The Phnom Penh Post Search

Search form




Logo of Phnom Penh Post newspaper Phnom Penh Post - ប៊ុន​ឌឿ​ន ឈ្នះ​ប្រា​ក់លាន តែមាន​ការរិះគន់​

ប៊ុន​ឌឿ​ន ឈ្នះ​ប្រា​ក់លាន តែមាន​ការរិះគន់​

Content image - Phnom Penh Post
សេក ចៅជូត និង វៀត ប៊ុនឌឿន ឡើង​ទទួលប្រាក់រង្វាន់ ក្រោយការប្រកួត​បានបញ្ចប់។ រូប ថោន

ប៊ុន​ឌឿ​ន ឈ្នះ​ប្រា​ក់លាន តែមាន​ការរិះគន់​

ភ្នំពេញៈ អ្នក​ប្រដាល់ វៀត ប៊ុន​ឌឿ​ន មកពី​ក្លិប​គុហារ​ព្រហ្ម​ជ័យ​ខេត្តសៀមរាប បានឈ្នះ​ប្រាក់រង្វាន់​ប្រចាំ​សប្តាហ៍ នៅ​សង្វៀន​ថោ​ន កាលពី​យប់​ថ្ងៃអាទិត្យ ជា​លើកដំបូង បន្ទាប់ពី​រូបគេ​បាន​យកឈ្នះ ពុទ្ធ សំបូរ ក្នុង​វគ្គ​ជម្រុះ និង​បន្ត​ឈ្នះ សេក ចៅ​ជូត ក្នុង​វគ្គ​ផ្តាច់ព្រ័ត្រដោយ​ពិន្ទុ ក្នុង​លក្ខណៈ​តឹង​​តែង​នោះ ប៉ុន្តែ​ជ័យជម្នះ​របស់ ប៊ុន​ឌឿ​ន មានការ​រិះគន់​ច្រើន​ថា មិន​យុត្តិធម៌​។​

​តាមពិត វៀត ប៊ុន​ឌឿ​ន ធ្លាប់បាន​ចូលរួម​ប្រកួត​ម៉ា​រ៉ា​តុង​ដណ្តើម​ប្រាក់​លាន នៅ​សង្វៀន​ថោ​ន​នេះ ចំនួន​ ៤ ​លើក​មកហើយ ប៉ុន្តែ​លទ្ធផលមិន​ធ្លាប់​ទទួលបាន​ជ័យជម្នះ​នោះទេ ពោល​ទើបតែ​លើក​នេះ​ប៉ុណ្ណោះ គឺ​ឈ្នះ​ក្នុង​លក្ខណៈ​មិន​ដាច់ ជាពិសេស​ការ​​សម្រេច​ឱ្យ​ឈ្នះ សេត ចៅ​ជូត ដោយ​ពិន្ទុ​មិន​ឯកច្ឆន្ទ ៣-២ នៅ​វគ្គ​ផ្តាច់ព្រ័ត្រ បានធ្វើឱ្យ​មហាជន​រិះគន់ និង​ជេរប្រទេច​ច្រើន ទៅលើ​ចៅក្រមដាក់ពិន្ទុ​។​

​តែ​ទោះបីជា​យ៉ាងនេះ​ក្តី ភាគី​ចាញ់ សេក ចៅ​ជូត មិនបាន​ប្តឹងតវ៉ា​អ្វី​នោះទេ ខណៈដែល​អ្នកទស្សនា សឹងតែ ៩៥​ ភាគរយ ដែល​បាន​ចូល​បញ្ចេញមតិនៅក្នុង​ផេ​ច​ផ្លូវ​​ការ​របស់ Town Sport គឺ​គាំទ្រ​ឱ្យ សេក ចៅ​ជូត ឈ្នះ​។ ជុំវិញ​បញ្ហា​នេះ លោក ជួប វុត្ថា អ្នកគ្រប់គ្រង និង​សម្របសម្រួល​នៅក្នុង​កម្មវិធី​នេះ និយាយថា​៖ «​លទ្ធផល​នេះ ពិតជា​លំបាក​កាត់ក្តី ព្រោះ​បើ​ភ្នែក​ខ្ញុំ មើលឃើញ​ប្រហាក់ប្រហែលគ្នា ហើយ​នៅពេលដែល​ពិន្ទុ​ចៅក្រម​ចេញមក គឺ ៣​ ទល់​ ២ ព្រោះនេះ​ជា​ប្រកួត​ដណ្តើម​ប្រា​ក់លាន មិន​អាចឱ្យ​ស្មើគ្នា​បានឡើយ​»​។​

