ក្រុងម៉ាឌ្រីដ: ឱកាសរបស់ក្រុម Atletico Madrid ក្នុងការបានឡើងទៅវគ្គ ១៦ ក្រុមចុងក្រោយ នៅក្របខ័ណ្ឌ Champions League ត្រូវបានប៉ះពាល់យ៉ាងធ្ងន់ធ្ងរ កាលពីថ្ងៃពុធ បន្ទាប់ពីភ្លាត់ចាញ់ ១-០ នៅផ្ទះខ្លួនឯង ដោយសារថ្វីជើងរបស់ក្រុម AC Milan ដែលលទ្ធផលនេះ ធ្វើឱ្យពួកគេត្រូវការជ័យ-ជម្នះជាចាំបាច់លើក្រុម Porto ក្នុងការប្រកួតចុងក្រោយរបស់ខ្លួន ក្នុងពូល B នេះ។
ការប្រកួតដ៏ស្វិតស្វាញ នៅឯកីឡដ្ឋាន Wanda Metropolitano ទំនងជាបញ្ចប់ទៅដោយគ្មានគ្រាប់បាល់ច្រើនជាង តែកីឡាករបម្រុង Junior Messias របស់ក្រុម Milan បានតែតបាល់បញ្ចូលទីគ្រាប់បាល់ជ័យជម្នះយ៉ាងស្អាតអស្ចារ្យ នៅនាទីទី៨៧ ដែលជាគ្រាប់បាល់ធ្វើឱ្យក្រុម Atletico កំពុងសម្លឹងមើលទៅការខ្ទាតចេញពីការ-ប្រកួតប្រជែងនេះយ៉ាងលឿន។
គ្រាប់បាល់របស់កីឡាករ Messias មិនត្រឹមតែមានន័យថា ក្រុម Atletico របស់លោក Diego Simeone នឹងត្រូវតែឈ្នះក្រុម Porto នៅថ្ងៃទី ៧ ខែធ្នូ ប៉ុណ្ណោះទេ តែថែមទាំងធ្វើឱ្យក្រុម Milan មានដង្ហើមដកឡើងវិញ ទោះឈរនៅបាតពូលក៏ដោយ ព្រោះក្រុមយក្សអ៊ីតាលីមួយនេះ តាមតែ ១ ពិន្ទុ ពីក្រោយក្រុមលេខ ២ Porto មុននឹងដល់ហ្គេមផ្ដាច់ព្រ័ត្រទល់នឹងក្រុមប្រធានពូល Liverpool នៅឯកីឡដ្ឋាន San Siro។
ក្រុមលេខ ៣ Atletico មាន ៤ ពិន្ទុ ស្មើក្រុម Milan ដោយខុសគ្នាគ្រាប់បាល់ចំណេញ តែពេលនេះ សម្រាប់ក្រុមយក្សអេស្ប៉ាញ សូម្បីតែការបានសិទ្ធិ ដើម្បីប្រកួតប្រជែង ក្នុងក្របខ័ណ្ឌ Europa League ក៏កំពុងតែមិនប្រាកដប្រជាកាន់តែខ្លាំងឡើងដែរ។
ដោយត្រូវបានសួរថា តើនេះគឺជា ១ ក្នុងចំណោមពេលវេលាដ៏សែនលំបាកបំផុត សម្រាប់ការកាន់តំណែងរបស់លោក នៅក្រុម Atletico មែនទេ? លោក Simeone បានតបថា៖ «យើងតែងតែមានបញ្ហាប្រឈម។ ខ្ញុំមានសុទិដ្ឋិនិយម ពោលគឺតែង-តែមានជានិច្ច ហើយខ្ញុំនឹងមិនផ្លាស់ប្ដូរជាដាច់ខាត»។
«ពិតណាស់ ក្រុមនឹងធ្វើប្រកួតប្រជែងយ៉ាងខ្លាំងក្លា ក្នុងហ្គេមចុងក្រោយ។ កម្មវិធី Champions League មិនងាយស្រួលនោះឡើយ ដូច្នេះ ក្រុមទាំងអស់ ដែលបានឆ្លងទៅវគ្គបន្ត សុទ្ធតែសមនឹងទទួលបានពិតមែន»។ នេះជាការបន្ថែមរបស់លោក Simeone។
គ្រប់រដូវកាល លើកលែង ២ ដងប៉ុណ្ណោះ ក្នុងចំណោមការបង្ហាញខ្លួន ១១ លើក នៅវគ្គសន្សំពិន្ទុតាមពូលនេះរបស់ ក្រុម Atletico ឃើញថា ពួកគេបានឡើងទៅវគ្គ ១៦ ក្រុមរហូត ក្នុងខណៈដែលក្រុម Milan ទើបបានចូលរួមក្នុងវគ្គនេះ ជាលើកដំបូង គិតតាំងពីឆ្នាំ ២០១៤ មក តែក្រុមភ្ញៀវ សមនឹងទទួលបានជ័យជម្នះ បន្ទាប់ពីបង្ហាញឱ្យនូវមហិច្ឆតាចង់ឈ្នះច្រើនជាង ក្រុមម្ចាស់ផ្ទះ។
ក្រុមទាំង ២ បញ្ចប់ទៅដោយមិនមានការធានានូវជ័យជម្នះនោះឡើយ ដោយកាលពីចុងសប្ដាហ៍ ក្រុម Milan ដែលឈរនៅលេខ ២ នៅក្របខ័ណ្ឌ Serie A បានចាញ់ក្រុម Fiorentina ខណៈក្រុម Atletico ដែលស្ថិតនៅចំណាត់ថ្នាក់លេខ ៤ នៅក្របខ័ណ្ឌ La Liga ទើបឈ្នះជាលើកទី២ កាលពីថ្ងៃសៅរ៍ ក្នុងចំណោម ៧ ហ្គេមចុងក្រោយ នៅលីគ៕ AFP/VN