសាខា ត្រូវជួបជាមួយក្រុមនគរបាលជាតិ នៅស្តាតចាស់ នារសៀលម៉ោង ៣ ថ្ងៃអង្គារនេះ ដូចគ្នា រីឯការប្រកួត ៤ គូទៀត ត្រូវធ្វើឡើង នៅថ្ងៃពុធបន្ទាប់៕