​លោក ជួប វុត្ថា បាន​បន្ថែមថា​៖ «​ខាង​សង្វៀន​ផ្តល់​សិទ្ធិ​ខាង​បច្ចេកទេសដាក់ពិន្ទុ ព្រមទាំង​វិនិច្ឆ័យ​នេះ ទៅឱ្យ​មន្ត្រី​របស់​សហព័ន្ធ​កីឡាប្រដាល់​គុន​ខ្មែរ ទាំងស្រុង ដោយ​គ្មាន​សិទ្ធិ ឬ​បញ្ចេញយោបល់​មតិ​បានទេ​។ តែ​ទោះបីជា​យ៉ាងណា ការលើកឡើង​របស់​ម​ហា​ជន ជា​អ្នកទស្សនា ជា​កញ្ចក់​ឆ្លុះបញ្ចាំង​ឱ្យ​យើង​ដឹងថា បងប្អូន​ទាំងនោះ មានការ​យល់ដឹង ចេះ​មើល​ប្រដាល់ និង​តាមដាន​ការផ្តល់​ពិន្ទុ មិនធម្មតា​ដែរ​»​។​

​លោក​បាន​បញ្ជាក់ថា​៖ «​ដូច​ខ្ញុំ​បាន​ជម្រាបជូន​ខាងដើម​អ៊ីចឹង ពិន្ទុ​ប្រហាក់ប្រហែលគ្នា ៣​ ទល់​ ២ គឺ​មិនអាច​ស្មើ​បានឡើយ ព្រោះ​ដណ្តើម​ប្រាក់រង្វាន់ ដាច់ខាត​មាន​ឈ្នះ មាន​ចាញ់ ហើយ​អ្វីដែល​សំខាន់ គឺ​ខាង​សហព័ន្ធ ជា​អ្នកទទួលខុសត្រូវ​ផ្នែក​បច្ចេកទេស ទាំងស្រុង ចំណែក​ខាង​ម្ចាស់​សង្វៀន ជា​អ្នក​សហការ​រៀបចំ​»​។​

​ចំណែក​លោក ជឹម សុ​ផា តំណាង​អ្នក​ស្ប៉​ន​ស័​រ​កម្មវិធីបាន​និយាយថា​៖ «​លទ្ធផល វៀត ប៊ុន​ឌឿ​ន ឈ្នះ សេក ចៅ​ជូត នេះ តឹង​តែង​មែន ហើយ​មានការ​រិះគន់​ច្រើន ប៉ុន្តែ​លទ្ធផល​មាន​អ្នកឈ្នះ​តែ​ម្នាក់​គត់ ហេតុនេះ​ប្រសិន​ចៅក្រម​កាត់​ឱ្យ សេក ចៅ​ជូត ឈ្នះ​វិញ ក៏​អាច​នឹងមាន​ការរិះគន់​ដូចគ្នា​មិន​ខាន​។​

​លោក​បន្តថា​៖ «​កន្លងមក ការ​កាត់​សេច​ក្តី​របស់​ចៅក្រម និង​គណៈកម្មការ​វិនិច្ឆ័យនៅ​សង្វៀន​ថោ​ន មាន​ភាព​សុក្រឹត​ជាង​សង្វៀន​ដទៃ ប៉ុន្តែ​យូរៗ​ក៏មាន​ការរិះគន់​ម្តងៗ​ដែរ ហើយ​ជាមួយគ្នានេះ ខ្ញុំ​គិតថា លទ្ធផល​ការប្រកួត​កីឡា​លើ​ពិភពលោក នៅតែមាន​ភាពចម្រូងចម្រាស​ខ្លះៗ​មិន​ខាន ព្រោះ​បញ្ហា​នេះ វា​បង្ហាញឱ្យឃើញនូវ​ការ​​គាំទ្រ និង​ការស្រឡាញ់​របស់​អ្នកគាំទ្រ ទៅតាម​ឆន្ទៈ​រៀងៗ​ខ្លួន​»៕

អត្ថបទគួរចាប់អារម្មណ៍