ភ្នំពេញ៖ វគ្គបណ្តុះបណ្តាលរដ្ឋបាលកីឡា រយៈពេល ៤ ថ្ងៃ ត្រូវបានបិទបញ្ចប់ នៅថ្ងៃព្រេហស្បតិ៍ បន្ទាប់ពីបានដំណើរការបង្រៀន ដោយគ្រូជំនាញកីឡា ទទួលស្គាល់ពីអូឡាំពិកអន្តរជាតិ ដើម្បីផ្តល់ជូនធនធានមនុស្សផ្នែកកីឡា ជាសិក្ខាកាមចំនួន ២៥ នាក់ ដែលជាមន្ត្រីអប់រំ យុវជន និងកីឡា គ្រូកីឡាតាមវិទ្យាល័យ អនុវិទ្យាល័យ និងការិយាល័យចំណុះឱ្យមន្ទីរអប់រំ យុវជន និងកីឡាខេត្តរតនគីរី។
លោក វ៉ាត់ ចំរើន អគ្គលេខាធិការ NOCC បានប្រាប់ថា៖ «វគ្គរដ្ឋបាលកីឡានេះ មានទម្រង់ជាមេរៀនដដែលៗ ដូចលើកមុនៗដែរ គ្រាន់តែយើងប្តូរពីបង្រៀនផ្ទាល់ មកធ្វើតាមអនឡាញ ព្រោះនេះជាសម័យកាលកូវីដ ១៩ ប៉ុន្តែយើងបានប្តូរចល័តពីខេត្តមួយទៅខេត្តមួយទៀតដើម្បីពង្រឹង និងពង្រាយសមត្ថភាពធនធានមនុស្ស ផ្នែករដ្ឋបាលកីឡាឱ្យបានច្រើន ដែលអាចធ្វើទៅបាន ក្នុងនោះខេត្តជនបទដាច់ស្រយាល ហើយយើងយកចិត្តទុកដាក់ផងដែរ ខណៈខេត្តរតនគីរី ក្នុងរយៈពេល ១០ ឆ្នាំនេះ គណៈកម្មាធិការជាតិអូឡាំពិក បានផ្តល់ជូននូវកម្មវិធីរដ្ឋបាលនិងកីឡានេះ បានចំនួន ២ លើកមកហើយ»។
លោកបានបន្ថែមថា៖ «ដូចខ្ញុំធ្លាប់ជម្រាបជូនអ៊ីចឹង អ្នកធ្លាប់បានឆ្លងវគ្គ ទទួលបានលិខិតបញ្ជាក់ពីអង្គការសាមគ្គីអូឡាំពិកអន្តរជាតិ (OS) ដែលជាស្ថាប័នជំនាញផ្នែកបណ្តុះបណ្តាលរបស់ IOC ដល់បណ្តាសមាជិក នៅលើពិភពលោក ហើយសិក្ខាកាម ដែលមានលិខិតបញ្ជាក់នេះ មានសិទ្ធចូលរួមសកម្មភាពកីឡានានាបានយ៉ាងទូលំទូលាយ មិនប្រកាន់ប្រទេសនោះឡើយ»។
អ្នកជំនាញកីឡារូបនេះ បានបញ្ជាក់ថា វគ្គរដ្ឋបាលកីឡានេះ ផ្តល់ជូននូវចំណុចសំខាន់ចំនួន ៣ ទី១ យល់ដឹងពីរចនាសម្ព័ន្ធរបស់កីឡា ក្នុងអូឡាំពិក ប្រវត្តិរបស់អូឡាំពិកអន្តរជាតិ និងទស្សនរបស់អូឡាំពិកសម័យទំនើប ទី២ យល់ដឹងពីជំនាញកីឡាបច្ចេកទេសកីឡា និងរចនាសម្ព័ន្ធទំនាក់ទំនងរបស់កីឡា ហើយទី៣ ចេះធ្វើទីផ្សារ ក្នុងកីឡា ព្រមទាំងចេះរៀបចំព្រឹត្តិការណ៍កីឡា និងភាពជាអ្នកដឹងនាំ ក្នុងសកម្មភាពកីឡា ហើយនេះជាវគ្គរដ្ឋបាលកីឡាចុងក្រោយ ក្នុងផែនការ និងគម្រោងបណ្តុះបណ្តាលប្រចាំឆ្នាំ ២០២១»។
ចំណែកលោក មាស សារ៉េត អ្នកគ្រប់គ្រងកម្មវិធីបានប្រាប់ថា កន្លងមកកម្មវិធីរដ្ឋបាលកីឡានេះ បានផ្តល់ជូនតាមខេត្ត ក្នុងមួយឆ្នាំពី ៣ ទៅ ៤ ខេត្ត ដោយផ្ទាល់ក្នុងមួយឆ្នាំៗ ប៉ុន្តែឆ្នាំនេះ NOCC ផ្តល់ជូនបាន ៤ ខេត្ត តាមគម្រោង តែសុទ្ធតែធ្វើតាមអនឡាញទាំងអស់ ព្រោះបញ្ហាកូវីដ ១៩៕