ភ្នំពេញ: អ្នកប្រដាល់ជំនាន់ថ្មីវ័យក្មេង ធន់ ផានិត មកពីសមាគមប្រដាល់កងយោធពលខេមរភូមិន្ទ បានបើកឱកាសឱ្យជើងចាស់កីឡាក ម៉ន សាម៉េត មកពីសមាគមប្រដាល់ក្រសួងមហាផ្ទៃ ដែលធ្លាប់ប្រកួតចាញ់នោះឡើងមកប្រកួតសងសឹក ក្នុងកម្មវិធីម៉ាសហ្វៃប្រកួតតែ ១ ទឹក មានរយៈពេល ៩ នាទី នៅសង្វៀនថោន នាយប់ថ្ងៃអាទិត្យសប្តាហ៍នេះ។
ប្រវត្តិប្រកួតដ៏អស្ចារ្យនៃកីឡាករវ័យក្មេង ធន់ ផានិត ត្រូវបានលោកគ្រូបង្វឹករបស់ក្លិបទម្លាយឱ្យដឹងថា មានស្រុកកំណើតមកពីខេត្តកោះកុង។ ក្នុងអាជីពឡើងប្រដាល់ត្រឹមជាង ១ ឆ្នាំកីឡាករ ធន់ ផានិត ប្រកួតជាផ្លូវការបានចំនួន ២៤ លើក ដោយឈ្នះសុទ្ធតែកីឡាករជើងចាស់ខ្លាំងៗមួយចំនួន ក្នុងនោះ ម៉ន សាម៉េត ក៏ធ្លាប់ចាញ់យ៉ាងគួរឱ្យឆ្ងល់ដែរ។ នៅក្នុងចំណោមអ្នកប្រដាល់ ក្នុងប្រភេទទម្ងន់ ៦០ គីឡូក្រាម ដែលបានជួបប្រកួតជាមួយ ធន់ ផានិត ធ្លាប់ចាញ់ពិន្ទុតែកីឡាករ ២ នាក់ប៉ុណ្ណោះ គឺកីឡាករ រិន ដេវីដ មកពីក្លិបនាគរាជចតុមុខ និងចាញ់កីឡាករ អេលីត ចំរើន មកពីនាយកដ្ឋានអង្គរក្ស ហើយក្រៅពីនេះ ធន់ ផានិត ប្រកួតឈ្នះទាំងអស់។
លោក ជួប វុត្ថា អ្នកផ្គូផ្គង និងគ្រប់-គ្រងកម្មវីធីប្រចាំសង្វៀនថោននិយាយថា៖ «តាមការស្នើសុំរបស់កីឡាករ ម៉ន សាម៉េត សុំសងសឹក ខ្ញុំក៏បានយល់ព្រមដាក់ឱ្យប្រកួតគ្នាក្នុង ១ ទឹកប្រកួតរយៈពេល ៩ នាទី នៅថ្ងៃអាទិត្យនេះតែម្តង ដែលអមក្នុងកម្មវិធីដណ្តើមប្រាក់លានជាមួយកំពូលជើងខ្លាំង ៤ នាក់ទៀត មាន យ៉េន ឌីណា,ផល សុភ័ណ្ឌ,ឡុង បេនលឿន និង លន បញ្ញា សុទ្ធតែកំពូលល្បីខ្លាំង នៅស្រុកខ្មែរ»។
លោក ជួប វុត្ថា បន្ថែមថា៖ «ធន់ ផានិតនេះ ក្នុងទម្ងន់ដូចគ្នាលំបាករក គូប្រកួតណាស់ ពីព្រោះចេញស្នៀតបានល្អគ្រប់កាលៈទេសៈ ជាពិសេសក្បាច់ជង្គង់តែម្តង ស្រួចល្អណាស់»។
