The Phnom Penh Post Search

Search form




Logo of Phnom Penh Post newspaper Phnom Penh Post - សហព័ន្ធ​ទោចក្រយាន បើក​វគ្គ​បណ្តុះបណ្តាល ពង្រឹងសមត្ថភាព​គ្រូបង្វឹក​

សហព័ន្ធ​ទោចក្រយាន បើក​វគ្គ​បណ្តុះបណ្តាល ពង្រឹងសមត្ថភាព​គ្រូបង្វឹក​

Content image - Phnom Penh Post
លោក នូ ចំរើន (អាវស) ពេល​ថ្លែង​ទៅកាន់​សិក្ខាកាម ក្នុងថ្ងៃបើក​វគ្គ។ រូបថត សហ​ការី

សហព័ន្ធ​ទោចក្រយាន បើក​វគ្គ​បណ្តុះបណ្តាល ពង្រឹងសមត្ថភាព​គ្រូបង្វឹក​

ភ្នំពេញៈ សហព័ន្ធ​ខ្មែរ​កីឡា​ទោច​​ក្រ​យាន បានរៀបចំ​វគ្គ​បណ្តុះបណ្តាល «​គ្រូបង្វឹក​កីឡា​ទោចក្រយាន កម្រិត ​១» ដើម្បី​ពង្រឹងសមត្ថភាព​គុណភាព ត្រៀម​ឆ្ពោះ​ទៅធ្វើ​ម្ចាស់ផ្ទះ​ស៊ី​ហ្គេម ឆ្នាំ​ ២០២៣ ហើយ​វគ្គ​នេះ​ជា​កម្មវិធី​ប្រចាំឆ្នាំ​ ២០២១ ដែល​ទ្រទ្រង់​ថវិកា​ពី​ក្រសួង​អប់រំ ដោយ​ចាប់ផ្តើម​ពីថ្ងៃ​ទី ​២២ ដល់​ថ្ងៃទី​ ២៦ ខែវិច្ឆិកា នៅ​ទីស្នាក់ការ​គណៈកម្មាធិកា​រ​ជាតិ​អូឡាំពិក​កម្ពុជា​ (NOCC)​។​

​លោក នូ ចំរើន អគ្គលេខាធិការ​សហព័ន្ធ​ខ្មែរ​កីឡា​ទោចក្រយាន បាន​និយាយ ក្នុង​ថ្ងៃ​បើក​វគ្គ​ថា​៖ «​វគ្គ​នេះ ជា​វគ្គ​ដ៏​សំខាន់ ដើម្បី​ជួយ​ពង្រឹងសមត្ថភាព​គុណភាព​ចំណេះដឹង​របស់​គ្រូបង្វឹក​កីឡា​ប្រណាំង​កង់​ឱ្យ​កាន់តែ​រឹងមាំ​ទៀត ដែលជា​កម្មវិធី​ប្រចាំឆ្នាំ​របស់​សហព័ន្ធ គាំទ្រ​ដោយ​ក្រសួង​អប់រំ យុវជន និង​កិ​ឡា​»​។

​វគ្គ​សិក្សា​នេះ សិក្សា​តាម​របៀបរបប​បច្ចេក​ទេស​ស្តង់ដា​អន្តរជាតិ របស់​សហ​ព័ន្ធ​កីឡា​ទោចក្រយាន​អន្តរជាតិ (UCI) ក្នុងនោះ​ផ្តោត​សំខាន់​លើ​មេរៀន​គន្លឹះ ចំនួន​ ១០ ​មេរៀន ពី​គ្រូឧទ្ទេស និង​ជា ការចែករំលែក​អំពី​សា​រ​ធាតុ​ហាមឃាត់​ក្នុង​វិស័យ​កីឡា​ (​ដូ​ពីង ឬ​ដូ​ប៉ា​) ដូចជា​គ្រឿង​ស្រវឹង សារធាតុ​ប៉ូវ​កម្លាំង ឬ​សារធាតុ​ញៀន​ដទៃ​ជាដើម​។​

ចំពោះ​សិក្ខាកាម មាន​មកពី​រាជធានី​​ភ្នំពេញ និង​ខេត្ត​ចំនួន ៨ ខណៈ​គ្រូឧទ្ទេស​ម្នាក់​ឈ្មោះ Frank zgosnik គឺ​ផ្តោតលើ​បច្ចេកទេស​សម្រួច​គោលដៅ ត្រៀម​សម្រាប់​ស៊ី​ហ្គេម​ ឆ្នាំ ​២០២៣ ហើយ សិក្ខាកាម ដែល​បានបញ្ចប់​វគ្គ​នេះ និង​ត្រូវ​បន្តទៅ​វគ្គ​ទី​២ នា​ឆ្នាំ ​២០២២​។ បន្ថែម​លើ​នេះ អ្នក​ដែល​អាច​ប្រឡង​ជាប់​វគ្គ​ទី​៣ នឹងត្រូវ​បន្ត​ការសិក្សា​នៅ​ប្រទេស​ស្វ៊ី​ស នា​ចុងឆ្នាំ ​២០២២​។​

