ភ្នំពេញៈ ព្រឹត្តិការណ៍កីឡាប្រចាំឆ្នាំ ទិវារត់ពាក់កណ្ដាលម៉ារ៉ាតុងអន្តរជាតិអង្គរ លើកទី២៦ ឆ្នាំ ២០២០ ដែលគណៈកម្មាធិការជាតិអូឡាំពិកកម្ពុជា (NOCC) បានប្រកាសថា នឹងធ្វើនៅថ្ងៃទី ១៩ ខែ ធ្នូ ឆ្នាំ ២០២១ នោះ គឺត្រូវបានលើកពេលជាថ្មីទៀត ដោយធ្វើនៅថ្ងៃទី ២ ខែ មករា ឆ្នាំ ២០២២ វិញ ហើយបានកែសម្រួលនូវលក្ខខណ្ឌជាថ្មី ដើម្បីការពារជំងឺឆ្លងកូវីដ ១៩ ឱ្យមានសុវត្ថិភាពល្អ តាមមការណែនាំរបស់ក្រសួងជំនាញ។
លោក វ៉ាត់ ចំរើន អគ្គលេខាធិការ NOCC និងជាអ្នកគ្រប់គ្រងកម្មវិធីដ៏សំខាន់មួយនេះ បានប្រាប់ថា ព្រឹត្តិការណ៍នេះ ធ្លាប់មានអ្នកចូលរួមជាង ១ ម៉ឺននាក់ មកពីច្រើនប្រទេស នៅលើពិភពលោក ប៉ុន្តែលើកនេះ ត្រូវបានកំណត់ចំនួនអ្នកចូលរួមត្រឹម ២ ៥០០ នាក់ប៉ុណ្ណោះ ដោយផ្តល់អាទិភាពឱ្យអ្នកចូលរួមបានតែជនជាតិខ្មែរ និងជនបរទេស ដែលកំពុងស្នាក់នៅក្នុងប្រទេសកម្ពុជាតែប៉ុណ្ណោះ។
លោកបានបន្ថែមថា៖ «កម្មវិធីនេះ មានផ្នែកមួយចំនួន ត្រូវបានកាត់បន្ថយ ដូចជាកម្មវិធីជប់លៀង កម្មវិធីជួបជុំគ្នា រួមជាមួយនឹងកម្មវិធីមិនចាំបាច់នានាមួយចំនួនទៀត ដូចជាការជួបជុំសម្តែងបដិសណ្ឋារកិច្ច ពិធីសិល្បៈសប្បាយៗជាដើម។ បន្ថែមពីលើនេះ មុននឹងប្រកាសឱ្យចូលរួមរត់ប្រណាំង អត្តពលិកតម្រូវឱ្យចាក់វ៉ាក់សាំងដូសមូលដ្ឋានរួចរាល់ ហើយត្រូវធ្វើតេស្ត មុននឹងចូលទីលាន រីឯពេលរត់ប្រណាំងត្រូវរក្សាគម្លាតពីគ្នាឱ្យបានចម្ងាយ ១,៥០ ម៉ែត្រ ដោយត្រូវតម្រៀបជាជួរវែងៗ តែរត់តាមក្រុមចម្ងាយផ្លូវ ដែលបានកំណត់ជាស្រេច»។
«បន្ថែមលើនេះ អ្នកចូលរួម គឺមុនចេញដំណើរ ត្រូវពាក់ម៉ាស់ រហូតរត់បានចម្ងាយ ២០០ ម៉ែត្រ ទើបអនុញ្ញាតឱ្យដោះម៉ាស់ចេញ ហើយនេះជាវិធានការម៉ឺងមា៉ត់ ដើម្បីការថែទាំសុខភាព និងប្រព័ន្ធរក្សាសុវត្ថិភាពឱ្យបានល្អបំផុត ដែលនាយកគ្រប់គ្រង កម្មវិធីទទួលខុសត្រូវឱ្យបាន»។ លោក វ៉ាត់ ចំរើន បានបញ្ជាក់បន្ថែម។
អ្នកជំនាញកីឡា លោក វ៉ាត់ ចំរើន បានរំឭក និងដាស់តឿន នៅក្នុងសេចក្ដីអំពាវនាវរបស់គណៈកម្មាធិការម៉ារ៉ាតុងថា ដោយសារតែចំនួនអ្នកចូលរួម ត្រូវបានកំណត់យកតែ ២ ៥០០ នាក់នោះ អ៊ីចឹងគណៈកម្មការ បានសម្រេចផ្ដល់អាទិភាពដល់កីឡាករ កីឡាការិនី ដែលបានចុះឈ្មោះ រត់ប្រណាំង កាលពីឆ្នាំ ២០២០ គឺនៅមានសុពលភាព ប៉ុន្តែត្រូវមកផ្ទៀងផ្ទាត់ជាថ្មីពីថ្ងៃទី ៤ ដល់ថ្ងៃទី ២២ ខែ វិច្ឆិកា ២០២១។ ចំណែកកីឡាករកីឡាការិនីចុះឈ្មោះថ្មី សូមទំនាក់ទំនងចុះឈ្មោះចាប់ពីថ្ងៃ-ទី២៣ ខែវិច្ឆិកា ដល់ថ្ងៃទី ១ ធ្នូ ឆ្នាំ ២០២១៕
វីដេអូ៖