នៅក្នុងបទពិសោធឡើងសង្វៀនវិញ កំណត់ត្រាប្រកួតរបស់កីឡាករ ម៉ន សាម៉េត មានចំនួនប្រកួតច្រើនជាង ធន់ ផានិត រហូតដល់ ១២២ លើកឯណោះ។ ម៉ន សាម៉េត ប្រកួតបានចំនួន ១៤៦ លើក ឈ្នះ ១០៦ លើក ចាញ់ ៣១ លើក និងស្មើ ៩ លើក ក្នុងនោះផ្តួលដៃគូឱ្យសន្លប់បានចំនួន ៣៥ លើក។ ចំណែកឯ ធន់ ផានិត ប្រកួតបានចំនួន ២៤ លើក ឈ្នះ ២២ លើក និងចាញ់ ២លើក ក្នុងនោះផ្តួលដៃគូឱ្យសន្លប់បានចំនួន ១៥ លើក។
ធន់ ផានិត និយាយថា៖ «ម៉ន សាម៉េត មិនអាចឈ្នះខ្ញុំបានទេ បើសិនជាប្រឹងខ្លាំងបានត្រឹមស្មើប៉ុណ្ណោះ ពីព្រោះកម្មវិធីនេះ បើមិនសន្លប់គេចាត់ទុកជាស្មើ ហេតុនេះអាចស្មើច្រើនជាង។ ខ្ញុំនឹងវ៉ៃគាត់ឱ្យចាញ់អស់ចិត្ត»។ លោក ធន់ សុភា គ្រូបង្វឹក បាននិយាយថា៖ «ខ្ញុំគិតថា ធន់ ផានិត មានភាគរយឈ្នះតិចដែរ ពីព្រោះលក្ខខណ្ឌមិនសន្លប់ឱ្យស្មើគឺខ្ញុំសង្ឃឹមស្មើច្រើនជាង ពីព្រោះ ម៉ន សាម៉េត រឹងណាស់មិនងាយសន្លប់ទេ»។
ចំណែកឯ ម៉ន សាម៉េត បាននិយាយថា៖ «ខ្ញុំនឹងផ្តួល ធន់ ផានិត ឱ្យសន្លប់ ដើម្បីស្តារមុខមាត់ឡើងវិញ។ នេះគឺ ការតាំងចិត្ត ប៉ុន្តែយ៉ាងណាស៊ីសងការប្រកួតជាក់ស្តែងសិន មិនទាន់ដឹងថា យ៉ាងណានៅឡើយ ប៉ុន្តែទំនងអាចស្មើច្រើនជាង»។
លោក ម៉ាង ម៉ន ដែលជាគ្រូបង្វឹក និងត្រូវជាឪពុកផងដែរ បាននិយាយថា៖ «អាម៉េត គ្នាចាស់ហើយ ដោយមានអាយុ ៣០ ឆ្នាំ ដែលអាចខ្សោយកម្លាំងជាងក៏ថាបាន ហេតុនេះ វាលំបាកយកឈ្នះដែរ។ ខ្ញុំរំពឹងស្មើច្រើនជាងឈ្នះ ព្រោះម៉ាសហ្វៃ ត្រូវការផ្តួលដៃគូឱ្យសន្លប់ទើបឈ្នះ គឺមិនគិតពិន្ទុនោះឡើយ»។
លោក ជួប វុត្ថា អ្នកផ្គូផ្គង បានបន្ថែមទៀតថា សប្តាហ៍នេះ មានវត្តមានកីឡាករល្អៗណាស់ ដូចជាគូដណ្តើមប្រាក់លាន គឺជាកំពូលកីឡាករល្អបំផុត ដោយវត្តមានរបស់កីឡាករ យ៉េន ឌីណា,ឡុង បេនលឿន, ផល សុភ័ណ្ឌ និង លន បញ្ញា គឺជាកីឡាករលំដាប់ចូលវាយមិនចេះដកថយ ឬលាក់កម្លាំងនោះឡើយ៕