​លោក នូ ចំរើន បន្ថែមថា​៖ «​សហព័ន្ធ សហការ​ជាមួយ​សម្ព័ន្ធ​កីឡា​ប្រណាំង​ទោចក្រយាន​អន្តរជាតិ រៀបចំ​ជាវ​គ្គ​សិក្សា​របៀបនេះ ហើយ​សម្រាប់​វគ្គ​សិក្សា​អន្តរជាតិ កម្រិត ​៣ សហព័ន្ធ​បានស្នើ​សុំ UCI បញ្ជូន​សិក្ខាកាម ទៅ​សិក្សា​រយៈ​​ពេល ៣ ខែ នៅ​ប្រទេស​ស្វ៊ី​ស​តែម្តង ប៉ុន្តែ​សិក្ខាកាម ត្រូវ​ប្រឡង​ឱ្យ​ជាប់ តាម​កម្រិត​នីមួយៗ ដើម្បី​ទទួលស្គាល់​ពី UCI សិន ហេតុនេះ​បើ​ពួកគាត់​មិន​ប្រឹងប្រែង ឬ​ប្រឡង​ធ្លាក់ មិន​អាចជួយ​បានទេ​»​។​

«​អ្វីដែល​ពិសេស គឺ​កម្ពុជា​ទើប​ទទួលបាន​សិទ្ធិ​ជា​ផ្លូវការ ពី​មហាសន្និបាត ក្រុមប្រឹក្សា​កីឡា​អូឡាំពិក​អាស៊ី កាល​​ពីថ្ងៃ​ទី ​២១ ខែវិច្ឆិកា នៅ​ទីក្រុង​ឌូ​បៃ​ប្រទេស​អារ៉ាប់​រួម ក្នុងការ​រៀបចំ​ទទួល​ធ្វើ​ម្ចាស់ផ្ទះ​ការប្រកួត​កីឡា​យុវជន​អាស៊ី (ASIAN Youth Games) ឆ្នាំ ​២០២៩ ហេតុនេះ​សម្រាប់​ប្រភេទ​កីឡា​កង់ យើង​នឹង​ជំរុញ​អត្ត​ព​លិ​ក​ជា​យុវជន​អាយុ​ក្រោម ​១៨ ​ឆ្នាំ​ចុះ គឺ​ធ្វើយ៉ាងណា​ឱ្យ​កីឡា​ទោច​​ក្រ​យាន មាន​ភាព​លេចធ្លោ និង​ទទួលបាន​ជយលាភី​ល្អ ក្នុង​ព្រឹត្តិការណ៍​យុវជន​អាស៊ី​នេះ​»​។ លោក ចំរើន បញ្ជាក់​។​

​ទាក់ទង​បញ្ហា​នឹង​សហព័ន្ធ​ខ្មែរ​កីឡា​ទោចក្រយាន នេះដែរ លោកស្រី ប៉ែន ស្រីមុំ ប្រធាន​សមាគម​កីឡា​ប្រណាំង​កង់​កម្ពុជា ដែលមាន​ទីស្នាក់ការ​នៅ​កម្ពុជា​ផង និង​នៅ​ប្រទេស​បារាំង​ ផង​នោះ បញ្ជាក់ថា សមាគម​គ្រោងនឹង​បិទ ដោយសារ​លោក នូ ចំរើន ជា​អគ្គលេខាធិការ​សហព័ន្ធ​ខ្មែរ​កីឡា​ទោចក្រយាន បង្ក​ការ​លំបាក និង​រារាំង ព្រមទាំង​មាន​ចេតនា​ធ្វើឱ្យ​សមាគម​ប្រណាំង​កង់​កម្ពុជា មាន​ភាពលំបាក​គ្រប់​សកម្មភាព ហើយ​លោក​​ស្រី​ត្រៀម​បកអាក្រាត​រឿង​មិន​ប្រក្រតី​ទាំងនេះ នៅ​ដំណាច់​ឆ្នាំនេះ​។​

​ឆ្លើយតប​ទៅនឹង​បញ្ហា​នេះ លោក នូ ចំរើន បាន​ពន្យល់​បកស្រាយ​ថា ចំពោះ​សមាគម​ប្រណាំង​កង់​របស់​លោកស្រី ប៉ែន ស្រីមុំ គឺ​យើង​អត់​មាន​បិទ​ទេ គ្រាន់តែ​មិន​បន្ត​សុពលភាព​ជូន​គាត់​ទៀត​។ ប៉ុន្តែ​ឆ្នាំ ​២០២១​ នេះ គាត់​អាច​ប្រកួត​បានរហូតដល់​ដាច់​ឆ្នាំ ហើយ​ឆ្នាំក្រោយ ​២០២២ សហព័ន្ធ​មិន​ចុះឈ្មោះ​បន្តទៀត​នោះទេ​៕

អត្ថបទគួរចាប់អារម្មណ៍