ភ្នំពេញ៖ អ្នកលេងស្នៀតជើង អេលីត ចំរើន ត្រូវបានចៅក្រមទាំង ៥ នាក់ ផ្តល់ពិន្ទុឱ្យឈ្នះលើ ធន់ អៀនឡៃ ដាច់ គឺ ៥-០ ក្រោយការប្រកួតគ្នាយ៉ាងស្រួចស្រាវ ចំនួន ៥ ទឹក បានបញ្ចប់ នៅលើសង្វៀន PNN កាលពីរសៀលថ្ងៃអាទិត្យ ហើយលទ្ធផលនេះ បានបើកឱកាសឱ្យ អេលីត ចំរើន បានឡើងទៅជួប បឺត សង្ឃឹម នៅវគ្គផ្តាច់ព្រ័ត្រ ដើម្បីដណ្តើមយកខ្សេក្រវាត់ អមដោយទឹកប្រាក់ ១ ម៉ឺនដុល្លារ។
ជាមួយនឹងលទ្ធផលនេះ អ្នកទស្សនាខ្លះ ដែលនិយមចូលចិត្តខាងកីឡាករ ធន់ អៀនឡៃក៏មិនអស់ចិត្ត ខណៈដែលសាច់ប្រកួត មានផ្លែប្តូរគ្នាទៅវិញទៅមក ក្នុងលក្ខណៈស្វិតស្វាញ ហើយ អេលីត ចំរើន បានសារភាពថា៖ «ការប្រកួតនេះ ពិតជាតឹងតែងណាស់ ព្រោះ ធន់ អៀងឡៃ ចេញស្នៀតខាងលើច្រើន ហើយខ្ញុំវាយតាមលក្ខណៈប្រយ័ត្នប្រយែងបំផុត ព្រោះមានបំណងឈ្នះត្រឹមពិន្ទុ ហេតុនេះ ខ្ញុំមិនសម្រុកខ្លាំងទេ ខ្លាចភ្លាត់ស្នៀត។
យ៉ាងណាមិញ នៅពេលសួរពីការឡើងទៅជួប បឺត សង្ឃឹម នៅវគ្គផ្តាច់ព្រ័ត្រ កីឡាករ អេលីត ចំរើន បាននិយាយថា៖ «ការឡើងទៅវគ្គផ្តាច់ព្រ័ត្រ ក៏មិនមែនងាយស្រួលនោះទេ ព្រោះ បឺត សង្ឃឹម លំបាកប្រកួតណាស់ គឺជើងចាស់ ដែលសម្បូរបច្ចេកទេសល្អៗ ហើយរឹងមាំ ហេតុនេះ នៅវគ្គផ្តាច់ព្រ័ត្រ ខ្ញុំរំពឹងត្រឹម ៥០ ភាគរយប៉ុណ្ណោះ»។
ចំណែក បឺត សង្ឃឹម នៅពេលដឹងថា អេលីត ចំរើន ត្រូវឡើងទៅជួបខ្លួន នៅវគ្គផ្តាច់ព្រ័ត្រនោះ បាននិយាយថា៖ «វត្តមានរបស់ អេលីត ចំរើន ខ្ញុំពិតជាព្រួយបារម្ភខ្លាំង ព្រោះគាត់ខ្លាំង ពិតជាលំបាកទប់ទល់មែន។ តែទោះបីជាយ៉ាងណាក្តី ខ្ញុំខំហ្វឹកហាត់ ដើម្បីយកឈ្នះឱ្យបាន ប៉ុន្តែសង្ឃឹមឈ្នះត្រឹម ៥០ ភាគរយប៉ុណ្ណោះ នៅពេលផ្តាច់ព្រ័ត្រ»។
ចំណែក កីឡាករ ធន់ អៀនឡៃ ហាក់មិនអស់ចិត្ត នឹងការចាញ់ អេលីត ចំរើន នេះទេ។ អៀនឡៃ និយាយក្រោយប្រកាសលទ្ធផលថា៖ «ខ្ញុំចាញ់ មិនអស់ចិត្តទេ ប៉ុន្តែធ្វើម៉េចបើចៅក្រម ផ្តល់ពិន្ទុឱ្យចាញ់បែបនេះ។ លទ្ធផលនេះ គឺដូចខ្ញុំគិតពីដំបូងអ៊ីចឹងថា បើខ្ញុំវ៉ៃគេមិនសន្លប់ទេ គ្មានឱកាសឈ្នះនោះទេ ព្រោះគេជាម្ចាស់ខ្សែក្រវាត់មាស នៅសង្វៀននេះស្រាប់»។
លោក ធន់ សុភា គ្រូបង្វឹករបស់កីឡាករ ធន់ អៀនឡៃ មិនអាចសុំការពន្យល់ពីលទ្ធផលចាញ់សិស្សរបស់ខ្លួនបានទេ ដោយលោកបានបញ្ជាក់យ៉ាងខ្លីថា លោកសុំមិននិយាយ កុំឱ្យគេរិះគន់យើង៕